Levítico 13 - Quechua Ayacucho Bible 1987

Lepra onqoymanta

¹ Tayta Diosmi Moisestawan Aaronta kaynata nirqa:

² —Huk kaqnin runapa cuerponpi punkiy otaq roncha rikuriruptinqa otaq ima yuraq manchapas rikuriruptinqa otaq lepraman rikchakuq ima llagapas rikuriruptinqa pusamunkichik sacerdote Aaronmanmi. Manaña pay kawsaptinqa pusamunkichik paypa miraynin huk kaqnin sacerdotemanmi.

³ Chay sacerdotem qawanqa onqoqpa cuerponpi llagata. Sichum chay llagapi kaq pelo yuraqman tikrakuruptinqa hinaspa chay llagapas ukuneqman yaykuruptinqa chayqa lepra onqoymi. Chayta sacerdote reqsiykuspanmi chay onqoqta ninqa ñoqaman amaña asuykamunanpaq.

⁴ —Sichu chay onqoqpa cuerponpi mancha yuraq kaptinqa hinaspa manataq ukuneqman yaykuruptinqa hinaspa pelopas yuraqman mana tikrakuruptinqa sacerdotem chay onqoqta wichqarunqa qanchis punchawpaq.

⁵ Chay qanchis punchawmantam huktawan sacerdote qawanqa chay onqoqpa aychanta, sichum chay llaga hinalla kaptinqa hinaspa manataq miraruptinqa sacerdotem yapatawan chay onqoqta wichqanqa hina qanchis punchawtawanraq.

⁶ Chay qanchis punchawmantam huktawan qawanqa, sichum chay llaga onqoqpa aychanmanta yuraq allqa kayninmanta menosyaspan mana wiñaptinqa chay onqoqtam sacerdote ninqa: “Diosmanqa asuykuwaqñam” nispan. Chay onqoyninqa ronchallam. Chaynaqa chay onqoqmá pachanta taqsakuspan asuykuwanmanña.

⁷ —Ichaqa chay onqoq qawarachikuspan sanopaqña chaskisqa kaptinpas aychanpi chay roncha wiñayta qallaykuptinqa sacerdotemanmi kutirinqa qawachikunanpaq.

⁸ Chay sacerdote chay onqoqpa cuerponpi llagakunata qawaspa mirarusqanta tariruspaqa chay onqoqtam ninqa ñoqaman amaña asuykuwananpaq. Payqariki onqochkan lepra onqoywanmi.

⁹ —Huk kaqnin runapa cuerponpi lepra onqoy llaga rikuriruptinqa chay runatam pusamunkichik sacerdoteman.

¹⁰ Sacerdotemá qawanqa chay runapa onqoyninta, sichum chay cuerponpi punkiy yuraq kaptinqa hinaspa chaypi pelopas yuraqman tikrakuruptinqa hinaspa kawsaq aychapas llagapi sutilla rikuriptinqa

¹¹ chay runapa onqoyninqa sasa sanoyaq lepra onqoymi. Chay onqoqtaqa amañam wichqanqapaschu, ñam yachakunña lepra onqoy kasqanta.

¹² —Sichum onqoqpa chaki puntanmanta uma puntankama sacerdotepa maymi qawanankama chay onqoy apurawman miraruptinqa,

¹³ sacerdotem chayta qawanqa. Chay onqoy lliw cuerponta taparuptinqa sacerdotem ninqa chay runaqa asuykuwananpaqña. Chay onqoyqariki tikrakurun yuraqmanmi chaymi onqoqpas asuykuwanmanña.

¹⁴ Ichaqa chay runapa ronchankunapi kawsaq aycha rikuriruptinqa amam asuykamuwanqachu.

¹⁵ Sacerdotemá qawanqa chay ronchakunapi kawsaq aychata hinaspam chay onqoqta ninqa amaña asuykuwananpaq, chay kawsaq aychaqariki lepra onqoymi, chaynaqa amañamá asuykamuwanqachu.

¹⁶ —Sichu chay kawsaq aycha tikrakurunqa yuraqman hinaptinqa chay onqoqmi sacerdoteman hamunqa

¹⁷ qawachikunanpaq, sichu chay llaga tikrakurunqa yuraqman hinaptinqa sacerdotem chay onqoqta ninqa asuykuwananpaqña, payqariki manam kachkan lepra onqoywanñachu.

¹⁸ —Huk kaqnin runapa cuerponpi chupu rikuriruspan sanoyaruptinqa

¹⁹ hinaspa chaypi yuraq punkisqa quedaruptinqa otaq pukayasqa yuraq mancha quedaruptinqa sacerdotewanmi qawachikunqa.

²⁰ Sacerdote qawaspan chay chupupa kasqan ukuneqña kaptinqa hinaspa pelopas yuraqman tikrakuruptinqa chay onqoqtam rimapayanqa amaña ñoqaman asuykuwananpaq. Chay chupupi rikuriqqa lepra onqoymi.

²¹ Ichaqa chay chupupa kasqanpi pelopas mana yuraq kaptinqa hinaspa ukuneqman manataq yaykuptinqa chaynapi menosyaytaña qallaykuptinqa chay onqoqtam sacerdote wichqarunqa qanchis punchawpaq.

²² Aswanqa chay onqoqpa cuerponpi chayna chupukuna miraruptinqa sacerdotem ninqa chay runaqa ñoqaman amaña asuykuwananpaq. Chayqariki lepra onqoymi.

²³ Ichaqa chay yuraq mancha hinalla kaspan mana wiñaptinqa chay chupuqa ñam sirakurunña, chaynaqa sacerdotem chay runata ninqa asuykuwananpaqña.

²⁴ —Ninawan huk runa pusllurachikuptin chay kawsaq aychan pusllusqapi pukayasqa yuraq mancha otaq yuraq mancha rikuriruptinqa

²⁵ sacerdotem qawanqa. Sichu chay manchapi kaq pelo yuraqman tikrakuruptinqa hinaspa chay mancha ukuneqman yaykuruptinqa lepra onqoymi hatarirun chay pusllusqapi. Chaynaqa sacerdotem chay onqoqta ninqa ñoqaman amaña asuykuwananpaq, chay llagapiqariki rikurirun lepra onqoymi.

²⁶ Sichu chay manchata sacerdote qawaspan mana tarinqachu ima yuraq pelotapas hinaspa chay manchaqa mana ukuneqman yaykuspa aswan menosyaptinqa chay onqoqtam sacerdote wichqarunqa qanchis punchawpaq.

²⁷ Chay qanchis kaq punchawpiñataqmi sacerdote huktawan qawanqa chay onqoqta. Sichu chay mancha miraruptinqa chay onqoqtam ninqa amaña asuykuwananpaq, chay llagapiqariki rikurirun lepra onqoymi.

²⁸ Ichaqa chay mancha mana wiñaspan menosyaptinqa kañakurusqanpa punkiyllanmi. Chaynaqa sacerdotem chay onqoqta ninqa asuykuwananpaqña. Chayqariki kañakurusqanpa sirakusqallanmi.

²⁹ —Huk qaripa umanpi otaq huk warmipa umanpi llaga rikuriruptinqa otaq kakichunpipas llaga rikuriruptinqa

³⁰ sacerdotem qawanqa. Sichu chay llaga ukuneqman yaykuruptinqa hinaspa chaypi tarikuq pelopas qelluyaspa asllayaptinqa, chay onqoqtam sacerdote ninqa ñoqamanqa amaña asuykuwananpaq. Chay runataqa hapirun sarnapakuymi, chayqariki umanpi otaq kakichunpi rikuriruq lepra onqoymi.

³¹ Sichum sacerdote qawanqa chay sarnapakuyta hinaspa manataq tarinqachu chay llagaqa ukuneqman yaykurusqanta hinaspa manataq tarinqachu ima yana pelotapas hinaptinqa chay onqoqtam wichqarunqa qanchis punchawpaq.

³² Chay qanchis kaq punchawpiñataqmi sacerdote qawanqa chay llagata, sichum chay sarnapakuy mana miraruptinqa hinaspa ukuneqman mana yaykuruptinqa hinaspa pelopas mana qelluyaptinqa,

³³ chay onqoqtam sacerdote kamachinqa chukchanta kachiy-kachiyta rutuchikunanpaq, ichaqa amam rutuchikunqachu chay sarnapakuy llagapa kasqantaqa, sacerdotem chay onqoqta wichqarunqa qanchis punchaw mastaraq.

³⁴ Chay qanchis kaq punchawpiñataqmi sacerdote qawanqa chay llagata, sichum chay sarnapakuy mana wiñaruptinqa hinaspa manataq ukuneqman yaykuruptinqa chay onqoqtam sacerdote ninqa asuykuwananpaqña. Chay runaqa pachanta taqsakuspam asuykamuwanmanña.

³⁵ Ichaqa chay sarnapakuy cheqaptapuni miraruptinqa, sanopaqña avisasqa kachkaptinpas

³⁶ sacerdotem huktawan qawanqa chay onqoqta. Sichu chay sarnapakuy miraruptinqa amañam maskanqachu qellu pelotapas. Chay runaqa manam ñoqamanqa asuykuwanmanñachu.

³⁷ Ichaqa chay sarnapakuy sayarusqanpaq sacerdoteman rikchakapuptinqa hinaspataq yana pelopas wiñaruptinqa, chay runaqa sanoyarunñam sarnapakuymanta, payqa ñam asuykuwanmanña. Chaynaqa sacerdotemá chay runata ninqa asuykamuwananpaqña.

³⁸ —Qaripapas otaq warmipapas aycha qaranpi yuraq manchakuna rikuriruptinqa

³⁹ sacerdotem qawanqa paykunapi mancha rikuriruqta. Sichum tarirunqa oqeyariq manchakunata hinaptinqa chayqa suchillam. Chay runaqa asuykuwanmanñam.

⁴⁰ —Huk qaripa chukchankuna wichiruptin qalakuruptinqa payqa kachkan paqla umallam. Payqa asuykamuwanmanmi.

⁴¹ Urkun lawmanta pelon wichiruptin qalakuruptinpas payqa kachkan paqla urkullam. Payqa asuykamuwanmanmi.

⁴² Ichaqa umanpa qepa lawnin paqlayasqanpi otaq urkun paqlayasqanpi pukayasqa yuraq llaga rikuriruptinqa chaypiqa hatarichkan lepra onqoymi.

⁴³ Chaytaqa qawanqa sacerdotem. Sichu chay paqlayasqa lawkunapi punkisqa llaga pukayasqa yuraq kaptinqa hinaspa lepra onqoyman rikchakuptinqa

⁴⁴ chay runaqa onqochkan lepra onqoywanmi, chaynaqa amam asuykuwanqachu. Sacerdotemá ninqa ama asuykuwananpaq, chaynataqa ninqa umanpi llagayoq kasqanraykum.

⁴⁵ —Pipas lepra onqoyniyoq runaqa purinqa llikipakusqa pachayoqmi chaynataq tampa umam. Payqa siminta pañuelowan tapakuykuspanmi qayakunqa: “¡Leprawanmi onqochkani! ¡Leprawami onqochkani!” nispa.

⁴⁶ Chayna runaqa llagan chinkanankamam mana asuykuwanmanchu. Chayna runaqa sapallanmi *f**yachanqa campamentomanta hawapi.

Qoqarasqamanta yachachikuykuna

⁴⁷ —Sichu millwamanta pachapi otaq linomanta pachapi qoqarasqa mancha rikuriruptinqa

⁴⁸ chaynataq linomanta otaq millwamanta awasqapi otaq tejesqapi qoqarasqa mancha rikuriruptinqa chaynataq qarapi otaq qaramanta rurasqapi

⁴⁹ verdeyasqa otaq pukayasqa manchakuna rikuriruptinqa chay qoqarasqa manchaqa miraruq qoqaray onqoymi. Chaykunataqa sacerdotemanmá qawachinqaku.

⁵⁰ Hinaptinmi sacerdote qawanqa chay manchata hinaspam imapas chay manchayoq kaqta wichqanqa qanchis punchawpaq.

⁵¹ Chay qanchis kaq punchawpiñataqmi sacerdote qawanqa chay manchata, sichum chay mancha mirarunqa pachapi otaq awasqapi otaq tejesqapi otaq qarapi otaq qaramanta imapas rurasqapi hinaptinqa chay manchaqa miraruq qoqaray onqoymi, imapas chayna kaqkunaqa mana servikuqñam kanqa.

⁵² Chaynaqa imapas chayna qoqarasqa manchayoq kaptinqa rupanankama kañasqam kanqa, chayqariki miraruq qoqaray onqoymi.

⁵³ Ichaqa sacerdote qawaspan chay manchata imapipas mana mirarusqanta tariruspaqa

⁵⁴ kamachinqam chay manchayoq kaqta taqsanankupaq hinaspam sacerdote wichqarunqa huk qanchis punchawpaqraq.

⁵⁵ Imapas chay manchayoq kaqta taqsaruptinkum sacerdote qawanqa. Sichum chay mancha hina kaqlla kaspa mana masyakuptinpas chayqa miraruq qoqaray onqoymi hinaptinqa kañasqam kanqa, chayqariki imapas qoqarachiqmi hawanpi kaspa otaq ukunpi kaspapas.

⁵⁶ Chay manchata sacerdote qawaptin chay taqsasqankupi mancha menosyaruptinqa chay manchasqa partetam llikirunqaku pachamanta kaptin, qara kaptin, awasqa kaptin otaq tejesqa kaptinpas.

⁵⁷ Ichaqa huktawan chay mancha rikuriruspan pachapi otaq awasqapi otaq tejesqapi otaq imapas qaramanta kaqpi miraptinqa chaytaqa kañanqakupunim.

⁵⁸ Ichaqa chay pachata otaq awasqata otaq tejesqata otaq imapas qaramanta kaqta taqsaruptinku chay mancha chinkaruptinqa huktawan taqsaruptinkum chaykunaqa servikunqaña.

⁵⁹ Kaykunatamá yachachikichik qoqarasqa onqoymanta millwamanta pachapi kaptinpas otaq linomanta pachapi kaptinpas otaq awasqapi kaptinpas otaq ima qarapi kaptinpas. Chaynapim yachankichik mayqenmi servikuq kasqantapas otaq mana servikuq kasqantapas.