Lucas 14 - Quechua Ayacucho Bible 1987

Punkipakusqa runata Jesus sanoyachisqanmanta

¹ Samana punchawpim *f**fariseokunapa jefenpa wasinman Jesus yaykuykurqa chaypi mikunanpaq, hinaptinmi chaypi kaq *f**fariseokuna wateqachkarqaku.

² Punkipakusqa runa Jesusman asuykuptinmi

³ Diospa leynin yachachiqkunatawan *f**fariseokunata tapurqa: —¿Leyqa permitinchu *f**samana punchawpi sanoyachinata? —nispa.

⁴ Paykuna mana imatapas rimariptinmi onqoqta sanoyarachispan pasakunanpaq kamachirqa.

⁵ Hinaptinmi chaypi kaqkunata Jesus nirqa: —Churikichikpas otaq bueyesnikichikpas uchkuman urmaykuptinqa ¿manachum chaypunilla horqoruwaqchik samana punchaw kachkaptinpas? —nispa.

⁶ Manam pipas imaniytapas atirqachu.

Casarakuyman convidasqakunamanta

⁷ Puntapi asientokuna akllasqankuta qawarispanmi rikchanachispan Jesus nirqa:

⁸ —Pipas casarachikuspan convidasuptikiqa amayá punta asientokunapiqa tiyaruychu. Pipas qanmanta astawan reqsisqa kaq yaykuramuptinmi

⁹ convidasuqniki nisunkiman: “Anchuriy, paymi kaypiqa tiyanqa” nispa hinaptin qamñataq qepa lawpi penqakuywan tiyawaq.

¹⁰ Convidasqa kaspaykiqa qepa lawpiyá tiyaykuy chaynapi convidasuqniki yaykuykamuspan: “Taytáy, hamuy kay ñawpaqpi tiyaykuy” nisunaykipaq. Chayna kaptinqa llapa convidasqapa qayllanpim ancha honrasqa kanki.

¹¹ Pipas hatunchakuqqa humillasqam kanqa, pipas humillakuqñataqmi hatunchasqa kanqa.

¹² Nirqataqmi convidaqnin *f**fariseo runatapas: —Almuerzopaq otaq cenaypaq convidota ruraspaykiqa, amayá qayaykuy amistadllaykitachu otaq wawqellaykitachu otaq ayllullaykitachu otaq apu vecinollaykitachu, chaynata ruraptikiqa paykunapas convidasuspaykim kutirachisunkiman.

¹³ Convidota ruraspaykiqa qayaykuy wakchakunatawan suchukunatayá hinaspa wistukunatawan ñawsakunata.

¹⁴ Chaynata ruraptikiqa allin ruraqkuna kawsarimuptinmi Diosña kutichipusunki, mana kutichiy atiqkuna convidasqaykimanta chaymi ancha kusisqa kanki.

Convido fiestawan Jesus rikchanachisqanmanta

¹⁵ Jesuspa rimasqanta paywan-mikuq runa uyariruspanmi Jesusta nirqa: —Mayna kusisqam Diospa munaychakusqanpi mikuqkunaqa —nispa.

¹⁶ Hinaptinmi Jesusñataq nirqa: —Huk runam hatun convidota ruraspan achkaqman willachimurqa.

¹⁷ Mikuy hora chayaramuptinmi convidasqankunata runanwan qayachimurqa: “Hamuychikña, lliwñam alistasqa kachkan” nispa.

¹⁸ Ichaqa llapallankum disculpakuyta qallaykurqaku. Punta kaqmi nirqa: “Disculpaykuway, rantisqay chakra qawaqraqmi rinay kachkan” nispa.

¹⁹ Hukninñataqmi nirqa: “Disculpaykuway, pichqa pares yunta rantisqay pruebaqraqmi richkani” nispa.

²⁰ Hukninñataqmi nirqa: “Chayraqmi casarakuruni, chayraykum mana riymanchu” nispa.

²¹ Convidasqakunata qayamuq runa kutiruspanmi patronninman willamurqa chaymi payñataq anchallataña piñakuspan yapatawan runanta kamachirqa: “Kallpaspayki plazakunamantawan callekunamanta pusaramuy wakchakunata, suchukunata, ñawsakunata hinaspa wistukunata” nispa.

²² Hinaptinmi runanñataq nirqa: “Señor, kamachiwasqaykiman hina ruraruptiypas campoqa kachkanraqmi” nispa.

²³ Chaymi patronninñataq nirqa: “Rispaykiyá ñankunamantawan chakrakunamanta obligamuy wasiyman huntamunankupaq.

²⁴ Yachaychikyá, punta qayachimusqay runakunaqa manam mikunqakuchu convidoytaqa.”

Jesustaqa tanteaspa qatinamanta

²⁵ Achkallaña runakuna Jesuswan riptinmi paykuna lawman muyuriykuspan nirqa:

²⁶ —Pipas qatiwaqniyqa ñoqatam kuyawanan taytanmantapas, mamanmantapas, warminmantapas mastaqa chaynataq churinkunamantapas, wawqenkunamantapas, paninkunamantapas hinaspa kikinpa vidanmantapas mastaqa. Mana chayna kaspaqa manam puriqmasiychu kanman.

²⁷ Pipas ñoqarayku ñakaristin qatiwaqniyqa ñoqapaq hinam.

²⁸ Pipas torre hatarichiyta munaspaqa qespichinankama gastananpaqmi puntataqa tanteanqa.

²⁹ Mana chayqa cimientaruspallan sayaruptinmi runakunapas asipayaspan ninman:

³⁰ “Kay runaqa torre hatarichiyta qallaykuspallanmi mana qespichinchu” nispa.

³¹ Chaynataqmi chunka waranqa soldadoyoq reypas, iskay chunka waranqa soldadoyoq reypa contranpi rinanpaqqa sumaqtaraq tanteanqa.

³² Mana atiq hina kaspanqa karullataraq enemigon hamuchkaptinmi comisionta kachanqa mana peleaspalla hawkayayman yaykunankupaq.

³³ Chaynaqa mayqannikichikmantapas kapuqninta tukuy ñoqarayku mana saqeqqa, manam discipuloyqa kananchu.

Kachiwan tupachispa yachachisqanmanta

³⁴ —Kachiqa allinmi ichaqa qamyayaruspanqa ¿imapaqtaq valenman?

³⁵ Chakrapaqpas nitaq wanupaqpas manañam valenñachu aswanqa wischunallapaqñam. Uyariwaqniykunaqa kasukuychikyá.