Levítico 14 - Quechua Ayacucho Bible 1987

Leprawan onqoqkunaqa imaynatam Diosman asuykunankumanta

¹ Tayta Diosmi Moisesta nirqa kaynata:

² —Lepra onqoywan kaq runa imaynam asuykuwananmantam kaykunata yachachikichik: Onqoqmi sacerdoteman pusasqa kanqa

³ hinaptinmi sacerdoteñataq campamentomanta hawaman lloqsispan chaypi qawanqa, sichu chay onqoqpa lepra onqoynin sanoyaruptinqa

⁴ sacerdotem chay onqoqta kamachinqa iskay kawsachkaq mikuna urpituchakunata apamunanpaq, chaykunaqa kanqa ñoqaman asuykuwananpaq ofrendam, apamuwanqataqmi cedromanta kaspitapas, puka qaytutapas hinaspa hisopo sutiyoq plantatapas.

⁵ Sacerdotem kamachinqa chayraq wisimusqa yakuyoq allpa mankapa hawanpi huknin urpituchata wañuchinankupaq,

⁶ hapiykunqataqmi huknin kawsaq urpituchatapas, cedro kaspitapas, puka qaytutapas chaynataq hisopo plantatapas. Chaykunatam challpunqa chayraq wisimusqa yaku hawanpi wañuchisqa urpituchapa yawarninman.

⁷ Chay yawarniyoq yakuwanmi challanqa qanchis kutikama lepra onqoywan kaq runata chaynapim payqa asuykuwanqaña. Chay kawsaq urpituchatañataqmi kachaykunqa pawakunanpaq.

⁸ —Pipas ñoqaman asuykuwananpaq alistakuqqa pachankunatam taqsakunqa hinaspam chukchantapas kachiy-kachiyta rutuchikunqa, kikinpas bañakunqam asuykuwananpaq hinaspañam yaykunqa campamentoman. Ichaqa qanchis punchawpunim amaraq yaykunqachu kikinpa karpanmanqa.

⁹ Chay qanchis punchaw pasaruptinmi huktawan kachiy-kachiyta chukchanta rutuchikunqa, rutuchikunqataqmi barbantapas, cejasninkunatapas chaynataq lliw pelonkunatapas. Pachankunata taqsakuspam kikinpas bañakunqataq chaynapim ñoqamanqa asuykuwanmanña.

¹⁰ Pusaq kaq punchawmanñataqmi pusamuwanqa iskay sano malta carnerokunata, pusamuwanqataqmi huk watayoq sano ovejatapas. Apamuwanqataqmi aceitewan chapusqa soqta kilo parten fino harinatapas, chayqariki kawsaykunamanta ofrendam, apamuwanqataqmi cuarto litro masnin aceitetapas.

¹¹ Chaymantam asuykuwananpaq karpapa pationman presentawaqniy sacerdote pusamunqa chay asuykuwananpaq preparakuq runata, paypa imankunatapas churanqa ñoqapa qayllaymanmi.

¹² Huknin malta carnerota hapiykuspanmi kuyuchispa ofrecewanqa cuarto litro masnin aceitewan, chayqariki ñoqa Tayta Diosman presentawananku culparayku ofrendam.

¹³ Chay malta carnerotaqa sacerdotem wañuchinqa wañuchinankupaq sapaqchasqa lugarpi, chaypiqariki wañuchinku hucharayku ofrendatawan lliw kañapuwananku ofrendatam. Culparayku presentawasqanku ofrendaqa kanqa sacerdotepaqmi imaynam hucharayku ofrenda hina, chayqariki ñoqallapaqña sapaqchasqam.

¹⁴ —Chaymantam culparayku ofrecewasqanku carneropa yawarninta sacerdote chaskiykuspan llusinqa ñoqaman asuykuwananpaq preparakuq runata. Llusinqaqa chay runapa *f**alleq ririnpa ura patachantam, llusinqataqmi alleq makinpa maman dedontawan alleq chakinpa maman dedontapas.

¹⁵ Chaymantam sacerdoteqa aceiteta asllata tallikuykunqa ichoq makinpa plantanman

¹⁶ hinaspam alleq dedonta challpuykunqa *f**ichoq makinpi kaq aceiteman hinaspam hina chay alleq dedollanwantaq qanchis kutikama aceiteta challanqa ñoqa Tayta Diospa ñawpaqniypi.

¹⁷ Makinpi puchuq aceitewanñataqmi sacerdote llusinqa ñoqaman asuykuwananpaq preparakuq runata, llusinqaqa *f**alleq rinrinpa ura patachantam, llusinqataqmi alleq makinpa maman dedontawan alleq chakinpa maman dedontapas. Chaynatamá llusinqa culparayku yawarwan llusisqanpa hawanman.

¹⁸ Chay puchuq aceitewanñataqmi sacerdote tallinqa ñoqaman asuykuwananpaq preparakuq runapa umanman. Chaynata sacerdote ruraruptinmi ñoqa pampachasaq chay runapa huchankunata.

¹⁹ Chaymantañataqmi sacerdote presentawanqa hucharayku ofrendata. Chaynataqa ruranqa ñoqaman asuykuwananpaq preparakuq runa chaskisqaña kananpaqmi. Chaymantañam sacerdote kañapuwanqa lliw kañana animalta.

²⁰ Chay lliw kañana animaltaqa presentawanqa altarpa hawanpim kawsaykunamanta ofrendatawan kuskata. Chaynata sacerdote ruraptinmá ñoqa pampachasaq chay runapa huchankunata. Chay runaqa asuykuwanmanñam.

²¹ —Ichaqa chay onqoq runa wakcha kasqanrayku paypa qollqen mana haypaptinqa pusamuwanqa huk malta carnerotam culparayku presentawananpaq, chayqariki huchakuna pampachasqa kananpaq presentawanan ofrendam, chaytawan kuskatam ofrecewanqataq aceitewan chapusqa iskay kilo masnin fino harinatapas. Chayqariki kawsaykunamanta ofrendam. Presentawanqataqmi cuarto litro masnin aceitetapas.

²² Chaymantam atisqanman hina presentawanqa iskay qoqñuta otaq iskay mallqo palomakunata. Hukninmi kanqa hucharayku ofrendapaq, hukninñataqmi kanqa lliwta kañapuwananpaq.

²³ Pusaq kaq punchawpiñataqmi tukuy chaykunata apamunqa asuykuwananku karpapa punkunman. Chaypim ñoqa Tayta Diospa qayllaypi sacerdoteman entreganqa.

²⁴ Sacerdotem presentawanqa culparayku carnero ofrendata, presentawanqataqmi cuarto litro masnin aceitetapas. Chayqariki ñoqa Tayta Diosman kuyuchispa presentawasqanku ofrendam.

²⁵ Chaynaqa sacerdotemá wañuchinqa chay culparayku malta carnero ofrendata hinaspam yawarninta chaskiykuspan llusinqa chay ñoqaman asuykuwananpaq preparakuq runata, llusinqaqa chay runapa *f**alleq rinrinpa ura patachantam, llusinqataqmi alleq makinpa maman dedontawan alleq chakinpa maman dedontapas.

²⁶ Chaymantam sacerdote aceiteta asllata talliykunqa *f**ichoq makinpa plantanman.

²⁷ Hinaspam alleq dedonta ichoq makinpi aceiteman challpuykuspan qanchis kutikama challanqa ñoqa Tayta Diospa ñawpaqniypi.

²⁸ Sacerdoteqa makinpi kaq aceitewanpas llusinqataqmi ñoqaman asuykuwananpaq preparakuq runata, llusinqaqa alleq rinrinpa ura patachantam, llusinqataqmi alleq makinpa maman dedontawan *f**alleq chakinpa maman dedontapas. Chaynataqa llusinqa culparayku yawarwan llusisqanpa hawanmanmi.

²⁹ Makinpi kaq chay puchuq aceitewanñataqmi sacerdote tallinqa ñoqaman asuykuwananpaq preparakuq runapa umanman. Chaynapim ñoqa Tayta Dios pampachasaq chay runapa huchankunata.

³⁰ Chaymantam ofrecewaqniypa atisqanman hina sacerdote ofrecewanqa huknin qoqñuta otaq huknin mallqo palomata.

³¹ Chaykunapa hukninmi kanqa hucharayku ofrenda, hukninñataqmi kanqa lliwta kañapuwanankupaq. Chaywan kuskatataqmi ñoqa Tayta Dios pampachasaq asuykuwananpaq preparakuq runapa huchankunata.

³² Kaykunam chay yachachikuykuna lepra onqoywan kasqanmanta preparakuq mana ancha qollqeyoq runapaq.

Qoqaraykuna limpianankumanta

³³ Moisestawan Aarontam Tayta Dios kaynata nirqa:

³⁴ —Dueñochakunaykichikpaq qonay Canaan allpapiña kachkaptikichik, chay allpapi huk kaqnin wasipa perqanta qoqararachiptiyqa

³⁵ chay wasiyoqmi sacerdoteman rispan ninqa: “Qoqarachkaq hinam wasiypi rikurirun” nispa.

³⁶ Hinaptinmi sacerdote manaraq wasiman yaykuchkaspan kamachinqa chay wasimanta tukuy imakunatapas horqonankupaq chaynapi chay wasipi tukuy ima kaqkunapas mana millarikuypaq kananpaq, chaymantañam sacerdote yaykunqa qawaykuq.

³⁷ —Sichu chay qawasqan wasipa perqankunapi rikurunqa yaykuchkaq hinaraq verde otaq puka qoqaraykunata

³⁸ hinaptinqa sacerdotem wasimanta lloqsiruspan wichqarachinqa qanchis punchaw pasanankama.

³⁹ Qanchis kaq punchawpiñataqmi kaqlla kutispan sumaqta qawanqa. Sichu chay qoqaraykuna mirarunqa wasipa perqankunapi

⁴⁰ hinaptinqa sacerdotem wasipa perqanmanta horqochinqa chay qoqaraypa kasqan rumikunata hinaspam wischuchinqa llaqtamanta hawapi wanupataman.

⁴¹ Chaymantam sumaqta raspanchinqa wasipa ukunpi llapallan perqakunata hinaspam chay allpataqa wischuchinqa llaqtamanta hawapi wanupatam.

⁴² Hinaspam huk rumikunataña churachinqa wischuchisqan rumikunapa rantinpi, mosoqmantañam perqakunatapas mituwan laqapachinqa.

⁴³ —Sichu ruminkunatapas wischuchichkaptin chaynataq perqakunatapas raspachispa musoqmanta mituwan laqachichkaptin chay wasipi kaqllamanta qoqaray rikuriruptinqa

⁴⁴ yapatawanmi sacerdote yaykuspan sumaqta qawanqa. Sichu mirarunqa wasipi chay qoqaray hinaptinqa chayqa miraruq qoqaray onqoymi, chay wasiqa millarikuypaq wasiñam kanqa.

⁴⁵ Chaynaqa tuñichinqakum chay wasitaqa hinaspam ruminkunatapas qerunkunatapas, allpantapas wischuchinqa llaqtamanta hawapi wanupataman.

⁴⁶ Chay wasiman wichqasqa kachkaptin pipas yaykuqqa manam asuykuwanmanchu tutaykuqkama.

⁴⁷ Pipas chay wasipi puñuqqa otaq mikuqqa pachantam taqsanqa.

⁴⁸ —Yapamanta sacerdote chay wasiman yaykuykuspanmi sumaqta qawanqa. Sichu mosoqmanta laqapasqanku perqakunapi manaña chay qonqaray miraruptinqa chinkarusqanraykum sacerdote ninqa chay wasiqa manaña millakuypaq kasqanta.

⁴⁹ Wasiqa limpioña kananpaqmi apamunqa iskay urpituchakunata, cedro kaspita, puka qaytuta chaynataq hisopo plantachatapas.

⁵⁰ Hinaspam huknin urpituchata wañurachinqa chayraq wisimusqa yakuyoq allpa mankapa hawanpi.

⁵¹ Chaymantam hapiykunqa cedro kaspita, hisopo plantata, puka qaytuta chaynataq kawsachkaq urpituchatapas. Chaykunatam challpunqa wañuchisqan urpituchapa yawarninman hinaspa chayraq wisimusqa yakuman. Hinaspam challanqa qanchis kutikama chay wasita.

⁵² Chaynata ruraspanmi qoqaraypa rikurisqan wasita limpianqa urpituchapa yawarninwan, chayraq wisimusqa yakuwan, kawsachkaq urpituchawan, cedro kaspiwan, hisopo plantachawan hinaspa puka qaytuwan.

⁵³ Chaymantam kawsachkaq urpituchata kachaykunqa pawakunanpaq. Chaynatam ruranqa chay wasiqa manaña millakuypaq kananpaq.

⁵⁴ Chaykunam yachachiwanchik lepra onqoymanta, sarna onqoymanta,

⁵⁵ pachapi qoqaraymanta, wasipa perqanpi qoqaraymanta,

⁵⁶ aycha qarapi rikuriruq punkiykunamanta, chupukunamanta chaynataq aycha qarapi mancha rikuriqkunamantapas.

⁵⁷ Chaykunaqa yachachiwanchik lepra onqoymantawan qoqaray onqoymantam chaynapi millakuypaq kaqkunatapas otaq mana millakuypaq kaqkunatapas reqsinapaq.