Levítico 24 - Quechua Ayacucho Bible 1987

Mecherokunapaq aceitemanta

¹ Tayta Diosmi Moisesta kaynata nirqa:

² —Israelpa mirayninkunatayá kamachiy aceitunasmanta allinnin aceiteta apamusunaykipaq, chaywanmi mecherokuna mana wañuq ratanqa.

³ Mecherokunata Aaron alistaykuptinmi tukuy tuta ratanqa Ñoqa Tayta Diospa qayllaypi, chayqa ratanqa baulpa kanan cuarto rakinaq telapa hawa lawninpim. Kay decretoqa kanqa wiña-wiñaypaqmi llapallan miraynikichikkunapaq.

⁴ Qori-puromanta candeleropim mecherokunataqa mana wañuqta ratachinqa chaynapi ñoqa Tayta Diospa qayllaypi achkinanpaq.

Tayta Diospa qayllanpi tantamanta

⁵ —Allinnin harinamantam rurankichik chunka iskayniyoq tantakunata. Chay tantakunaqa sapakamam kanqa tawa kilo parten harinamanta.

⁶ Hinaspam churanki soqtatakama iskay monton patanasqata, chaynataqa churanki qori-puromanta mesapa hawanpim ñoqa Tayta Diospa qayllaypi.

⁷ Sapa monton tantapa hawanmanñataqmi churanki inciensota hinaptinmi tantapa rantinpi chay incienso kanqa ñoqa Tayta Diospaq kañasqa ofrenda.

⁸ Chaytaqa sapa samana punchawmi mana tukuyta churanki ñoqa Tayta Diospa qayllaypi Israelpa mirayninkunawan wiña-wiñaypaq contrato kasqanrayku.

⁹ Chay tantakunaqa kanqa Aaronpaqwan churinkunapaqmi. Paykunam mikunqaku ñoqapaq sapaqchasqa sitiopi. Ñoqa Tayta Diospaq kañanaykichik ofrendakunamantapas aswanraqmi kay ofrendaqa ñoqallapaqña sapaqchasqa kanqa.

Diosta mana respetaqkunapaq castigomanta

^10-11 Israelpa mirayninkuna ukupim karqa huk runa. Paymi karqa Israel castamanta kaq warmipa wawan, taytanñataqmi karqa Egipto lawmanta kaq. Mamanpa sutinmi karqa Selomit, chay Selomit sutiyoq warmiqa karqa Dibripa churinmi, Dibriñataqmi karqa Dan ayllumanta kaq. Chay Selomitpa wawan runam campamentopi churanakurqa Israel castamanta kaq runawan. Chayna churanakusqankupim chay Selomitpa wawan runa Tayta Diospa sutinta yanqachaspan ñakarqa hinaptinmi chay ñakaq runata Moisesman pusarqaku.

¹² Carcelman wichqaruspankum suyarqaku Tayta Diospa imam nisqanta ruranankupaq.

¹³ Hinaptinmi Moisesta Tayta Dios nirqa:

¹⁴ —Horqonkim chay ñakaqniyta campamentomanta hawaman hinaptinmi llapallan uyariqninkuna paypa umanman makinkuta churanqaku hinaptinmi llapallan huñunasqa runakuna rumiwan chamqaparunqaku.

¹⁵ Chaymantam Israelpa mirayninkunata ninki: Pipas Diosnikichikpa sutiyta ñakaqniyqa castigasqam kanqa.

¹⁶ Forastero kaqpas otaq qamkuna ukupi kaqpas ñoqa Tayta Diospa sutiyta ñakaq runaqa wañuchisqam kanqa, paytaqa huñunasqa llapallan runakunam rumiwan choqaparunqaku.

¹⁷ —Pipas runamasinta wañurachispaqa wañuchisqam kanqa.

¹⁸ —Pipas animalta wañurachispaqa dueñonmanmi hina chayna animalta sayachipunqa.

¹⁹ —Pipas runamasinpa cuerponpi imantapas dañaruspanqa paypas cuerponpim dañasqanman hina dañasqa kanqa.

²⁰ Runapa cuerponpi imanpas pakiqtaqa paytapas chaynallatam pakirunqaku, ñawinta horqoruptinqa paypatapas ñawintam horqorunqaku, kirunta wichirachiptinqa paypatapas kiruntam wichirachinqaku, runamasinpa cuerponta dañasqanman hinam chay runapas cuerponpi dañasqa kanqa.

²¹ —Pipatapas animalninta wañurachispaqa sayachipunqam. Runata wañurachiptinmi ichaqa paytapas wañurachinqaku.

²² —Hina chayna sentenciallam kanqa forasteropaqpas chaynataq hinapi naceqpaqpas. Ñoqaqa kani yupaychasqaykichik Tayta Diosmi.

²³ Moisesmi Israelpa mirayninkunata kamachirqa hinaptinmi paykunañataq chay ñakaq runata horqorurqaku campamentomanta hawaman hinaspam rumiwan choqaparurqaku. Chaynatam rurarqaku Israelpa mirayninkuna Moisesman Tayta Diospa kamachisqanpi hina.