Lucas 10 - Quechua Ayacucho Bible 1987

Qanchis chunka iskayniyoq willakuqkunata Jesuspa kachasqanmanta

¹ Señorqa akllaykurqataqmi qanchis chunka iskayniyoq runakunatapas, paykunatam ñawpachirqa maymi rinan llaqtakunaman hinaspa llaqtachakunaman.

² Paykunatam nirqa: —Achkallañam kachkan cosechanapaqqa, cosechaqkunam ichaqa aslla, chaynaqa mañakuychikyá chakrayoqta cosechaqkunata kachananpaq.

³ Riychikyá, atoqkunapa kasqanman carnerokunata kachachkaq hinam qamkunata kachachkaykichik.

⁴ Amayá apaychikchu qollqetaqa, wayqataqa hinaspa mudana *f**usutataqa, ñanpiqa amataqmi pitapas rimaykunkichikchu.

⁵ Chayasqaykichik wasiman yaykuspaqa: “Hawkayay kachun kay wasipi” nispam rimakuykunkichikmi.

⁶ Wasipi kaqkuna allin runa kaptinqa chay rimaykusqaykichik takyanqa, mana chayna kaptinmi ichaqa rimaykusqaykichikpas mana takyanqachu.

⁷ Yaykusqaykichik wasillapim kankichik, imam qosusqallaykichiktam mikunkichikpas hinaspa tomankichikpas. Llamkaqqa pagontam chaskinan. Amamá wasin-wasinqa purinkichikchu.

⁸ Chayasqaykichik llaqtapi chaskisuptikichikqa qosusqaykichiktam mikunkichik.

⁹ Chaypi onqoqkunata sanoyachispam willakunkichik: “Diospa munaychakusqanqa hichpallaykichikpiñam kachkan” nispa.

¹⁰ Chayasqaykichik llaqtapi mana chaskisuptikichikñataqmi callenta rispa ninkichik:

¹¹ “*f**Usutaykupi kaq kay llaqtapa allpantam contraykichikpi taspiniku. Chaywanpas yachaychikyá, Diospa munaychakusqanqa hichpallaykichikpiñam kachkan” nispa.

¹² Nikichikmi, juicio punchawpiqa Sodoma llaqtamantapas aswan castigasqaraqmi kanqa chay llaqtaqa.

Jesuspa ñakasqan llaqtakunamanta

¹³ —¡Imaynaraq kanki Corazín llaqta! ¡Imaynaraq kanki Betsaida llaqta! Sichum Tiro llaqtapi hinaspa Sidón llaqtapi qamkunawan rurasqayta hina *f**milagrokunata rurayman karqa hinaptinqa unayñach sinchita llakikuspanku huchankumanta wanakunmanku karqa.

¹⁴ Chayraykum juicio punchawpiqa Tiropi chaynataq Sidonpi *f**yachaqkunamantapas aswanraq castigasqa kankichik.

¹⁵ Capernaum llaqta ¿creenkichum hanaq pachaman hoqarisqa kayta? Uraykachisqam kanki uku pachakama.

¹⁶ —Qamkunata kasuq runaqa ñoqatam kasuwan. Qamkunata despreciaqqa ñoqatam despreciawan. Despreciawaqniyñataqmi kachamuwaqniyta desprecian.

Qanchis chunka iskayniyoq willakuqkunapa kutimusqanmanta

¹⁷ Qanchis chunka iskayniyoq runakunam kusisqallaña kutiramuspa willakurqaku: —Señor, sutikipiqa demoniokunapas kasuwankum —nispa.

¹⁸ Chaymi Señorñataq nirqa: —Arí, *f**Satanastam rikurqani rayo hina cielomanta wichimuqta.

¹⁹ Atiytam qoykichik culebrakunata hinaspa atoq-atoqkunata sarunaykichikpaq chaynataq enemigopa atiynin vencenaykichikpaqpas, manam imapas imanasunkichikchu.

²⁰ Amayá kusikuychikqa demoniokuna kasususqaykichikmantachu aswanqa hanaq pachapi sutikichik qellqasqa kasqanmantayá.

Anchallataña Jesuspa kusikusqanmanta

²¹ Chay ratollapim Chuya Espiritupa yanapakuyninwan kusikuspan Jesus nirqa: —Hanaq pachapipas kay pachapipas munaychakuq Taytáy, kay yachaykunatam pakaykurqanki yachayniyoqkunamantawan entiendeqkunamanta hinaspam qawaykachinki pisi yachayniyoqkunamanña, chayraykum alabayki. Arí, Taytáy, qanmi munarqanki chaynata.

²² —Taytaymi qoykuwarqa tukuy imakunata. Ñoqa Churitaqa manam pipas reqsiwanchu aswanqa Taytallaymi. Manataqmi Taytaytaqa pipas reqsinchu aswanqa ñoqa Churillanmi, Churipa reqsichisqallantaqmi reqsin Taytataqa.

²³ Discipulonkunaman asuykuspanmi paykunallaman nirqa: —Mayna kusisqam kay qawasqaykichikta qawaqkunaqa.

²⁴ Diosmanta achkaq willakuqkunam reykunapiwan rikusqaykichikta rikuyta munarqaku, ichaqa manam rikurqakuchu, uyarisqaykichiktapas uyariytam munarqaku ichaqa manam uyarirqakuchu.

Samaria lawmanta kaq runapa allin rurasqanmanta

²⁵ Diospa leynin yachachiq runam Jesusta pruebananpaq sayariykuspa tapurqa: —Yachachikuq ¿imata ruraspaytaq wiñay kawsayta haypayman? —nispa.

²⁶ Chaymi Jesusñataq nirqa: —¿Ima nichkantaq leypiqa? ¿Ima niqtataq leenki? —nispa.

²⁷ Hinaptinmi chay runañataq nirqa: —“Señor Diosnikitam kuyanki tukuy sonqoykiwan, tukuy vidaykiwan, tukuy kallpaykiwan hinaspa tukuy yuyaynikiwan, kuyankitaqmi runamasikitapas kikikita hina” nispa.

²⁸ Chaymi Jesusñataq nirqa: —Allintam nirunki, chaynatayá ruray hinaspaqa wiñaypaqmi kawsanki —nispa.

²⁹ Payñataqmi pim runamasin kasqanta mana reqsiq tukuspan yapatawan tapurqa: —¿Pitaq runamasiyqa? —nispa.

³⁰ Chaymi Jesusñataq nirqa: —Huk kutipim Jerusalenmanta Jerico llaqtaman huk runa richkarqa. Paytam suwakuna saltearuspa pachallantapas llatanarurqaku, maqaparuspam wañunayachkaqtaña saqerurqaku.

³¹ Chay ñanninta huk *f**sacerdote richkaspanmi chay runata rikururqa aswanqa qawariykuspallanmi karullanta pasarurqa.

³² Leviy casta runapas chay sitioman chayaruspanmi qawariykuspallan karullanta pasarurqa.

³³ Chaynintataqmi rikchkarqa Samaria lawmanta kaq runapas, paymi ichaqa asuykuspan llakipayarikurqa.

³⁴ Asuykuspanmi aceitewan hinaspa vinowan heridankunata hampiykurqa. Sillakunan animalman churkuykuspanmi samakuna wasiman aparqa hinaspam chaypi atienderqa.

³⁵ Paqarinnintin pasakunanpaq kaspanñataqmi onqoqta atiendeykunanpaq wasiyoqman iskay jornalpa chanin qollqeta qoykurqa hinaspam ruegakurqa: “Atiendeykapullawankimá, mastapas gastaptikiqa kutimuspaymi pagapullasqayki” nispa.

³⁶ Chaynata Jesus niruspanmi chay tapuqninta nirqa: —¿Chay kimsan runamantaqa mayqannintaq salteasqapa runamasinqa? —nispa.

³⁷ Hinaptinmi Diospa leynin yachachiq runañataq nirqa: —Salteasqa runamanta kuyapayarikuqmi —nispa. Chaymi Jesusñataq nirqa: —Qampas chaynatayá ruramuy —nispa.

Mariapa hinaspa Martapa wasinpi Jesus tarikusqanmanta

³⁸ Richkaspankum huk llaqtachaman chayarurqaku, chay llaqtapim Marta sutiyoq warmi wasinpi samaykachirqa.

³⁹ Martapa ñañan Mariañataqmi Jesuspa ñawpaqninpi tiyaykurqa rimasqanta uyarinanpaq.

⁴⁰ Martañataqmi tukuy ima ruraypa atipasqan kaspa Jesusman asuykuspa nirqa: —Señor ¿manachum imapas qokusunki sapallay ruraqta ñañay qawakuwaptin? Niyá yanapawananpaq —nispa.

⁴¹ Chaymi Señorñataq nirqa: —Marta, Marta, tukuy imapa atipasqanmi muspaypi hinaña kachkanki tukuy imawan.

⁴² Hukllam ruranaykiqa kachkan, chay allin kaqtam ñañayki Mariaqa akllakuykun, chaytaqa manam pipas qechunqachu.