Levítico 8 - Quechua Ayacucho Bible 1987

Sacerdote kanankupaq Aaronpiwan churinkuna nombrasqa kasqankumanta

¹ Tayta Diosmi kaynata nirqa:

² —Aarontawan churinkunata pusamuspayá apamuytaq paykunapa pachantapas, untana aceitetapas, hucharayku wañuchinapaq malta torotapas, iskay carnerotapas chaynataq canastapi mana qonchuyoq tantakunatapas.

³ Huñuytaqyá runakunatapas ñoqaman asuykuna karpapa punkunman—nispa.

⁴ Moisesmá rurarqa Tayta Diospa kamachisqanman hina hinaptinmi runakuna huñunakururqa Diosman asuykuna karpapa punkunman.

⁵ Chaymi Moises nirqa huñunasqa runakunata: —Kayta ruranapaqmi Tayta Dios kamachikun —nispa.

⁶ Chaymi Moises asuykachirqa Aarontawan churinkunata hinaspam bañachirqa.

⁷ Chaymantam Aaronta hinaykachirqa camisonwan, weqawnintañataqmi wataykurqa chumpiwan, hina hawanmanñataqmi pachachirqa sotanawan. Chaypa hawanmanñataqmi churachirqa Efodta hinaspam watarqa Efodpa watunwan teqoneqta.

⁸ Chaykunapa hawanmanñataqmi churachirqa pecherata, pecherapim hinarqa Urim rumitawan Tumim rumita.

⁹ Chaymantam Aaronpa umanta wankirqa uma wankinawan, chaypa hawanmanñataqmi churarqa urkun lawpi “DIOSPAQ SAPAQCHASQA” niq qorimanta letrerota, chaytaqa churarqa Moisesman Tayta Diospa kamachisqanpi hinam.

¹⁰ Chaymantam Moisesqa hapiykurqa untana aceiteta hinaspam tallirqa carpamanwan chaypi tukuy ima kaqkunaman, chaynapimá Diospaq sapaqcharqa.

¹¹ Hina chay aceitewantaqmi altarpa hawanmanpas challarqa qanchis kutikama, tallirqataqmi altarmanpas, chaypi llapallan servicionkunamanpas chaynataq lavatoriomanpas tiyanantinman. Chaynapimá Diospaq sapaqcharqa.

¹² Chaymantam untana aceiteta talliykurqa Aaronpa umanman. Chaynapimá Diospaq sapaqcharqa.

¹³ Chaymantañataqmi Moises asuykachirqa Aaronpa churinkunata hinaspam pachaykachirqa camisonkunawan, weqawninkutapas wataykarirqataqmi chumpikunawan hinaspam churaykachirqa uma watankutapas imaynam Moisesman Tayta Diospa kamachisqanpi hina.

¹⁴ Chaymantam Moises pusarachimurqa hucharayku wañuchinapaq malta torota hinaptinmi Aaronpiwan churinkuna makinkuta churaykurqaku hucharayku wañuq malta toropa umanman.

¹⁵ Moisesñataqmi wañurachispan, chay animalpa yawarninta chaskiykurqa hinaspam dedonta challpuykuspan llusirqa altarpa lliw waqrankunata. Chaynatamá Diospaq sapaqcharqa chay altarta. Yawar puchuqtañataqmi talliykurqa altarpa sikinman, chaynatam altarta Diospaq sapaqcharqa chaynapi chay altarpi runakunapa huchankuna pampachasqa kananpaq.

¹⁶ Chaymantam Moises altarpi kañarqa animalmanta horqosqan llapallan chunchulninkunapi kaq wirankunata, kichpanninpi wirata, rurunninkunata chaynataq rurunninkunapi kaq wirakunatapas.

¹⁷ Ichaqa malta toropa qarantawan aychantaqa akantawan kuskatam kañarurqa campamentomanta horqospan, chaynataqa rurarqa Tayta Diospa kamachisqanpi hinam.

¹⁸ Chaymantañataqmi Moises aparachimurqa lliw kañanapaq carnerota hinaptinmi Aaronpiwan churinkuna chay carneropa umanman churaykurqaku makinkuta.

¹⁹ Moises wañurachispanmi yawarninta challaykurqa tukuy altarman.

²⁰ Chay carnerotam kuchuparurqa piezan-piezan hinaspam kañarqa umanta, aychanta chaynataq wirankunatapas.

²¹ Chaymantam mayllarurqa carneropa chunchulninkunatawan piernankunata hinaspam altarpi kañarurqa llapallanta. Chayqariki Tayta Diospaq miskillaña asnariq lliw kañana ofrendam. Chaynatamá Moisesman Tayta Dios kamachirqa.

²² Moisesqa aparachimurqataqmi sacerdote nombrasqa kananpaq ofrecena huknin carnerotapas hinaptinmi Aaronpiwan churinkuna makinkuta churarqaku chay carneropa umanman.

²³ Chay carnerota Moises wañurachispanmi yawarninta chaskiykuspan Aaronpa *f**alleq rinrinpa ura patachanta llusiykurqa, llusiykurqataqmi alleq makinpa maman dedontapas chaynataq alleq chakinpa maman dedontapas.

²⁴ Chaymantam Aaronpa churinkunata asuykachispan chay yawarwan llusirqa alleq rinrinkupa ura patachanta, llusiykurqataqmi alleq makinkupas maman dedontapas chaynataq alleq cahkinkupa maman dedontapas hinaspam puchuq yawarwanñataq challaykurqa tukuy altarman.

²⁵ Chaymantam Moisesqa hapiykurqa chay carneropa wiranta, chupanta, chunchulninpi llapallan wirankunata, kichpanninpi wirata, iskaynin rurunninkunata, rurunninkunapi kaq wirankunata hinaspa *f**alleq piernantapas.

²⁶ Tayta Diospa qayllanpi mana qonchuyoq tanta canastamantam Moises horqoykurqa huknin mana qonchuyoq tortillata, aceitewan rurasqa tantata hinaspa huk galletatawan. Chaykunatam churaykurqa carneropa wiranpa hinaspa piernanpa hawanman.

²⁷ Hinaspam qoykurqa Aaronmanwan churinkunaman hinaptinmi paykunañataq kuyuchispa Tayta Diosman presentarqaku. Chayqariki Tayta Diosman kuyuchispa presentananku ofrendam.

²⁸ Tukuy chaykunatam Moises chaskiykurqa paykunapa makinmanta hinaspam kañarqa altarpi lliw kañana ofrendatawan kuskata. Chayqariki karqa sacerdote nombrasqa kanankupaq Tayta Diospaq miskillaña asnariq ofrendam.

²⁹ Chaymantam Moisesqa hapiykurqa carneropa pechonta hinaspam kuyuchispa Tayta Diosman presentarqa. Chayqariki Tayta Diosman kuyuchispa presentananku ofrendam. Sacerdote nombrasqa kanankupaq ofrendamanta horqosqa pechonmi Moisesman tocarurqa imaynam Tayta Diospa kamachisqanpi hina.

³⁰ Moisesqa hapiykurqataqmi untanapaq aceitetawan altarpa hawanpi yawartapas, chaykunawanmi challaykurqa Aaronmanwan churinkunaman, challaykurqataqmi paykunapa pachankunamanpas. Chaynatamá Aaronta hinaspa churinkunata Tayta Dios sapaqcharqa, sapaqcharqataqmi llapalllankupa pachankutapas.

³¹ Moisesmi nirqa Aarontawan churinkunata: —Aychatayá yanuychik Tayta Diosman asuykuna karpapa punkunpi hinaspayá chayllapi mikuychik sacerdote nombrasqa kanaykichikpaq, mikunkichikqa canastapi tantatawan kuskatam. Chaynataqa rurankichik “Aaronmi churinkunapiwan mikunqa” nispa qamkunata kamachisqaypi hinam.

³² Puchuqnin aychatawan tantataqa kañarunkichikmi.

³³ Tayta Diosman asuykuna karpapa punkunmantaqa amam asurinkichikchu qanchisnintin punchaw, chayna punchawkunapim sacerdote nombrasqa kasqaykichik cumplikunqa.

³⁴ Chay kunan rurasqaykichiktaqa Tayta Diosmi kamachikurqa huchaykichik pampachasqa kananpaq.

³⁵ Chaynaqa Diosman asuykuna karpapa punkunpimá kankichik tuta-punchaw qanchis punchawkama. Tayta Diospa kamachikuynintaqa kasukunkichikmá chaynapi ama wañurunaykichikpaq. Chaynatamá Tayta Dios kamachiwarqa —nispa.

³⁶ Aaronpiwan churinkunam rurarqaku Moisesman Tayta Diospa llapallan kamachisqanta.