Levítico 20 - Quechua Ayacucho Bible 1987

Mana kasukuqkuna castiganamanta

^1-2 Israelpa mirayninkunata ninanpaqmi Moisesman Tayta Dios kaynata nirqa: —Sichu Israel runakunamanta otaq paykunawan *f**yachaq forasterokunamanta pipas huk kaqnin churinta qonqa ofrendapaq Moloc sutiyoq taytachaman hinaspaqa wañuchisqam kanqa. Llapallan chayna ruraq runataqa nacionniyoq runakunam rumiwan chamqaparunqa.

³ Ñoqapas chay runapa contranpi sayarispaymi runamasinkunamanta chinkarachisaq, chaynataqa rurasaq Moloc sutiyoq taytachaman churinta ofrecesqanraykum chaynataq santuarioytapas hinaspa chuya sutiytapas penqayman churasqanraykum.

⁴ Sichu chay nacionpi runakuna disimulakuspanku chay runata wañuchinankupaq mana sentenciaptinkuqqa

⁵ kikiypunim sayarirusaq chay runapa contranpi chaynataq familianpa contranpipas hinaspam chay runataqa runamasinkunamanta chinkarachisaq. Chinkarachisaqtaqmi paywan kuska Molocta adoraspa llapallan huchallikuqkunatapas. Chaynata ruraspaqa hukwan-hukwan kakuq warmi hinam ñoqata traicionawachkanku.

⁶ Sichu pipas rinqa espiritistakunaman otaq qayaqkunaman hinaspaqa hukwan-hukwan kakuq warmi hinam traicionawachkan, chayraykum chay runapa contranpi sayariruspay runamasinkunamanta chinkarachisaq.

⁷ —Chuyanchakuspayá ñoqallapaña sapaqchakuychik. Chuyayá kaychik yupaychasqaykichik Tayta Diospas chuya kasqayrayku.

⁸ Kasukuspayá cumpliychik decretoykunata. Ñoqa Tayta Diosmi qamkunataqa kikiypaq sapaqchaykichik.

⁹ —Pipas tayta-maman ñakaqtaqa wañuchinkichikpunim. Tayta-maman ñakasqanmanta wañuspanqa kikinmi huchayoq kanqa.

¹⁰ —Sichu pi runapas tupakurunqa runamasinpa warminwan hinaspaqa iskayninkum wañuchisqa kanqa.

¹¹ —Pipas taytanpa warminwan kakuqqa taytantam penqayman churachkan. Chaynaqa iskayninkum wañuchisqa kanqaku. Wañuspankuqa kikinkum huchayoq kanqaku.

¹² —Sichu pipas kakunqa llumchuyllanwan hinaspaqa iskayninkum wañuchisqa kanqaku chay millakuypaq kaq rurasqankumanta. Wañuspankuqa kikinkum huchayoq kanqaku.

¹³ —Sichu pipas warmiwan hina qarimasillanwan puñuptinqa iskayninkum wañuchisqa kanqaku chay millakuypaq kaq rurasqankumanta. Wañuspankuqa kikinkum huchayoq kanqaku.

¹⁴ —Sichu pipas warminpa mamantawan casaraspanqa pasaypaq millakuypaq kaqtam rurachkan. Chayna ruraqtaqa kawsachkaqllatam kimsankuta kañanqaku. Chaynapi chay pasaypaq millakuypaq kaqqa qamkuna ukupi mana kananpaq.

¹⁵ —Pipas warmiwan hina animalwan hukllawakuqqa wañuchisqam kanqa, wañuchinkichiktaqmi animaltapas.

¹⁶ —Pi warmipas qariwan hina animalwan hukllawakuptinqa wañuchinkichikmi chay warmitapas chaynataq animaltapas. Wañuspankuqa kikinkum huchayoq kanqaku.

¹⁷ —Pipas panillanwan casarakuspan paywan kakuptinqa, taytanmanta kaptinpas otaq mamanmanta kaptinpas runamasinkunamanta chinkachisqam kanqa. Chayna ruraq runaqa huk hatun penqaytam rurachkan. Wañuspanqa kikillanmi huchayoq kanqa.

¹⁸ —Killanwan onqochkaq warmiwan pipas puñuq runaqa warmipa yawarpakuynintam rikurun chaynataqmi warmipas rikurachin yawarpakuywan kasqanta. Hinaptinqa iskayninkum runamasinkumanta chinkachisqa kanqaku.

¹⁹ —Mamaykipa ñañanwanqa otaq taytaykipa paninwanqa amam kakunkichu. Chaynata ruraqqa familiallanwan kakusqanraykum iskayninku castigasqa kanqaku.

²⁰ —Pipas tionpa warminwan kakuqqa tiotam penqayman churachkan, chaynaqa iskayninkum castigasqa kaspa mana wawa churiyoq wañunqaku.

²¹ —Wawqenpa warmillanwan kakuq runaqa wawqentam penqayman churachkan *f**qanra kaqta ruraspan, chaynaqa iskayninkum mana wawa-churiyoq kanqaku.

²² —Kasukuspayá cumpliychik llapallan decretoykunatawan reglamentoykunata. Yanqañataq vomitachkaq hina *f**yachanaykichikpaq pusasqay allpa wischuramusunkichikman.

²³ Qayllaykichikmanta qarqonay runakunapa costumbrenman hinaqa amam kawsankichikchu, paykunataqa tukuy chaykunata rurasqanraykum millakuruniña.

²⁴ Prometerqaykichikmi paykunapa allpanta dueñochakunaykichikpaq. Kikiypunim dueñoyachisqaykichik tukuy imakunapapas kasqan allpata. —Ñoqaqa wakin nacionkunamanta rakiqnikichik yupaychasqaykichik Tayta Diosmi kani.

²⁵ Chaynaqa qamkunapas reqsiychikyá mikunapaq hina animalkunata chaynataq mana mikunapaq hina animalkunatapas, reqsinkichiktaqmi alton pawaq animalkunamantapas mikunapaq hina kaqkunata. Amam millakuypaqtaqa rurankichikchu chay animalkunaraykuqa nitaq raprayoq animalkunaraykupas nitaq qasqonpa puriq animalkunaraykupas. Chaykunataqa ñoqam rakirqani mana mikunaykichikpaq.

²⁶ Qamkunaqa chuyayá kaychik ñoqa Tayta Diospas chuya kasqayrayku. Ñoqam rakirqaykichik wakin nacionkunamanta runaykunaña kanaykichikpaq.

²⁷ —Qaripas warmipas adivinaq espirituyoq kaspaqa otaq qayaq kaspaqa wañuchisqam kanqaku, paykunataqa rumiwanmi choqapanqaku. Wañuspankuqa kikinkum huchayoq kanqaku.