Levítico 7 - Quechua Ayacucho Bible 1987

Culparayku ofrendakunamanta

¹ —Culparayku ofrendakunaqa ñoqallapaqña sapaqchasqam, chaynaqa uyariychikyá kay yachachisqayta:

² Culparayku ofrecewasqanku animaltaqa wañuchinqaku lliwta kañana animal wañuchinanku lugarpim, culpable kasqaykichikmanta animalpa yawarnintañataqmi challanqaku tukuy altarman.

³ Ñoqamanmá ofrecewanqaku animalpa lliw wirallaña chupanta, llika wiranta,

⁴ iskaynin rurunninkunata, rurunninkunapi kaq wirankunata, laplanpa hawanpi kaq wirankunata hinaspa kichpanninpi wirantapas. Chaynaqa chay wirankunatamá horqonqa rurunninkunatawan.

⁵ Tukuy chaykunatamá sacerdote kañanqa altarpi, chayqariki culparayku ñoqapaq kañasqa ofrendam.

⁶ Chay ofrendataqa mikunqa sacerdotekunamanta lliw qarikunallam ñoqapaq sapaqchasqanku lugarpi. Chayqariki ñoqallapaqña sapaqchasqa ofrendam.

⁷ —Culparayku ofrendakunaqa hucharayku ofrenda hinapunim, yachachikuyniypas chay iskayninpaqmi hina kaqlla. Hucha pampachanapaq ofrecewasqanku animalpa aychanqa kanqa chay ofrecewaqniy sacerdotepaqmi.

⁸ Pipapas lliw kañana ofrenda animalninta sacerdote ofreceptinqa chay animalpa qaranqa kanqa chay sacerdotepaqmi.

⁹ Hornopi ofrecewaqniy sacerdotepaqtaqmi kanqa kawsaykunamanta mankapi otaq sartenpi rurasqa ofrendakunapas.

¹⁰ Wakin kawsaykunamanta llapallan ofrendaqa Aaronpa mirayninkunapaqmi kanqa, sapakamapaqmi igualkamalla kanqa aceitewan chapusqa kaspapas otaq mana aceitoyoq kaspapas.

Dioswan allinlla kasqanku ofrendamanta

¹¹ —Ñoqawan allinlla kasqaykichikmanta ofrecewanaykichik ofrendamanta yachachikuykunam kaykuna:

¹² Graciasta qowananpaq pipapas ofrendan kaptinqa ofrecewanqam aceitewan chapusqa mana qonchuyoq tortillakunata, aceitewan tallisqa mana qonchuyoq galletakunata chaynataq aceitewan chapusqa fino harinamanta tortakunatapas.

¹³ Graciasta qospa ñoqawan allinlla kasqanmanta tortakunata presentaspaqa qonchuyoq tortakunata yapaykuspam presentawanqa.

¹⁴ Sapa chay ofrendakunapa huknintam rakispan pagachkaq hina ñoqa Tayta Diosman presentawanqa. Chayqa kanqa ñoqawan allinlla kasqanmanta animalpa yawarnin challaq sacerdotepaqmi.

¹⁵ —Graciasta qospa ñoqawan allinlla kasqankumanta ofrenda animalpa aychantaqa chay punchawllam mikurunqaku, amam puchunqakuchu paqarinnin punchawpaqqa.

¹⁶ Sichu pipapas kanqa prometekusqan cumplinanpaq ofrendan otaq voluntadninmanta ofrendan hinaptinqa chay punchawmi mikunqa, puchuruptinñataqmi paqarinnintin punchawña mikunqa.

¹⁷ Ichaqa chay ofrendapa aychan minchakama puchuruptinqa kañasqam kanqa.

¹⁸ Ñoqawan allinlla kasqanmanta ofrenda aychata minchantinña pipas mikuruptinqa chay ofrendaqa mana valeqña kaspam millakuypaq kanqa, chay aycha mikuruqñataqmi huchayoq kanqa.

¹⁹ —Imapas millakuypaq kaqman tupaq aychatapas amam mikunkichikchu, chayna aychaqa kañasqam kanqa. —Aychataqa mikunqaku ñoqaman asuykunanpaq hina kaq llapan runam.

²⁰ —Ñoqawan allinlla kasqanmanta ñoqa Tayta Diospaq wañuchisqa animalpa aychanta, pipas ñoqaman mana asuykuwananpaq hina kachkaspan mikuruq runaqa ayllunkunamanta chinkachisqam kanqa.

²¹ —Runapa cuerponmanta mana llachpana kaqta llachpaq runaqa otaq mana mikuna animalpa cuerponmanta mana llachpana kaqta llachpaq runaqa otaq imapas millakuypaq kaqta llachpaq runaqa ñoqaman mana asuykuwananpaq hinañam kachkan. Chay runaqa ñoqawan allinlla kasqanmanta wañuchisqa animalpa aychanta mikuruspaqa ayllunkunamanta chinkachisqam kanqa.

Wiratawan yawarta mana mikunamanta

^22-23 Israelpa mirayninkunaman Moises ninanpaqmi Tayta Dios kaynata nirqa: —Amam mikunkichikchu bueyeskunapa, carnerokunapa hinaspa cabrakunapa wirantaqa.

²⁴ Imapas huk rikchaqpim servikunqa kikillanmanta wañuq animalpa wiranqa chaynataq purun animalpa wañuchisqan animalpa wiranpas, chay wirakunataqa amamá mikunkichikchu.

²⁵ —Ñoqa Tayta Diosman kañapuwasqanku ofrenda animalpa wiran mikuqqa ayllunkunamanta chinkachisqam kanqa.

²⁶ —Maypiña kaspaykichikpas amam mikunkichikchu raprayoq animalpa yawarnintaqa nitaq ima animalpa yawarnintapas.

²⁷ Ima animalpapas yawarnin mikuq runaqa ayllunkunamanta chinkachisqam kanqa.

Sacerdotekunaman tupaq ofrendamanta

^28-29 Israelpa mirayninkunaman Moises ninanpaqmi Tayta Dios kaynata nirqa: —Ñoqawan allinlla kasqanmanta pipas animal ofrecewaqniyqa, chay ofrendanmantamá wakinta ñoqa Tayta Diosman apamuwanqa.

³⁰ Chay ofrendankunata kikinpuni apamuwaspanmi ñoqa Tayta Diospaq kañapuwanqa. Kuyuchispanmá presentawanqa animalpa wirantapas chaynataq pechontapas. Chayqariki kuyuchispa presentawananku ofrendam.

³¹ Chay animalpa wirantaqa sacerdotem kañapuwanqa altarpi, pechonñataqmi kanqa Aaronpaqwan churinkunapaq.

³² Ñoqawan allinlla kasqaykichikmanta ofrecewasqaykichik animalpa *f**alleq piernantaqa qonkichik sacerdotemanmi. Chayqariki sacerdoteman paganaykichik ofrendam.

³³ Chay animalpa *f**alleq piernantamá qonkichik ñoqawan allinlla kasqaykichikmanta animalpa yawarnin hinaspa wiran presentawaqniy sacerdoteman.

³⁴ Israelpa mirayninkuna ñoqawan allinlla kasqankumanta animalta ofrecewaptinkum horqonki kuyuchispa presentawananku pechon ofrendata chaynataq sacerdoteman pagananku piernan ofrendatapas. Chaytaqa rurankichik Aaronpaqwan mirayninkunapaq imaynam wiña-wiñaypaq decretoyman hinam.

³⁵ Chaynaqa Tayta Diospaq kañasqa ofrendakunamanta kaqmi Aaronpaqwan mirayninkunapaq tupaqnin kanqa, chaynaqa kanqa Tayta Diospa sacerdotenkunaña kanankupaq presentasqa kasqanku punchawmantapunim.

³⁶ Tukuy chaykunata qonankupaqmi sacerdotekuna aceitewan tallisqa kasqanku punchawmantapuni Tayta Dios kamachirqa Israelpa mirayninkunata. Chay decretoqa qosqa karqa wiña-wiñaypaqmi.

³⁷ Chaykunam karqa lliw kañana animal ofrendamanta yachachikuy, kawsaykuna ofrendamanta yachachikuy, hucharayku wañusqa ofrendamanta yachachikuy, culparayku wañuchisqa ofrendamanta yachachikuy, sacerdote nombranapaq ofrendamanta yachachikuy hinaspa Dioswan allinlla kasqankurayku wañuchisqa ofrendamanta yachachikuy.

³⁸ Chaykunatam Tayta Dios kamachirqa Moisesman Sinai Orqopi, chaynapi Israelpa mirayninkuna ofrendankuta Tayta Diosman Sinai sutiyoq chunniqpi presentanankupaq.