Levítico 21 - Quechua Ayacucho Bible 1987

Sacerdotekuna imaynam ruranankumanta

¹ Tayta Diosmi nirqa Moisesta: —Aaronpa miraynin sacerdotekunatayá niy ayllunkumanta pipas wañuruptinqa ama asuykunankupaq. Chaynata ruraspaqa manam asuykuwanmankuchu.

² Ayamanqa asuykuspaqa-asuykunmanku mamanpas, taytanpas, churinpas wawqenpas

³ otaq paywan *f**yachaq doncella paninpas wañuruptillanmi. Mana qosayoq kasqanraykum paypa ayanmanqa asuykunman, chayna casokunallapim sacerdoteqa mana asuykuwananpaq hina rurakunman.

⁴ Huk kaqnin casado familian wañuruptinmi ichaqa ayanman mana asuykunmanchu, sichu asuykuspanqa ñoqamanqa amam asuykuwanqachu.

⁵ —Amam umankutaqa kachiy-kachiytaqa rutukunqakuchu nitaqmi barbankupa puntantapas kaptakunqakuchu. Amataqmi cuerponkutapas dañanqakuchu.

⁶ Paykunaqa ñoqallapaqña sapaqchasqam kanqaku, chayraykum sutiytapas ama penqaymanqa churanqakuchu. Paykunaqa ñoqa Tayta Diospa kañasqa ofrendaykunatawan mikunaytam presentawanku. Chaynaqa ñoqallapaqña sapaqchasqamá kanqaku.

⁷ —Chuchumika warmiwanqa otaq abusasqa warmiwanqa otaq rakinakusqa warmiwanqa amam casarakunqakuchu. Sacerdotekunaqa ñoqallapaqña sapaqchasqam kananku.

⁸ Qamkunayá Israelpa miraynin sacerdotekunataqa ñoqallapaqña sapaqchaychik. Paykunaqa ñoqa Diosnikichikman mikunay ofrecewaqniymi. Paykunataqa sapaqchasqapaqmá hapinkichik, chaynataqa rurankichik qamkunata chuyanchaq ñoqa Tayta Diospas chuya kasqayraykum.

⁹ —Sacerdotepa warmi churin penqayman churakuspan chuchumikaña rikuriruspanqa taytantam penqayman churachkan. Paytaqa kawsachkaqtam kañanqaku.

¹⁰ —Sacerdotekunapa jefenqa umanman aceitewan tallisqa kaspanmi nombrasqa karqa, pachachirqakutaqmi ñoqapaq sapaqchasqa pachawanpas, chayraykum lutoyoq kananpaqqa ama chukchanta kacharinqachu nitaqmi pachantapas llikikunqachu.

¹¹ Amataqmi yaykunqachu ayapa kasqanmanqa tayta-mamanña wañuruptinpas, mana chayqa manam asuykuwanmanchu.

¹² Santuarioymantaqa amam lloqsinqachu. Santuarioytaqa amamá penqayman churanqachu. Payqariki ñoqapaq sapaqchasqa kananpaq umanman aceitewan tallisqam. Ñoqa Tayta Diosmi chaynata nini.

¹³ Sacerdotekunapa jefenqa doncella warmitam casaranqa.

¹⁴ Amam casaranqachu viuda warmitaqa otaq rakinakusqa warmitaqa otaq abusasqa warmitaqa otaq chuchumika warmitaqa, casaraspaqa-casaranqa castamasin doncella warmillatam.

¹⁵ Chaynataqa ruranqa mirayninkunapas castamasinkunapi mana penqayman churasqa kananpaqmi. Ñoqa Tayta Diosmi paytaqa ñoqallapaqña sapaqchani.

Sacerdote kanankupaq harkakuykunamanta

^16-17 Aaronman ninanpaqmi Moisesta Tayta Dios kaynata nirqa: —Pipas miraynikimanta mana sano kaq runaqa manam asuykuwanmanchu ofrenda mikuyniyta presentawananpaqqa.

¹⁸ Manam asuykuwanmanchu mana sano kaqkunaqa. Amamá asuykuwanqachu ñawsapas, wistupas, uyanpi imam kallpisqapas otaq huknin largo makiyoqpas otaq huknin largo chakiyoqpas

¹⁹ otaq chakin pakisqapas otaq makin pakisqapas

²⁰ otaq moqo wasapas otaq moqotipas otaq mana allin qawakuqpas otaq seqsipakuyniyoqpas otaq qarapasqayoqpas otaq runtun dañasqapas.

²¹ Sacerdote Aaronpa mirayninmanta pipas mana sano kaq runaqa manam ñoqa Tayta Diosman kañasqa ofrendataqa presentamuwanmanchu, amamá asuykuwanqachu.

²² Sacerdotekunapa presentamuwasqanku mikuytaqa mikunmanmi, mikunmantaqmi ñoqallapaqña sapaqchasqa ofrendakunatapas.

²³ Ichaqa chuyay-chuyay lugarmanqa amam yaykunqachu nitaqmi altarmanpas asuykunqachu mana sano kasqanrayku. Chaynata ruraspanqa santuarioytam penqayman churanman. Ñoqa Tayta Diosmi sacerdotekunataqa sapaqcharqani.

²⁴ Chaynatamá Moises willarqa Aaronmanwan mirayninkunaman, willarqataqmi Israelpa llapallan mirayninmanpas.