Levítico 19 - Quechua Ayacucho Bible 1987

Allin ruraq runaqa imaynam kawsananmanta

^1-2 Huñunasqa Israelpa mirayninkunaman ninanpaqmi Moisesta Tayta Dios kaynata nirqa: —Chuyayá kaychik yupaychasqaykichik Tayta Diospas chuya kasqayrayku.

³ —Sapakamayá respetaychik tayta mamaykichikta. —Samankichiktaqmi samana punchawniykunapipas. Ñoqaqa kani yupaychasqaykichik Tayta Diosmi.

⁴ —Amam rinkichikchu taytacha-mamachakunamanqa nitaqmi rurakunkichikchu fundisqa taytacha-mamachakunatapas. Ñoqaqa kani yupaychasqaykichik Tayta Diosmi.

⁵ —Ñoqawan allinlla kasqaykichikmanta ofrendata ñoqa Tayta Diosman presentawaspaykichikqa, qowaychik chaskisqa kanaykichikpaq hinayá.

⁶ Chay wañuchipuwasqaykichik animalpa aychantaqa mikunkichik chay punchawllam, mana chayqa mikunkichik paqarinnintin punchawmi, sichu minchantinpaq puchuruptinqa kañarunkichikmi.

⁷ Sichu minchantinña mikuptikichikqa millarikuypaqñam kanqa chay ofrendaqa hinaptinqa manam chaskisaqchu.

⁸ Pipas kimsa punchawniyoqtaña mikuruqqa huchanrayku castigasqam kanqa. Payqa ñoqa Tayta Diospaq sapaqchasqa kaqta despreciasqanraykum runamasinkunamanta chinkachisqa kanqa.

⁹ —Chakraykipi imatapas cosechaspaykiqa amam patankamaqa rutunkichu nitaqmi wichisqankunatapas pallapankichu.

¹⁰ Uvasnikita pallachispapas amam maskapachinkichu nitaqmi wichisqankunatapas pallapankichu, chaykunataqa wakchakunapaqwan forasterokunapaqmi saqenki. Ñoqaqa yupaychasqaykichik Tayta Diosmi kani.

¹¹ —Amam suwakunkichikchu, amam engañankichikchu, amataqmi pitapas llullakunkichikchu.

¹² —Amam sutiypiqa imatapas yanqaqa jurankichu. Chayta ruraspaqa ñoqa Diosnikipa sutiytam penqayman churawaq. Ñoqa Tayta Diosmi chaynata nini.

¹³ —Amam runamasikitaqa ñakarichinkichu, amataqmi imallantapas suwakunkichu. —Llamkapusuqnikipa pagontaqa chayllam qoykapunki, amam paqarinnintinkamaqa hatallikunkichu.

¹⁴ —Amam ñakankichu mana uyarikuqkunataqa. —Ñawsapa purinanmanpas amataqmi churankichu trancataqa aswanqa Diosnikitam respetanki. Ñoqa Tayta Diosmi chaynata nini.

¹⁵ —Juez kaspaykiqa allinllatam arreglanki, amam sayapakunkichu wakchamanpas nitaq apumanpas. Derechonpim sumaqta arreglanki runamasikipa quejantaqa.

¹⁶ —Llaqtaykipiqa amam cuento qepiqa kankichu. Amataqmi runamasikipa vidanpa contranpiqa sayarinkichu. Ñoqa Tayta Diosmi chaynata nini.

¹⁷ —Runamasikitaqa amam sonqoykipiqa cheqninkichu. —Anyana kaptinqa anyaykunkim huchallikusqanwan qampas ama huchallikunaykipaq.

¹⁸ —Amam vengakunkichu nitaqmi cheqnipakunkichu runamasikitaqa. Kuyay runamasikita kikikita hina. Ñoqa Tayta Diosmi chaynata nini.

¹⁹ —Decretoykunatam kasukunki. —Amam animalnikitaqa muyachinkichu huk rikchaq animalwanqa. —Amataqmi chakraykipipas tarpunkichu iskay rikchaq muhutaqa. —Amataqmi churakunkichu iskay rikchaq qaytuwan rurasqa pachawanqa.

²⁰ —Sichu huk runa puñurunman casarakunanpaq hukpa rimapayasqan sirvientawan, chay sirvienta manaraq rantisqa kaptinqa otaq manaraq libreyachisqa kaptinqa castigasqapunim kanqaku, ichaqa chay sirvienta manaraq libre kasqanraykum mana wañuchisqachu kanqaku

²¹ hinaptinqa chay runam ñoqa Tayta Diosman apamuwanqa asuykuwananku karpapa punkunman culpanrayku carnero ofrendata.

²² Chay culparayku carnerotam sacerdote ñoqa Tayta Diosman ofrecewanqa chay runapa huchanmanta hinaptinmi huchanta pampachasaq.

²³ —Qonay allpaman yaykuspaykichikqa plantankichikmi tukuy rikchaq fruta sachakunata ichaqa rurunkunataqa amaraqmi mikunkichikchu kimsa watankama.

²⁴ Tawa kaq watapiñam chay sachapa llapallan rurunkunaqa ñoqapaq sapaqchasqa kanqa ñoqata alabawanaykichikpaq.

²⁵ Pichqa kaq watanpiñam mikunkichik chay sachapa rurunkunataqa. Chaynapim chay sachaykichik astawan rurupusunkichik. Ñoqaqa kani yupaychasqaykichik Tayta Diosmi.

²⁶ —Amam ima aychatapas mikunkichikchu yawarnintintaqa. —Amam adivinokunaqa kankichikchu nitaq hamuq tiempokunamanta musyaqkunapas.

²⁷ —Ñoqata mana yupaychawaqniy runakuna hinaqa amam rutuchikunkichikchu umaykichikpa muyuriqninpi chukchaykichiktaqa, amataqmi barbaykichipa puntankunatapas kaptankichikchu.

²⁸ —Pipas wañurusqanraykuqa amam cuerpoykita dañankichu, amataqmi mana chinkaq marcakunataqa aychaykipipas rurakunkichu. Ñoqa Tayta Diosmi chaynata nini.

²⁹ —Warmi churikitaqa amam penqayman churankichu chuchumikapaq qospaykiqa. Chayna kaptinqa nacionnikim pasaypaq millakuypaqña karunman.

³⁰ Samana punchawniykunapim samankichik hinaspam santuarioytapas respetankichik. Ñoqa Tayta Diosmi chaynata nini.

³¹ —Amam rinkichikchu espiritistakunamanqa nitaq qayaqkunamanpas. Chaykuna ruraqta maskaspaqa millakuypaqmi kawaqchik. Ñoqaqa yupaychasqaykichik Tayta Diosmi kani.

³² —Yuyaqkunapa qayllanpi sayarispam paykunataqa respetanki. Respetankitaqmi Diosnikitapas. Ñoqa Tayta Diosmi chaynata nini.

³³ —Qamkunawan kuska nacionnikichikpi *f**yachaq forasterotaqa amam ñakarichinkichikchu.

³⁴ Paytaqa llaqtamasikichikta hinam qawankichik. Paytaqa kuyankichik kikikichikta hinam qamkuna hina kasqanrayku. Forasterom qamkunapas karqankichik Egipto nacionpi. Ñoqaqa kani yupaychasqaykichik Tayta Diosmi.

³⁵ —Juzgaspaykichikqa allinllatam arreglankichik. Imam kaqllatataqmi qonakunkichik tupuspapas, pesaspapas hinaspa yupaspapas.

³⁶ Cabalmi kanqa balanzaykichikpas, pesoykichikpas, tupunaykichikpas chaynataq litroykichikpas. Yupaychasqaykichik ñoqa Tayta Diosmi Egipto nacionmanta horqomurqaykichik.

³⁷ —Kasukuspayá cumpliychik llapallan decretoykunatawan llapallan reglamentoykunata. Ñoqa Tayta Diosmi chaynata nini.