Levítico 16 - Quechua Ayacucho Bible 1987

Huchakuna pampachana punchawmanta

¹ Aaronpa iskaynin churinkunam Tayta Diosman asuykuspanku wañururqaku. Chaypa qepallantam

² Moisesta Tayta Dios nirqa: —Wawqeki Aarontayá niy karpapi cuarto rakinaq telapa qepanmanqa otaq baulpa tapanpa ñawpaqninmanqa ama sapa kutilla yaykunanpaq chaynapi ama wañurunanpaq. Ñoqaqa sutillatam rikurisaq baulpa tapanpa hawan puyupi.

³ Aaronqa yaykuspaqa-yaykunqa “chuyay-chuyay” lugarmanqa malta toropa yawarninta hucharayku ofrendapaq apaykuspallam, apaykunqataqmi lliw kañana ofrendapaq kaq carneropa yawarnintapas.

⁴ Payqa yaykunanpaqmi hinakunqa sapaqchasqa linomanta camisonwan hinaspa linomanta calzoncillowan hinaspam weqawninta watakunqa linomanta chumpiwan, umantapas wankikunqataqmi linomanta uma wankinawan. Chay pachakunaqa ñoqallapaqña sapaqchasqam, chaynaqa chaykunawan manaraq pachakuchkaspam sumaqta bañakunqa.

⁵ —Israelpa mirayninkunapa rantinpiñataqmi Aaron apamunqa iskay chivatokunata huchamanta ofrendapaq, apamunqataqmi huk carnerotapas lliw kañana ofrendapaq.

⁶ Malta torotam Aaron ofrecewanqa kikinpa huchanmantawan ayllunpa huchankunamanta chaynapi huchankumanta pampachanaypaq.

⁷ Chaymantam chay iskaynin chivatokunata ñoqa Tayta Diosman presentawanqa asuykuwananku karpapa punkunpi.

⁸ Hinaspam Aaronqa sorteanqa iskaynin chivatokunata. Huknintam akllanqa ñoqa Tayta Diospaq, huknintañataqmi akllanqa Azazelpaq.

⁹ Chaypim Aaron wañuchipuwanqa suerteaspa akllapuwasqan chivatota, chaytaqa presentawanqa huchanmanta ofrendapaqmi.

¹⁰ Azazelpaq suerteaspa akllasqan chivatotañataqmi kawsachkaqllata ñoqa Tayta Diospa qayllayman churanqa huchakuna pampachanaypaq hinaspam Azazelpaq chunniqman kachaykunqa.

¹¹ —Malta torotam Aaron ofrecewanqa kikinpa huchanmantawan ayllunpa huchankunamanta chaynapi huchankumanta pampachanaypaq, chaynaqa chay malta torotamá wañuchinqa huchankunamanta ofrenda kasqanrayku.

¹² Chaymantañataqmi ñoqa Tayta Diospa qayllaypi kaq altarmanta nina sansata horqoykuspa qontichinaman churanqa hinaspam kutasqa miski asnaq iskay aptay inciensotawan apaykunqa cuarto rakinaq telapa qepanman.

¹³ Chay inciensotam sansaman hinaykunqa ñoqa Tayta Diospa qayllaypi. Chaypim inciensopa qosniynin Chunkantin Kamachikuykuna waqaychana baulpa tapanta tutayaykachinqa, chaynapim Aaronqa mana wañurunqachu.

¹⁴ Hina qepanmanñataqmi malta toropa yawarninman dedonta challpuykuspan challanqa tapata intipa qespimunan lawman qawaqta hinaspam dedonwantaq yapatawan qanchis kutikama challanqa yawarwan chay tapapa ñawpaqninpi.

¹⁵ Chaymantam chivatota wañuchinqa runakunapa huchankunamanta presentawananpaq hinaspam apaykunqa yawarninta cuarto rakinaq telapa qepanman hinaspam dedonwan challanqa tapapa hawanman chaynataq ñawpaqninman, chaynataqa ruranqa malta toropa yawarninwan rurasqanta hinam.

¹⁶ Chaynatamá santuariotaqa chuyanchanqa Israelpa mirayninkunapa millakuypaq kaqninkunamanta, mana kasukusqankumanta hinaspa llapa huchankumanta. Hina chaynallatataqmi ruranqa ñoqaman asuykuwananku karpatapas. Chay karpaqa kachkan millakuypaq chawpinkupim.

¹⁷ —“Chuyay-chuyay” lugarpi huchakuna pampachasqa kananpaq Aaron yaykuptinqa amam pipas kanqachu chay asuykuwananku karpapiqa karpamanta Aaron lloqsimunankama. Kikinpa huchankunata, ayllunkunapa huchankunata hinaspa huñunasqa Israel casta llapallan runakunapa huchanta pampachaptiyñam

¹⁸ Aaronqa lloqsinqa ñoqa Tayta Diospa qayllaypi altarta chuyanchananpaq. Chaypaqmi apanqa malta toropatawan chivatopa yawarninta hinaspam llusinqa altarpa llapallan waqrachankunata.

¹⁹ Yawarwantaqmi altarta challanqa qanchis kutikama. Chaynata ruraspanmi Israelpa mirayninkunapa millakuypaq rurasqanmanta chuyanchanqa, chaynatam ñoqapaq sapaqchanqa.

²⁰ —“Chuyay-chuyay” lugarta, asuykuwananku karpata hinaspa altarta Aaron chuyanchayta tukuruspanmi pusachimunqa chay kawsachkaqraq chivatota.

²¹ Hinaptinmi Aaron churaykunqa makinkunata kawsachkaq chivatopa umanman hinaspam ñoqaman willawanqa Israelpa mirayninkunapa mana allinkuna rurasqankunata, mana kasukuyninkunata chaynataq paykunapa huchantapas. Chivatotaqa pusachinqa chunniqmanmi chaypaq nombrasqa runawan.

²² Chaymi huchanku apachkaq hina chay chivato apanqa purunman paykunapa llapallan mana allin rurasqanta.

²³ Chaymantam Aaron yaykunqa asuykuwananku karpaman hinaspam chaypi “Chuyay-chuyay” lugarman yaykunanpaq churakunan linomanta pachanta chustukurunqa hinaspam dejarunqa chay karpapi.

²⁴ Asuykuwananku karpapi bañakuruspanmi pachakurunqa hina sacerdote pachanwanña. Lloqsispanñataqmi kikinmantawan runakunamanta lliw kañana ofrendata kañapuwanqa hinaptinmi Aaronpa huchantawan runakunapa huchanta pampachasaq.

²⁵ Altarpim kañanqataq hucharayku ofrenda wiratapas.

²⁶ Azazelman chay chivatota pusaq runapas pachanta taqsakuspanmi bañakunqa hinaspañam campamentoman yaykunqa.

²⁷ —Campamentomanta hawamanmi horqonqaku huchamanta wañuchisqa malta torotapas chaynataq chivatotapas hinaspam chaypi kañanqaku qaranta, aychanta chaynataq akantapas. Chay animalkunapa yawarninqariki santuarioman apasqam kanqa huchakuna pampachasqa kananpaq.

²⁸ Chay kañaq runapas pachanta taqsakuspam bañakunqa hinaspañam campamentoman yaykunqa.

²⁹ —Kaymi qamkunapaq kanqa wiña-wiñaypaq decretoy: Qanchis kaq killapa chunka punchawninpim ayunankichik hinaspam ama llamkankichikchu. Amataqmá llamkanqachu llaqtamasikichikpas nitaq qamkunawan kaq forasteropas.

³⁰ Chay punchawpim ñoqa Tayta Dios tukuy huchaykichikta pampachasaq chaynapim asuykuwankichikmanña.

³¹ Chay punchawqa samana punchawmi qamkunapaq kanqa. Chay punchawpim ayunankichik. Kayqa wiña-wiñaypaq decretom.

³² Taytanpa rantinpi sacerdote kananpaq aceitewan tallispa nombrasqa runaqa huchakunata pampachanaypaqmi ofrendakunata imam rurananman hina ruranqa, chaynataqa ruranqa ñoqapaq sapaqchasqa linomanta pachawan pachakuspanmi.

³³ Hinaspam chuyanchanqa ñoqaman asuykuwananku karpata, “Chuyay-chuyay” lugarta chaynataq altartapas. Sacerdotekunapa huchankunata chaynataq llapallan huñunasqa runakunapa huchankunata pampachanaypaqmi payqa ofrendakunata presentawanqa.

³⁴ —Kaymá qamkunapaq kanqa wiña-wiñaypaq decretoy. Watapim huk kutita kayta rurankichik Israelpa mirayninkunapa huchanta pampachanaypaq. —Chaynatamá rurarqaku Moisesman Tayta Diospa kamachisqanta hina.