Levítico 22 - Quechua Ayacucho Bible 1987

Pikunam Tayta Diospa ofrendantaqa mikunankumanta

^1-2 Aaronman hinaspa churinkunaman ninanpaqmi Moisesta Tayta Dios nirqa: —Qamkunaqa cuidadowanyá ruraychik Israel casta runakunapa sapaqchapuwasqan ofrendakunawanqa chaynapi Chuya Sutiyta ama penqayman churanaykichikpaq. Ñoqa Tayta Diosmi chaynata nini.

³ —Kunanpas hinaspa hamuq punchawkunapipas miraynikichikmanta pipas mana asuykamuwananpaq hina kachkaspan Israel casta runakunapa sapaqchapuwasqan ofrendaykunaman asuykuspanqa ñawpaqniymanta chinkachisqam kanqa. Ñoqa Tayta Diosmi chaynata nini.

⁴ —Chaynaqa, Aaron, pipas miraynikimanta lepra onqoywan kaspaqa otaq qeya ispaywan kaspaqa amam mikunqachu ñoqapaq sapaqchasqa kaqkunataqa, mikuspaqa-mikunqa chuyanchakuruspanñam. —Manataqmi asuykuwanmanchu runapa ayan llachpaq runaqa otaq puñuchkaptin qari kaynimanta imapas kikillanmanta lloqsiptinqa.

⁵ Manataqmi asuykuwanmanchu qasqonpa puriq animal llachpaq runaqa chaynataq imawanpas millakuypaq kaq runata llachparuqpas.

⁶ Pipas chaykunata llachparuq runaqa tutaykuqkamam mana asuykuwanmanchu. Ñoqapaq sapaqchasqa kaqkunataqa amataqmi mikunqachu manaraq bañakuchkaspaqa.

⁷ Inti seqaykuptinñam asuykuwananpaq hina kanqa, chayñam mikuspaqa-mikunqa ñoqapaq sapaqchasqa kaqkunata chaykunaqa paypa mikuynin kasqanrayku.

⁸ Amam mikunqachu kikillanmanta wañuq animalpa aychantaqa nitaq purun animalpa wañuchisqan animalpa aychantapas. Chaykunata mikuspanqa manam asuykuwanmanchu. Ñoqa Tayta Diosmi chaynata nini.

⁹ —Chaynaqa kunasqaykunatayá kasukuchunku chaynapi ama huchallikunankupaq hinaspa chay kunasqaykunata penqayman churaspa ama wañurunankupaq. Ñoqa Tayta Diosmi paykunataqa kikiypaq sapaqchani.

¹⁰ —Amam pipas mana sacerdote kachkaspaqa mikunqachu ñoqapaq sapaqchasqa ofrendaykunataqa. —Amam sacerdotepa samapakuqninpas nitaq llamkapakuqninpas chaytaqa mikunqachu.

¹¹ —Sacerdotepa rantisqan sirvientenmi ichaqa mikunman ñoqapaq sapaqchasqa ofrendataqa, mikunmantaqmi sacerdotepa wasinpi naceq sirvientepas.

¹² —Sacerdotepa warmi churinqa amam mikunqachu sacerdoteman qosqa ofrendamantaqa, chaynataqa ruranqa sacerdote castamanta kaqwan mana casarakusqanraykum.

¹³ Sichu sacerdotepa warmi churin viudayaruspan otaq rakinakusqa karuspan mana wawayoq taytanpa wasinman kutiykuspanqa mikunqam taytanpa mikunanta, chaynataqa ruranqa imaynam warma kaspan mikusqanta hinam. Mana sacerdote castamanta kaqkunaqa amamá mikunqachu chay mikuytaqa.

¹⁴ —Sichu pipas pantaruspan mikurunqa ñoqapaq sapaqchasqa mikuyta hinaspaqa sacerdoteman sayachipuspanmi yapapunqataq pichqa parteman rakisqapa huknin partentapas.

¹⁵ Chaynaqa Israel casta runakunapa ñoqa Tayta Diospaq sapaqchasqanku ofrendaykunataqa amamá sacerdotekunaqa penqayman churanqakuchu.

¹⁶ Chaynaqa Israel casta runakuna chay sapaqchasqa kaqkunata mikuruptinkuqa sacerdotekunam sayachinankupaq culpanqa. Ñoqa Tayta Diosmi chaykunataqa kikiypaq sapaqchani.

Imaynatam animalkunata Tayta Diospaq wañuchinankumanta

^17-18 Aaronman, churinkunaman hinaspa Israelpa llapallan mirayninkunaman ninanpaqmi Moisesta Tayta Dios kaynata nirqa: —Israel casta runakunamanta otaq paykunawan *f**yachaq forasterokunamanta pipas prometekusqanta cumplispan otaq voluntadninmanta lliw kañana ofrendanta presentamuwaspanqa

¹⁹ chaskisqa kananpaqmi sano orqo animalta presentamuwanqa, manam imananchu torota kaspapas otaq carnerota kaspapas otaq chivatota kaspapas.

²⁰ Ichaqa amam presentawanqachu mana sano kaq animaltaqa. Chayna kaptinqa manam chaskisqaykichichu.

²¹ —Ñoqa Tayta Dioswan allinlla kasqanmanta pipas prometekusqan ofrendata presentawaqniyqa otaq voluntadninmanta ofrendan presentawaqniyqa ofrecewanqa sano torotam otaq sano carnerotam, chaskisqa kananpaqqa sano animalmi kanan.

²² Ñoqa Tayta Diosmanqa amamá ofrecemuwanqakuchu ñawsa animaltaqa, chakin pakisqa animaltaqa, imanpas qorusqa animaltaqa, qeyapakuq animaltaqa, seqsipakuyniyoq animaltaqa nitaq qarapakuchkaq animaltaqa. Altarpipas chaykunataqa amamá kañapuwanqachu ofrendakunata hinaqa.

²³ Voluntad ofrendayki kaptinmi ichaqa ofrecewankiman chullan chaki torotapas otaq carnerotapas. Ichaqa prometekusqayki kaptinqa manam chaskisqaykichu.

²⁴ Amataqmi ofrecemuwankichikchu dañasqa runtuyoq animalkunataqa otaq llapisqa runtuyoq animalkunataqa otaq chutasqa runtuyoq animalkunataqa otaq capasqa animalkunataqa. Nacionnikichikpiqa amamá chaynataqa rurankichikchu.

²⁵ Amataqmi forastero runakunamantapas chaskinkichikchu chayna animalkunataqa Diosnikichikpa mikuynin kananpaq, chaykunataqa mana sano animalkuna kasqanraykum mana chaskisqaykichikchu.

Diosman ofrecesqa animalkunataqa imaynatam wañuchinankumanta

²⁶ Tayta Diosmi Moisesta nirqa:

²⁷ —Vacapa otaq ovejapa otaq cabrapa naceruq uñachanqa qanchis punchawraqmi mamanwan kanqa, pusaq punchawmantañam ichaqa ñoqa Tayta Diosman presentaspa kañapuwankichikman.

²⁸ —Amam vacatapas nitaq ovejatapas uñantintaqa chay punchawllaqa wañuchinkichikchu.

²⁹ —Ñoqa Tayta Diosman graciasta qonaykichikpaq animalta wañuchispaqa chaskinaypaq hinam rurankichik.

³⁰ Chay punchawllapi mikuruspam ama puchuchinkichikchu paqarinnintin punchawpaqqa. Ñoqa Tayta Diosmi chaynata nini.

³¹ Kasukuspayá cumpliychik kamachikuyniykunata. Ñoqa Tayta Diosmi chaynata nini.

³² —Chuya sutiytaqa amam penqayman churankichikchu chaynapim Israelpa mirayninkunapi chuya kasqayta yachankichik. Ñoqa Tayta Diosmi chaynata nini.

³³ Ñoqam Egipto nacionmanta horqomurqaykichik Diosnikichik kanaypaq. Ñoqa Tayta Diosmi chaynata nini.