Levítico 18 - Quechua Ayacucho Bible 1987

Pikunawanmi qariqa mana puñunanmanta

^1-2 Israelpa mirayninkunaman ninanpaqmi Moisesta Tayta Dios kaynata nirqa: —Ñoqam kani yupaychasqaykichik Tayta Dios.

³ —Amam imatapas rurankichikchu *f**yachasqaykichik Egipto nacionpi runakunapa rurasqankuta hinaqa. —Yaykuchinay Canaan nacionpi kaspaykichikpas amataqmi paykunapa rurasqanta hinaqa rurankichikchu, amataqmi kawsankichikchu paykunapa costumbrenman hinaqa.

⁴ —Reglamentoykunata cumplispayá decretoykunatapas kasukuychiktaq. Chaykunaman hinayá kawsaychik. Ñoqaqa kani yupaychasqaykichik Tayta Diosmi.

⁵ —Chaynaqa decretoykunatawan reglamentoykunatayá kasukuychik. Chaykunata pipas cumpliqqa kawsanqam. Ñoqa Tayta Diosmi chaynata nini.

⁶ —Amam mayqan qaripas familianmanta kaq warmiwanqa kakunqachu. Ñoqa Tayta Diosmi chaynata nini.

⁷ —Mamallaykiwan kakuspaqa amam taytaykitaqa penqaymanqa churankichu. Payqariki mamaykim, amam paywanqa kakunkichu.

⁸ —Warminwan kakuspaqa amam taytaykitaqa penqaymanqa churankichu.

⁹ —Taytaykipa churyapaykuynin otaq mamaykipa wachapakuynin panikiwanqa amam kakunkichu wasikipi naceq kaptinpas otaq huklaw wasipi naceq kaptinpas.

¹⁰ —Penqayman churakunaykipaqqa amam kakunkichu qari churikimanta warmi willkaykiwanpas nitaq warmi churikimanta warmi willkaykiwanpas.

¹¹ —Taytaykipa huknin warminpa warmi wawanwanqa amam kakunkichu. Taytaykipa churinqa panikim, chayraykum paywanqa ama kakunkichu.

¹² —Taytaykipa paninwanqa amam kakunkichu, payqariki taytaykipa familianmi.

¹³ —Mamaykipa ñananwanqa amam kakunkichu, payqariki mamaykipa familianmi.

¹⁴ —Tiallaykiwan kakuspaqa amam penqaymanqa churankichu taytaykipa wawqentaqa.

¹⁵ —Llumchuynikiwanqa amam kakunkichu, payqariki churikipa warminmi.

¹⁶ —Cuñadallaykiwan kakuspaqa amam wawqekitaqa penqayman churankichu.

¹⁷ —Amam wawantinwanqa kakunkichu huk warmiwanqa, amataqmi casarakunkichu qari wawanpa warmi churinwanpas nitaq warmi wawanpa warmi wawanwanpas. Tukuy chaykuna ruraqqa millakuypaqmi familiantillan kasqanrayku.

¹⁸ —Warmiki kawsachkaptinqa amam warmikipa ñañantaqa casarankichu nitaqmi paywanqa kakunkichu. Paykunaqa cheqninakunmanmi iskayninwan kasqaykirayku.

¹⁹ —Amam kakunkichu killanwan kaq warmiwanqa.

²⁰ —Amam kakunkichu runamasikipa warminwanqa. Chaynata ruraspaqa millakuypaqmi kawaq.

²¹ —Amam churikita ninapi kañankichu Moloc sutiyoq taytachapaq. Chaynata ruraspaqa ñoqapa sutiytam penqayman churawaq. Ñoqa Tayta Diosmi chaynata nini.

²² —Warmiwan hinaqa amam kakunkichu qaripuraqa. Chay rurayqa pasaypaq millakuypaqmi.

²³ —Animalwanqa amam hukllawakunkichu warmiwan hinaqa, chaynata ruraspaqa millakuypaqtam rurachkanki. Warmipas qariwan hinaqa amataqmi animalwanqa hukllawakunqachu. Chayqa pasaypaq millarikuypaq ruranakunañam.

²⁴ —Chay ruraykunawanqa amam millakuypaqta rurakunkichikchu. Chaykunawanmi qayllaykichikmanta wischunay llapa nacionkunapas millakuypaqña rikurirunku.

²⁵ Chayna ruraykunawanmi allpapas millarikuypaqña rikurirurqa hinaptinmi allpataqa castigarqani runakuna mana allin rurasqankumanta. Chayraykum allpapas chay runakunata vomitachkaq hina wischuchkan.

²⁶ Israel casta runakuna, kasukuychikyá qamkunapas chaynataq qamkunawan *f**yachaq forasterokunapas decretoykunatawan reglamentoykunata hinaspayá ama ruraychikchu mayqantapas kay millarikuypaq kaqkunataqa.

²⁷ Tukuy kay millarikuypaq kaqkunataqa rurarqaku qamkunamanta chay allpapi punta yachaq runakunam hinaptinmi chay allpapas millarikuypaq karurqa.

²⁸ Yanqañataq qamkunatapas vomitachkaq hina chay allpa wischurusunkichikman millakuypaq kaqkunata ruraptikichik, chaynatamiki wischururqa chay allpapi punta yachaq runakunatapas.

²⁹ Pipas chay millarikuypaq kaqkunata ruraq runaqa runamasinkunamanta chinkachisqam kanqa.

³⁰ Chaynaqa kasukuychikyá kay kamachisqaykunata. Amayá ruraychikchu millarikuypaq kaqkunataqa qamkunamanta ñawpaq runakunapa rurasqanta hinaqa. Amamá millarikuypaqqa rurakunkichikchu chaykunawanqa. Ñoqaqa kani yupaychasqaykichik Tayta Diosmi.