Lucas 12 - Quechua Ayacucho Bible 1987

Iskay uya kaymanta

¹ Waranqantin-waranqantin runakuna tanqanakustin Jesuspa kasqanman huñunakaramuptinmi puntataqa discipulonkunata nirqa: —Cuidakuychik *f**fariseokunapa qonchunmanta otaq iskay uya kayninkumanta.

² Imapas pakasqa kaqkunaqa qawachisqam kanqa, chaynataqmi mana yachasqa kaqkunapas yachasqataq kanqa.

³ Tutayaypi rimasqaykichikpas punchawpi uyarisqam kanqa, wasi ukupi upallalla rimasqaykichikñataqmi wasipa altosninmanta willakusqa kanqa.

Cuerpo wañuchiqtaqa mana manchakunamanta

⁴ —Kuyasqallaykuna, amayá manchakuychikchu runa wañuchiqkunataqa, almankutaqa manam imananmankuchu.

⁵ Ñoqam ichaqa nikichik pim manchakunaykichikta. Manchakuychikqa wañurachispa wiñay castigoman wischuykuqtayá.

⁶ —¿Manachum pichqa pichinchurruchakunatapas *f**rantikunku as qollqellapaq? Chaywanpas Diosqa mayqantapas manam qonqarunchu.

⁷ Qamkunapaqa chukchaykichikpas llapallanmi yupasqa kachkan. Chaynaqa amayá manchakuychikchu, qamkunaqa pichinchurruchakunamantapas aswan valeqmi kankichik.

Jesuspa favorninpi rimaqkunamanta

⁸ —Uyariwaychik, runakunapa qayllanpi ñoqamanta willakuqtaqa, Diosmanta Hamuq Runapas Diospa angelninkunapa qayllanpim willakusaq ñoqapa kasqanta.

⁹ Runakunapa qayllanpi negaqniytaqa ñoqapas negasaqmi Diospa angelninkunapa qayllanpi.

¹⁰ —Pipas Diosmanta Hamuq Runapa contraypi rimaqqa pampachasqam kanqa, Chuya Espiritupa contranpi rimaqmi ichaqa mana pampachasqachu kanqa.

¹¹ —Huñunakuna wasikunaman, juzgadokunaman hinaspa autoridadkunaman pusasuptikichikqa, amam llakikunkichikchu imam otaq imaynam rimanaykichikmantaqa.

¹² Chay ratopi imam rimanaykichikmantaqa Chuya Espiritum yachachisunkichik.

Mana yuyayniyoq apu runamanta

¹³ Jesustam runakuna ukumanta huk kaqnin nirqa: —Yachachikuq, wawqeytayá niykapuway herenciata ñoqawan rakinakunanpaq —nispa.

¹⁴ Chaymi Jesusñataq nirqa: —Yaw runa ¿pitaq ñoqata churawarqa qamkunapa jueznikichik otaq partiqnikichik kanaypaq?

¹⁵ Chaynata niruspanmi nirqataq: —Cuidakuychikyá qollqella kuyaruymanta. Runaqa manam tukuy imayoq karunallanpaqchu kawsanan.

¹⁶ —Kay rikchanachiytayá nisqaykichik: Huk apu runam chakranmanta sinchillataña cosecharurqa

¹⁷ chaymi tantearqa: “¿Maypiñataq churasaq kay cosechasqaytaqa?”

¹⁸ Kaynatayá rurasaq, kawsaykuna waqaychanay wasita paskaruspayá aswan hatuntaña rurarusaq trigoytawan tukuy imaykunata chaypiña waqaychanaypaq.

¹⁹ Hinaspam kikillayta nikusaq: Achkallañam tukuy imaykunapas unay watakunapaq kapuwachkan. Kunanqa samakuspayá mikukusaq, upyakusaq hinaspa kusikusaq, nispa.

²⁰ Ichaqa Diosmi payta nirqa: “Mana yuyayniyoq runa, kunan tutapunim wañurunki. Chaynaqa waqaychasqaykiqa ¿pipaqtaq kanqa?” nispa.

²¹ —Chaynam pasarunqa kikillanpaq maskaq runataqa, Diospa qayllanpiqa kachkan pasaypaq mana imayoqmi.

Churinkunataqa Diospuni cuidawasqanchikmanta

²² Jesusmi discipulonkunata nirqa: —Ñoqam nikichik, amayá afanakuychikchu mikunaykichikmantaqa hinaspa pachakunaykichikmantaqa.

²³ Mikuymantapas astawanqa valen vidaykichikmi cuerpoykichiktaqmi pachamantapas astawanqa valen.

²⁴ Qawariychik ullachkukunata. Paykunaqa manam tarpunkuchu nitaq cosechankuchu, manataqmi trojenkupas nitaq taqenkupas kantaqchu. Chaywanpas paykunataqa Diosmi mikuchin. Qamkunaqa alton pawaq urpikunamantapas aswan valeqmi kankichik.

²⁵ ¿Mayqannikichiktaq afanakuspaqa huk kuchusta wiñaruwaqchik?

²⁶ Chayllatapas mana rurayta atichkaspapas ¡wakin kaqkunamantaqa imapaqtaq llakikunkichik!

²⁷ —Qawariychik waytakunapa wiñasqanta, manam llamkankuchu nitaq puchkankuchu. Ichaqa nikichikmi, Rey Salomonpas sumaqllawan pachakuq kachkaspapas manam huknin wayta hinallapas pachakurqachu.

²⁸ Yaw pisi iñiyniyoq runakuna, purunpi waytakunaqa kunan sayachkaspapas paqarinqa hornopim kañarachikun, waytakunatapas Dios pachachichkaspanqa ¿manachum qamkunatapas pachachisunkichik?

²⁹ Qamkunaqa amayá llakikuychikchu: “Imataraq mikusun, imataraq tomasun” nispaqa. Amataqyá ancha llakisqallañaqa puriychikchu.

³⁰ Tukuy hinastinpi Dios mana adoraqkunam tukuy chaykunamantaqa afanakun. Qamkunapaqa kachkanmi Taytaykichik, paymi yachan tukuy imapas pisipususqaykichiktaqa.

³¹ Maskaychikqa Diospa munaychakusqantayá hinaptinqa qosunkichikmi tukuy ima pisipusuqnikichikta.

Hanaq pachapim riquezataqa churana.

³² —Ovejaykuna, amayá manchakuychikchu, aslla kaptikichikpas Dios Taytaykichikmi munaychakusqanta qoykusunkichik.

³³ Kapuqnikichikta *f**rantikuspayá mana imayoqkunaman qoychik. Chaynata ruraspaqa hanaq pachapim mana mawkayaq wayqaman mana tukuq kapuqnikichikta huntachichkankichik. Chaypiqa manam pipas asuykunchu suwananpaq, manataqmi puyupas kanchu tukunanpaq.

³⁴ Tukuy kapuqnikichikpa kasqanpim sonqoykichikpas kanqa.

Qawan-qawanlla Jesusta suyanamanta

³⁵ —Listollayá kaychik mecheroykichiktapas ratachispa.

³⁶ Casamientomanta patronninku kutimunanta suyaq runakuna hinayá qamkunapas kaychik chaynapi chayaramuspan punkuta takamuptin chaylla kichanaykichikpaq.

³⁷ Mayna kusisqam rikchachkaqta patronninpa tariykamusqan sirvientekunaqa. Cheqaptapunim nikichik, patronninku allichakuykuspanmi paykunata mesapi tiyaykachispan kikinpuni servinqa.

³⁸ Chawpi tutataña otaq achikyaqtaña patron kutimuspan suyaqnin sirvientenkunata tariykuptinqa ancha kusisqam kanqaku.

³⁹ Yachaychikyá kayta, sichum wasiyoq yachanman imay hora suwa hamunanta hinaspaqa manachá suwachikunmanchu.

⁴⁰ Chaynaqa qamkunapas listollayá kaychik. Diosmanta Hamuq Runaqa kutiramusaq mana piensasqaykichik horam.

Allin sirvientemantawan mana allin sirvientemanta

⁴¹ Pedrom tapukurqa: —Señor, kay rikchanachiy nisqaykiqa ¿ñoqallaykupaqchu icha llapallan runakunapaqwanchu? —nispa.

⁴² Chaymi Señorñataq nirqa: —Qamkunaqa allin yuyayniyoq confianza mayordomo hinayá kaychik, paytam wasinpi patronnin churarqa sirvientenmasinkunata imam horapi mikuchinanpaq.

⁴³ Ancha kusisqam chay runaqa sichum patronnin kutimuspa chayna rurachkaqta tariykamuptinqa.

⁴⁴ Cheqaptapunim nikichik, patronninqa churaykunqa tukuy kapuqninkunapiña nanachikunanpaqmi.

⁴⁵ Ichaqa sichu mana allin sirviente kaspa ninman: “Patronniyqa unamunqaraqmi” nispa hinaspañataq sirvientemasinkunata maqayta qallarispa mikukunman upyakunman hinaspa sinkakunman.

⁴⁶ Chayna runapaqa patronninmi kutiramunqa mana suyasqan punchawpi hinaspa mana yachasqan horapi. Sinchitam castiganqa mana iñiyniyoqkunatawan kuskata.

⁴⁷ —Patronninpa munasqanta yachachkaspan mana alistakuq hinaspa mana kasukuq sirvienteqa sinchi castigasqam kanqa.

⁴⁸ Patronninpa munasqanta mana yachachkaspan imapipas faltakuruq sirvienteqa pisilla castigasqam kanqa. Achka chaskiqkunaqa achka mañasqam kanqaku. Achka confiasqa runamantaqa achkatataqmi mañana.

Jesusqa runakuna rakinachiq hamusqanmanta

⁴⁹ —Ñoqaqa ninatam kay pachaman apamurqani, chaynaqa maynatam munayman rupachkanantaña.

⁵⁰ Ñakarinayraqmi kachkan. Chaymi hukmanyasqa kachkani cumplikunankama.

⁵¹ ¿Creenkichikchu hamusqaywanqa hawkalla kanaykichikta? Ñoqaqa rakinakuytam apamurqani.

⁵² Kunanmantapunim wasipi pichqa kaqkuna rakinasqa kanqaku. Kimsam iskaypa contranpi kanqa, iskayñataqmi kimsapa contranpi.

⁵³ Taytam qari churinwan contranakunqa. Mamam warmi wawanwan contranakunqa chaynataqmi suegrapas llumchuyninwan contranakunqa.

Tiempokunapi pasakuqwan cuenta qokunamanta

⁵⁴ Jesusmi runakunata nirqa: —Intipa seqaykunan lawmanta puyu rikurimuptinmi “paramunqam” ninkichik, hinaptinmi chayman hina paramun.

⁵⁵ Qechwa lawmanta wayramuptinñataqmi “rupamunqam” ninkichik, hinaptinmi chayman hina rupamun.

⁵⁶ ¡Iskay uyakuna! Cielopipas chaynataq kay pachapipas kaqkunata qawaspam imaynam tiempo kananta yachankichik, kunan tiempopi pasakusqanmantam ichaqa mana cuentata qokunkichikchu.

Manaraq juzgadoman chayachkaspa allinyanakunamanta

⁵⁷ —Kikillaykichikqa ¿manachu allin arregloman hina allichawaqchik?

⁵⁸ Quejakusuqnikiwan rispaqa ñanllapiraqyá allinyanakuruy chaynapi juezman ama entregasunaykipaq, guardiaman juez entregasuptikiqa carcelmanmi aparusunkiman.

⁵⁹ Chaymantaqa manam lloqsinkichu debekusqaykita pasaypaq paganaykikama.