Levítico 26 - Quechua Ayacucho Bible 1987

Kasukuqkunataqa Dios favorecesqanmanta

¹ —Amam taytacha-mamachakunataqa rurankichikchu nitaq chayman rikchakuqtapas. Amataqmi sayachinkichikchu rumimanta pilarkunatapas nitaq rumimanta tallasqa taytachakunatapas. Chaykunapa qayllanpiqa amataqmi qonqorakunkichikchu. Ñoqaqa kani yupaychasqaykichik Tayta Diosmi.

² —Samankichikpunim samana punchawniykunapiqa hinaspam repetankichiktaq santuarioytapas. Ñoqa Tayta Diosmi chaynata nini.

³ —Sichu decretoykunaman hina kawsaspa kamachikuyniykunatapas kasukuptikichikqa

⁴ ñoqam parachimusaq tiempollanpi hinaptinmi chakraykichikpi kawsaynikichikpas qespinqa, rurunqataqmi fruta sachaykichikkunapas.

⁵ Kawsaykuna cosechasqaykichikpas haypanqam uvas pallaykama, uvas pallaynikichikñataqmi haypanqa tarpuykama hinaptinmi mikunkichik saksanaykichikkama, allpaykichikpipas hawkallam *f**yachakunkichik.

⁶ Ñoqaqa nacionnikichikpim hawka kawsakuyta qosqaykichik hinaptinmi puñuspapas puñukunkichik mana pipa manchachisqan. Nacionnikichikmantaqa chinkachisaqtaqmi manchakuypaq monte animalkunatapas, manañam guerrapas chaypiqa kanqachu.

⁷ Qatikacharunkichikmi enemigoykichikkunatapas hinaspam wañuchinkichik guerrawan.

⁸ Pichqallam qamkunaqa qatikacharunkichik pachak enemigoykichikta. Pachakñataqmi qatikacharunkichik chunka waranqata. Chaynatam enemigoykichiktaqa wañuchinkichik guerrawan.

⁹ Ñoqam yanapasqaykichik hinaspam mirachisqaykichik achka-achkallaña kanaykichikkama. Chaynapim qamkunawan contratoytapas cumplisaq.

¹⁰ Ñawpaq watapi kawsaykuna churasqaykichiktam mikunkichik. Chay ñawpaq kawsaykunata horqospaykim mosoq kawsaykunataña waqaychanki.

¹¹ —Qamkunawan *f**yachaspaymi manaña millakusqaykichikchu.

¹² Qamkunapa chawpikichikpi purispaymi Diosnikichik kasaq, qamkunañataqmi kankichik ñoqapa runaykuna.

¹³ Yupaychasqaykichik ñoqa Tayta Diosmi horqomurqaykichik Egipto nacionmanta manaña paykunapa sirvienten kanaykichikpaq. Yugota pakipachkaq hinam sirviente kasqaykichikmanta libramurqaykichik hinaspam uma hoqarisqataña purichirqaykichik libre kasqaykichikrayku.

Mana kasukuqkunapa contranpi Diospa rimasqanmanta

¹⁴ —Sichu mana kasuwaspaykichik kamachisqaykunata mana cumpliptikichikqa

¹⁵ chaynataq decretoykunatapas qepanchakuspa reglamentoykunatapas cheqniptikichikqa chaynataq kamachisqaykunatapas mana cumplinaykichikpaq contrato rurasqaytapas mana cumpliptikichikqa

¹⁶ ñoqapas qamkuna ukupim rikurirachisaq manchapakuyta, wañuchikuq onqoykunata, calenturata, ñawi onqoyta chaynataq eqoyayta. Chaynaqa yanqapaqmi tarpunkichikpas, tarpusqaykichiktapas enemigoykichikmi mikukunqa.

¹⁷ Ñoqam contraykichikpi kasaq hinaptinmi enemigoykichikpas vencesunkichik. Cheqnisuqnikichik runakunam munaychakusunkichik, mana pipapas qatikachasqantaqmi ayqenkichik.

¹⁸ —Chaykunawanpas mana kasuwaptikichikqa ñoqapas castigasqaykichikmi qanchis kutikama huchaykichikkunamanta.

¹⁹ Rumi sonqo kaspa orgulloso kaynikichiktapas yanqacharusaqmi. Cielokunapas fierro hinaña rikuriruptinmi mana parachimusaqchu, chaynapim allpaykichikpas bronce hinaña rikurirunqa.

²⁰ Yanqam kallpapas ususqa llamkankichik. Chakraykichikpiqa manam imapas qespinqachu nitaqmi lliw nacionnikichikpi fruta sachaykichikkunapas rurunqachu.

²¹ —Chaywanpas contraypi kaspa mana kasuwaptikichikqa ñoqapas huchallikusqaykichikman hinam castigasqaykichik qanchis kutikama.

²² Kachaykamusaqtaqmi manchakuypaq monte animalkunatapas hinaptinmi churi-wawaykichikkunata pasaypaqta tukurunqa, animalnikichikkunatapas tukurunqam. Chaynapim aschallaña rikuriruptikichik ñannikichikpas chunnirunqaña.

²³ —Chay castigokunawan mana wanakuspa hinalla contraypi kaptikichikqa

²⁴ ñoqapas contraykichikpim kasaq hinaspam castigasqaykichik huchaykichikmanta aswan qanchis kutikamaraq.

²⁵ Contratoy mana kasusqaykichikmantam guerrawan castigasqaykichik. Guerramanta llaqtaykichikman ayqeptikichikpas peste onqoytam kachaykamusqaykichik. Qamkunaqa enemigoykichikkunaman entregasqam kankichik.

²⁶ —Mikunaykichik kawsaykunata chinkarachiptiymi chunka warmikuna chulla hornollapi tantata ruraspanku medisqallata qosunkichik, ichaqa manam saksankichikchu.

²⁷ —Chaykunawanpas mana kasuwaspa contraypi kaptikichikqa

²⁸ ñoqapas contraykichikpi piñakuspaymi castigasqaykichik huchaykichikmanta aswan qanchis kutikamaraq.

²⁹ Hinaptinmi mikunkichik churi-wawaykichikkunataña.

³⁰ Capillaykichikkunatapas tuñirachisaqmi, pakiparusaqtaqmi incienso kañana altarnikichikkunatapas. Qamkunata cheqnisqayraykum ayaykichikkunatapas montosaq mana kawsaq taytacha-mamachaykichikkunapa hawanman.

³¹ Llaqtaykichikkunatam purmachisaq, tuñichisaqtaqmi santuarioykichikkunatapas. Manañam gustoypaqñachu kanqa miski asnaq ofrendaykichikkunapas.

³² —Purmarachisaqmi nacionnikichikta hinaptinmi admirasqallaña qawanqaku chaypi *f**yachananpaq hamuq enemigoykikunapas.

³³ Qamkunatam cheqerachisqaykichik huklaw nacionkunaman hinaspam qatikachachisqaykichik guerrawan. Nacionnikichikmi chunninqa, purmarunqataqmi llaqtaykichikkunapas.

³⁴ Allpaykichikpas tukuy tiempo purmasqan watakunam samakunqa, samakunqaqa enemigoykichikkunapa nacionninpi kamunaykichikkamam. Chay allpakunaqa samakunqa mana samasqan watakunamantam.

³⁵ Chay allpapiraq *f**yachaspaykichik mana samachisqaykichikmantam chay allpaqa samakunqa chay purmasqan tukuy watakuna.

³⁶ —Qamkunamanta puchuqkuna enemigonkupa allpanpi kaptinkum sonqonkuman churasaq manchakuyta hinaptinmi sachapa rapin wichiykuptillanpas ayqenqaku. Guerramanta ayqechkaq hina ayqespankum mana pipas qatichkaptillan urmanqaku.

³⁷ Mana pipas qatikachachkaptillanmi guerramanta lluptichkaq hina kallpaspanku qonqayta tanqanakuykunqaku. Manam mayqanninkupas enemigonpa qayllanpiqa defiendekuyta atinqakuchu.

³⁸ Huklaw nacionkunapim wañunkichik, enemigoykichikpa nacionninmi mikuypaq-mikurusunkichik.

³⁹ Enemigoykichikpa nacionninpi qamkunamanta puchuqkunapas mana allin rurasqankuraykum ismuypaq-ismurunqaku, abuelonkupa mana allin rurasqankuraykum paykuna hina ismuypaq-ismurunqaku.

⁴⁰ —Mana allin rurasqankumanta chaynataq abuelonkupa mana allin rurasqankumanta reqsikuptinkupas chaynataq traicionawasqankuta hinaspa contraypi kasqankuta reqsikuptinkupas

⁴¹ paykunapa contrankupi kaspaymi enemigonkupa nacionninman pusarachisaq. Chaypim rumi sonqo kayninkupas llampuyamunqa, chaypitaqmi mana allinlla rurasqankumantapas paganqaku.

⁴² Hinaptinñam yuyarisaq Jacobwan, Isaacwan, Abrahanwan contrato rurasqayta. Yuyarisaqtaqmi allpamantapas.

⁴³ Chay allpaqa paykunapa saqerusqanña kaspam purmaspan chayraq samaykunqa. Paykunaqa mana allin rurasqankumantam paganqaku. Paykunaqariki reglamentoykunatapas despreciaspankum decretoykunatapas millakurqakutaq.

⁴⁴ —Chaywanpas enemigonkupa allpanpi kaptinkupas manam ñoqaqa wischupakusaqchu nitaqmi puchukarachinaypaq hinaqa millakusaqchu. Manamá paykunawan contrato rurasqaytaqa yanqachasaqchu. Ñoqaqariki paykunapa yupaychasqan Tayta Diosmi kani.

⁴⁵ Aswanqa paykunapa favorninpi ñawpaq contrato rurasqaytam yuyarisaq. Chay contratotaqa rurarqani paykunapa Diosnin kanaypaqmi. Nacionkunapa yachasqantam ñoqaqa Egipto nacionmanta horqomurqani paykunapa Diosnin kanaypaq. Ñoqa Tayta Diosmi chaynata nini.

⁴⁶ Kaykunam chay decretokuna, reglamentokuna hinaspa yachachikuykuna Moisesnintakama Israelpa mirayninkunaman Tayta Diospa qosqan. Tukuy chaykunataqa Moisesmanmi qorqa Sinai Orqopi.