Lucas 11 - Quechua Ayacucho Bible 1987

Imaynam Diosta mañakunamanta

¹ Huk sitiopim Jesus mañakuchkarqa chaymi tukuykuptin huknin discipulon nirqa: —Señor, Bautizaq Juanqa yachachirqam discipulonkunata imaynam Dios mañakuyta, chaynaqa ñoqaykutapas yachaykachiwaykuyá —nispa.

² Chaymi Jesusñataq nirqa: —Diosta mañakuspaqa kaynatam ninkichik: “Taytayku, sutiki yupaychasqa kachun, munaychakusqayki hamuchun.

³ Sapa punchaw mikunaykutayá qowayku.

⁴ Ñoqaykupa huchaykutayá pampachawayku, ñoqaykupas mana allin rurawaqniykutam pampachaniku. Amayá kachaykuwaykuchu pruebamanqa.”

⁵ Jesusqa nirqataqmi: —Huk kaqnikichikpa amistadnikichik kaptinqa manachum chawpi tutaña kaptinpas rispaykichik ruegakuwaqchik: “Vecino, ama hina kaspaykiyá kimsa tantata prestaykullaway.

⁶ Amistadniy wasiyman samakaramuptinmi mikuykachinaypaq imallaypas mana kanchu” nispa.

⁷ Hinaptin amistadnikiñataq ukumanta nimunman: “¡Ama churmichawaychu! Punkuqa segurasqañam, warmachaykunapas ñoqawanmi puñuchkanña. Manam hatarimuymanchu mañawasqaykita qoqnikiqa” nispa.

⁸ Chaynaqa amistadnin kasqanrayku manaña qospanpas, punkuta takapayaspan mañakusqanraykuchá hatarispan tukuy ima mañakusqanta qoykunqa.

⁹ Chaymi nikichik: Mañakuptikichikqa Diosqa qosunkichikmi. Maskaychik, tarinkichikmi, qayaychik, kichasunkichikmi.

¹⁰ Mañakuqqa chaskinmi, maskaqqa tarinmi, qayakuqqa kichaykachikunmi.

¹¹ —Churikichikmanqa ¿yaqachum culebrata qoykuwaqchik challwata mañakusuptikichik

¹² otaq atoq-atoqta runtuta mañakusuptikichik?

¹³ Qamkunaqa mana allin runakuna kachkaspam churikichikmanqa allin kaqkunata qonkichik ¿chaychu mañakuqkunamanqa hanaq pachapi kaq Taytaykichik mana qosunkichikman Chuya Espirituta?

Jesuspa contranpi rimasqankumanta

¹⁴ Huk kutipim Jesus huk runamanta qarqorurqa mana rimachiq demoniota, lloqsiruptillanmi runañataq rimarirurqa, chayta rikuqninkunam admirasqallaña karqaku.

¹⁵ Wakinmi nirqaku: —Kay runaqa demoniokunataqa qarqon demoniokuna kamachiq Beelzebupa atiyninwanmi —nispa.

¹⁶ Wakinñataqmi Jesusta pruebaman churayta munaspanku mañarqaku cielomanta *f**milagrota qawachinanpaq.

¹⁷ Chaymi paykunapa piensasqanta yachaspan Jesus nirqa: —Mayqan nacionpas chaqwallapi rakinasqa kaspaqa purmanqam, familiapas rakinasqa kaspaqa manataqmi takyanchu.

¹⁸ *f**Satanas kikinpa contrallanpi kaptinqa ¿imaynataq munaychakusqanqa takyanman? Chaynataqa nichkaykichik: Demoniokunapa jefen Beelzebupa atiyninwanmi demoniokunataqa qarqonki, nispa niwasqaykichikraykum.

¹⁹ Nisqaykichikpi hina Beelzebupa atiyninwan demoniokunata qarqoptiyqa ¿pipa atiyninwantaq qatiqnikichikqa demoniokunata qarqon? Chaynaqa paykunam juzgasunkichik.

²⁰ Ñoqaqa demoniokunataqa qarqoni Diospa atiyninwanmi, chaynaqa Diospa munaychakusqanqa chayaramusunkichikñam.

²¹ —Tukuy rikchaq armayoq kallpasapa runa wasinpi imankunatapas waqaychaptinqa tukuy imanqa allin waqaychasqam kachkan.

²² Ichaqa paymanta aswanraq kallpasapa runa rikuriramuspanqa venceruspanmi armankunatapas qechurunman hinaspam imankunatapas aypukurunman.

²³ —Pipas mana favorniypi kaqqa contraypim kachkan. Cosechapi ñoqawan mana huñuqñataqmi usuchichkan.

Runaman demonio kutiykusqanmanta

²⁴ —Runamanta demonio lloqsiruspaqa qochqakunapim samananpaq maskastin purin, mana tarispanñataqmi nin: “Lloqsimusqay runamanyá kutikusaq” nispa.

²⁵ Kutirispanñataqmi chay runapa sonqonta tariykun sumaq allichasqata, sumaq pichasqata.

²⁶ Kutirispanmi pusaramun kikinmantapas peornin qanchis demoniokunataraq chaynapi chay runaman yaykuspa *f**yachanankupaq. Chaymi chay runaqa rikurirun ñawpaq kasqanmantapas astawan peorña.

Cheqap kusisqa runakunamanta

²⁷ Jesus chaynata rimachkaptinraqmi runakuna ukumanta huk warmi qaparimurqa: —¡Mayna kusisqaraq wachakusuqniki hinaspa ñuñusuqniki warmiqa! —nispa.

²⁸ Chaymi Jesusñataq nirqa: —Aswan kusisqaraqmi Diospa palabranta uyarispa kasukuqkunaqa —nispa.

Milagrota qawachinanpaq runakunapa mañakusqanmanta

²⁹ Jesuspa muyuriqninman runakuna qeminakamuptinmi paykunata nirqa: —Mana allin casta runakunallam *f**milagro qawachinaytaqa mañakunku. Manam qawachisqaykichikchu milagrotaqa, qawaspaqa-qawachisqaykichik Diosmanta willakuq Jonasta imam pasasqallantam.

³⁰ Ninive llaqtapi runakunapaqmi Jonasqa señal hina karqa, chaynam Diosmanta Hamuq Runapas, señal kani.

³¹ *f**Saba nacionniyoq reinapas juicio punchawpi kaypi kaq runakunapiwan kawsarimuspanmi paykunata acusanqa. Payqa hamurqa karu-karu llaqtamantaraqmi Rey Salomonpa yachaynin uyariq. Salomonmantapas aswan mas yachayniyoqmi kaypiqa kachkani.

³² Ninive llaqtapi runakunam kawsarimunqaku kay runakunapiwan kuska juicio punchawpi hinaspam kay runakunata acusanqa. Paykunaqa huchankumantam wanakurqaku Jonaspa willakusqanwan, Jonasmantapas aswan allin willakuqmi kaypiqa kachkan.

Ñawinchikqa achkiy hina kasqanmanta

³³ —Mecherotaqa ratachina manam pakarunapaqchu nitaq cajonpa ukunman churarunapaqchu aswanqa altomanmi churana wasiman yaykuqkuna rikunankupaq.

³⁴ Ñawiqa cueponchikpa achkiynin hinam. Ñawiki allinta qawakuptinqa vidaykim kachkan achkiyniyoq. Ñawiki mana allinta qawakuptinmi ichaqa vidaykiqa kachkan pasaypaq tutayayllapi.

³⁵ Qampi achkiy kaqtaqa amayá tutayarachiychu.

³⁶ Chaynaqa qampi achkiy kaptin mana imaniraq tutayayniyoq kaspaykiqa tukuy imatam sutillata rikunki imaynam mecherowan rikusqaykita hina.

Fariseokunata Jesus qaqchasqanmanta

³⁷ Rimayta Jesus tukuruptillanmi huk *f**fariseo runa convidarqa wasinpi mikuykunanpaq chaymi rispan mikunanpaq tiyaykurqa.

³⁸ Paykunapa costumbrenman hina Jesus makinta mana mayllakuptinmi convidaqnin extrañasqallaña qawarayarqa.

³⁹ Chaymi Señorñataq nirqa: —Yaw *f**fariseokuna, qamkunaqa vasotawan platotam hawallanta mayllankichik, sonqoykichikmi huntasqa kachkan suwakuy munaywan hinaspa mana allin ruray munaywan.

⁴⁰ ¡Mana yachayniyoqkuna! ¿Manachum hawantawan ukuntaqa Diospuni rurarqa?

⁴¹ Kapusuqnikichikmantayá qoychik limosnata chaynapi tukuy imapas limpio kapusunaykichikpaq.

⁴² —¡Imaynaraq kankichik *f**fariseokuna! Qamkunam *f**diezmota qonkichik yerba buenamanta, rudamanta hinaspa tukuy rikchaq yuyukunamanta. Aswanqa qonqarunkichikmi allin ruraytawan Diospa kuyapayakuynintaqa. Kaykunataqa kasukunaykichikmi *f**diezmo qoytapas ama qonqaspa.

⁴³ —¡Imaynaraq kankichik *f**fariseokuna! Qamkunaqa *f**huñunakuna wasipipas ñawpaqllapi tiyaytam munankichik, munankichiktaqmi plazakunapi hatun respetowan rimaykusunaykichiktapas.

⁴⁴ —¡Imaynaraq kankichik! ¡Qamkunaqa kachkankichik mana rikuriq sepulturakuna hinam! Runakunam hawanta purin ukunpi kaqkunata mana yachastin.

⁴⁵ Hinaptinmi Diospa leynin yachachiqkunamanta huk kaqnin nirqa: —Yachachikuq, chaynata rimaspaykiqa ñoqaykutapas insultawachkankikum —nispa.

⁴⁶ Chaymi Jesusñataq nirqa: —Qamkunapas ¡imaynaraq kankichik Diospa leynin yachachiqkuna! Runakunamanmi mana apay atinanku llasaq qepita churkuchkankichik, qamkunam ichaqa llachpayllapas mana llachpaykunkichikchu.

⁴⁷ —¡Imaynaraq kankichik! Qamkunaqa abueloykichikkunapa wañuchisqan willakuqkunapa sepulturankunatam rurankichik.

⁴⁸ Yachankichikmi abueloykichikkunapa chay rurasqankunataqa, chayraykum paykunapa ruraqmasin kankichik. Paykunam Diosmanta willakuqkunata wañuchirqaku, qamkunañataqmi sepulturanta rurankichik.

⁴⁹ —Chayraykum Diosqa yachayninpi nirqaña: “Ñoqamanta willakuqkunatawan *f**apostolkunata kachamuptiymi wakinta wañuchispa wakintañataq ñakarichinkichik” nispa.

⁵⁰ Kay uyariwaqniy runakunamantam Dios cuentata mañanqa qallariyninmantapuni llapallan willakuqkunata wañuchisqankumanta,

⁵¹ Abel wañuchisqankumanta Zacarias wañuchisqankukama. Zacariastam wañurachirqaku *f**altarmanta *f**santuarioman rinapi. Paykunapa yawarninmantamá Dios cuentata mañasunkichik.

⁵² —¡Imaynaraq kankichik Diospa leynin yachachiqkuna! Qamkunaqa reqsinkichikmi runakunaman imam yachachinaykichikta, qamkunam ichaqa mana yachayta munankichikchu, yachay munaqkunatañataqmi harkakunkichik.

⁵³ Chaymanta Jesus lloqsiruptinmi Diospa leynin yachachiqkunawan *f**fariseokunapas piñakuruspanku tapupayarqaku

⁵⁴ imapipas pantarachispanku chaymansumlla acusanankupaq.