Levítico 9 - Quechua Ayacucho Bible 1987

Sacerdote kayninta Aaron qallarisqanmanta

¹ Pusaq kaq punchawpim Moises qayarqa Aarontawan churinkunata chaynataq Israel casta ancianokunatapas.

² Paymi Aaronta nirqa: —Hucha pampachanapaq pusamuy huk sano malta torota, pusamuytaq lliwta kañanapaq sano carnerotapas chaynapi Tayta Diosman presentanaykichikpaq.

³ Israelpa mirayninkunatayá niy hucha pampachanapaq kaq chivatota pusamunankupaq, pusamuchunkutaqyá malta torotapas chaynataq malta carnerotapas. Chaykunaqa kanqa lliw kañanapaq huk watayoq sano animalkunam.

⁴ Wañuchinapaqyá pusamuchunkutaq huk bueyestapas chaynataq huk carnerotapas. Chaykunataqa Tayta Diospa qayllanpimá wañuchinqaku paywan allinlla kasqankumanta ofrendapaq. Apamunqakutaqmi aceitewan chapusqa kawsaykunamanta ofrendatapas. Tayta Diosmi kunan rikuriykusunkichik —nispa.

⁵ Chay ancianokunam aparqaku Moisespa kamachisqanman hina Tayta Diosman asuykuna karpapa punkunman, huñunakurqakutaqmi llapallan runakunapas hinaspam chaypi karqaku Tayta Diospa qayllanpi.

⁶ Hinaptinmi Moises nirqa: —Kaytamá Tayta Dios kamachikun ruranaykichikpaq hinaptinqa paypa achkiriyninmi rikuriykusunkichik —nispa.

⁷ Chaymantam Aaronta Moises nirqa: —Altarman asuykuspa presentay hucharayku ofrendaykita chaynataq lliw kañanapaq animaltapas, chaynapim huchaykipas chaynataq runakunapa huchanpas pampachasqa kanqa. Runakunapa ofrendantapas presentaytaqyá huchanku pampachasqa kananpaq, chaynataqa presentanki Tayta Diospa kamachisqanpi hinamá —nispa.

⁸ Chaymi Aaron asuykurqa altarman hinaspam malta torota wañuchispan presentarqa huchan pampachasqa kananpaq.

⁹ Hinaptinmi Aaronpa churinkuna apamurqaku yawarta chaymi Aaron yawarman dedonta challpuykuspan altarpa waqrachankunaman llusirqa, puchuq yawartañataqmi altarpa sikinman talliykurqa.

¹⁰ Chaymantam altarpi kañarqa hucha pampachanapaq animalpa wirankunatawan rurunninkunata chaynataq kichpanninpi wiratapas, chaynataqa rurarqa imaynam Moisesman Tayta Diospa kamachisqanpi hinam.

¹¹ Aychantawan qarantañataqmi campamentomanta horqospan kañarurqa.

¹² Aaronqa wañuchirqataqmi lliw kañanapaq animaltapas hinaptinmi Aaronpa churinkuna apamurqaku yawarta chaymi pay challarqa tukuy altarman.

¹³ Chaymantañataqmi Aaronman apamurqaku chay lliw kañananpaq animalta, chaytaqa apamurqaku piezan-piezan kuchusqatam umantawan kuskata hinaptinmi Aaron altarpi kañarqa.

¹⁴ Chaymantam mayllarqa chunchulninkunatawan piernankunata hinaspam kañarurqa altarpi lliw kañanapaq animaltawan kuskata.

¹⁵ Aaronqa presentarqataqmi runakunapa ofrendantapas. Runakunapa huchan pampachasqa kananpaq chivatota hapiykuspamá wañurachirqa hinaspam presentarqa imaynam kikinpaq presentasqan ofrendata hina.

¹⁶ Lliw kañana animaltapas presentarqam Diospa kamachisqanman hina.

¹⁷ Presentarqataqmi kawsaykunamanta ofrendatapas. Chay ofrendamantam huk aptayta hapiykuspan altarpi kañarqa tempranonpi lliw kañana animaltawan kuskata.

¹⁸ Aaronqa wañuchirqataqmi bueyestawan carnerotapas, chaykunaqa karqa Dioswan allinlla kasqankumanta runakunapa ofrendanmi. Aaronpa churinkuna yawarta qoptinmi payñataq challarqa altarman chaynataq altarpa muyuriqninmanpas.

¹⁹ Aaronmanmi qorqaku toropa hinaspa carneropa wirankunata, chupanta, chunchulninpi wirankunata, rurunninta chaynataq kichpanninpi wayurayaqnintapas.

²⁰ Aaronmi churarqa animalkunapa pechonkunapa hawanman hinaspam wirankunata kañarurqa altarpi.

²¹ Pechonkunatawan *f**alleq piernankunatañataqmi Tayta Diosman Aaron presentarqa presentananku ofrendata hina. Chaynataqa presentarqa Moisesman imaynam Tayta Diospa kamachisqanpi hinam.

²² Chaymantañataqmi Aaronqa runakuna lawman makinta hoqarispan paykunapaq Tayta Diospa bendecionninta mañakurqa hinaspam hucha pampachanapaq animalta, lliw kañana animalta hinaspa Dioswan allinlla kasqankumanta animalta presentaruspan altarmanta uraykurqa.

²³ Chaymantam Moiseswan Aaron yaykurqaku Diosman asuykuna karpaman, lloqsiramuspankuñataqmi runakunapaq Diospa bendicionninta mañakurqaku hinaptinmi Tayta Diospa achkiriynin rikuriykurqa llapallan runakunaman.

²⁴ Hinaptinmi lenguachkaq nina lloqsiramurqa Tayta Diospa qayllanmanta hinaspam ruparurqa lliw kañana animaltawan altarpi wirakunata. Chayta llapallan runakuna qawaykuspankum kusikuymanta qaparispa pampaman pakchakuykurqaku.