Levítico 11 - Quechua Ayacucho Bible 1987

Mikuna chaynataq mana mikuna animalkunamanta

^1-2 Israelpa mirayninkunaman ninankupaqmi Moisestawan Aaronta Tayta Dios kaynata nirqa: —Kay allpapi kawsaq llapallan animalkunamantam mikunkichik

³ pallqa atakayoq kutipaq animalkunata.

⁴ Ichaqa kutipaq kaptinpas amam mikunkichikchu camellotaqa, camelloqa kutipaq kaspapas manam pallqa atakayoqchu. Chaytaqa amamá mikunkichikchu.

⁵ —Amam mikunkichikchu purun qowitaqa, chay purun qowiqa kutipaq kaspapas manam pallqa atakayoqchu. Chaytaqa amamá mikunkichikchu.

⁶ —Amam mikunkichikchu liebre sutiyoq animaltaqa, liebreqa kutipaq kaspapas manam pallqa atakayoqchu. Chaytaqa amamá mikunkichikchu.

⁷ —Amam mikunkichikchu kuchitaqa, kuchiqa pallqa atakayoq kaspapas manam kutipanchu. Chaytaqa amamá mikunkichikchu.

⁸ —Chaynaqa amamá mikunkichikchu chay animalkunapa aychantaqa, amataqmi wañusqa kaptinpas tupayllapas-tupaykunkichikchu. Chaykunataqa amamá mikunkichikchu.

⁹ —Yakupi kawsaq llapallan animalkunamantaqa, lamar qochapi kawsaptin otaq mayupi kawsaptinpas mikunkichikqa llika raprayoq hinaspa escamayoq challwakunallatam,

¹⁰ mana escaman kaptinqa amam mikunkichikchu lamar qochapi kawsaptinpas, mayupi kawsaptinpas, hatun kaptinpas otaq taksa kaptinpas.

¹¹ Amamá mikunkichikchu chayna animalkunapa aychantaqa, wañuruptinqa aswanraqmá millakunkichik chayna aychataqa.

¹² Chaynaqa yakupi kawsaq llapallan animalkunamantaqa millakunkichikmá mana llika raprayoq hinaspa mana escamayoq kaptinqa.

^13-19 Raprayoq animalkunamantaqa millakuypaq kasqankuraykum ama mikunkichikchu tukuy rikchaq aguilakunata, tukuy rikchaq ankakunata, aqchikunata, tukuy rikchaq wamankunata, tukuy rikchaq cuervokunata, avestruzkunata, chuseqkunata, qewllakunata, tukukunata, cormorankunata, ibiskunata, cisnekunata, pelicanokunata, ullachkukunata, cigueñakunata, tukuy rikchaq garzakunata, condorkunata, abubillakunata hinaspa masukunata.

²⁰ —Pawaspa pampantapas puriq urukunataqa amam mikunkichikchu.

²¹ Ichaqa pawaspan pampantapas puriq urukunamantaqa mikuwaqchik pawatyaq urukunallatam. Chay urukunapa piernanmi chakinwan iskayman doblasqa kanan chaynapi pawaspan chakinwan takyananpaq.

²² Chay urukunamantam mikunkichik tukuy rikchaq langostakunata, tukuy rikchaq pinki-pinki urukunata, chillikukunata hinaspa saltamontekunata.

²³ Ichaqa amamá mikunkichikchu pawaspa pampantapas puriq llapallan urukunataqa.

²⁴ —Chayna urukuna wañuruptin llachpaq runaqa tutaykunankamam ñoqaman mana asuykuwanqachu.

²⁵ —Pipas chay urukuna wañusqata hoqariqqa pachantam taqsakunqa hinaspam tutaykunankama ñoqaman mana asuykuwanqachu.

²⁶ —Atakayoq animalkunamantaqa amam mikunkichikchu chay animalpa atakan mana pallqa kaptinqa hinaspa mana kutipaq kaptinqa.

²⁷ —Tawa chakiyoq animalkunamantaqa amam mikunkichikchu chay animal purispan chaki plantanwan saruptinqa. Pipas chayna animalkuna wañusqata llachpaqqa tutaykunankamam ñoqaman mana asuykuwanqachu.

²⁸ Chaynataqmi chayna animalkuna wañuruptin pipas hoqariqqa pachanta taqsakunqa hinaspam tutaykunankama ñoqaman mana asuykuwanqachu, chay animalkunataqa millakuypaqmi hapinkichik.

²⁹ —Pampan puriq animalkunamantapas amam mikunkichikchu unchuchukukunata, ukuchakunata, tukuy rikchaq lagartijakunata,

³⁰ sukullukuykunata, cocodrilokunata, lagartokunata hinaspa camaleonkunata.

³¹ —Chaynaqa pampan puriq animalkunamantam chaykunata ama mikunkichikchu. Chayna animalkuna wañuruptin pipas llachparuqqa tutaykunankamam mana asuykuwanqachu.

³² —Chayna animalkuna wañuruspa kullumanta rurasqa imamanpas wichiykuptinqa otaq pachamanpas wichiykuptinqa otaq ima qaramanpas wichiykuptinqa otaq costal rurana ima telamanpas wichiykuptinqa otaq llamkanapaq ima herramientamanpas wichiykuptinqa mana servikuqñam kanqa. Chaykunaqa yakuman challpusqa kaspam tutaykunankama pipapas mana hapinan kanqa, chaymantañam huktawan servikunqa.

³³ —Chayna animalkunamanta huk kaqnin wañuruspan allpa mankaman wichiykuptinqa tukuy imapas chay allpa mankapi kaqmi manaña servikunqachu, chay mankapas pakipasqam kanqa.

³⁴ Ima mikuymanpas chay mankapi yaku tallikuykuptinqa, chay mikuymi manaña servikunqachu, chay mankapi ima tomana kaqpas manañam servikunqachu.

³⁵ Tukuy imamanpas chayna animalkuna wañuruspan wichiykuptinqa mana servikuqñam kanqa, hornocha kaptinpas otaq tullpa kaptinpas pakipankichikmi. Chaykunataqa millakuypaq kasqanraykum millakuypaqña hapinkichik.

³⁶ —Chaywanpas pukyu yakuqa otaq qochachispa tomana yakuqa hina servikuqmi kanqa, ichaqa chayna wañusqa animalkunata llachpaqqa ñoqamanmi ama asuykuwanqachu.

³⁷ —Sichu chayna animalkuna wañuruspan tarpuna muhupa hawanman wichiykuptinqa chay muhutam ama wischunkichikchu aswanqa servikunqam.

³⁸ Ichaqa chayna animalkunamanta wañuruspan nuyusqaña muhupa hawanman wichiykuptinqa chay muhuqa mana servikuqñam kanqa.

³⁹ —Mikunapaq kaq animalnikichikmanta mayqanninpas wañuruptinqa, chay wañusqata tupaykuqmi tutaykunankama mana asuykuwanqachu.

⁴⁰ Chay wañusqa animalpa aychanta mikuqpas pachanta taqsakuspanmi tutaykunankama mana asuykuwanqachu, chay wañuruq animal hoqariqpas pachantamá taqsakunqa hinaspam tutaykunankama mana asuykuwanqachu.

⁴¹ —Amam mikunkichikchu pampan puriq llapallan taksa animalkunataqa. Chayna animalkunaqa millakuypaqmi.

⁴² —Chaynaqa pampan puriq llapallan animalkunamantaqa amamá mikunkichikchu llapallan tawa chakiyoqkunata otaq mas chakiyoqkunatapas. Chaykunaqa millakuypaq animalkunam.

⁴³ Amayá millakuypaqqa kaychikchu pampan puriq taksa animalkunata mikuspaqa otaq wañuruqta llachparuspaqa chaynapi ñoqaman asuykamuwanaykichikpaq.

⁴⁴ Ñoqam kani yupaychasqaykichik Tayta Dios, qamkunaqa ñoqapaqyá sapaqchakuychik hinaspayá chuyanchakuychik ñoqapas chuya kasqayrayku. Pampan puriq taksa animalkunata llachpaspaqa amayá millakuypaqqa kaychikchu.

⁴⁵ Ñoqa Tayta Diosmi Egipto nacionmanta horqomurqaykichik Diosnikichik kanaypaq. Chaynaqa chuyayá kaychik ñoqapas chuya kasqayrayku —nispa.

⁴⁶ Chaykunamá yachachikuyniykuna lliw animalkunamanta, raprayoq animalkunamanta, yakupi kawsaq animalkunamanta hinaspa pampan puriq taksa animalkunamanta.

⁴⁷ Chaynaqa amamá pantarunkichikchu mayqenmi allin animal kasqantapas otaq mayqenmi millakuypaq animal kasqantapas otaq mayqenmi mikuna animal kasqantapas otaq mayqenmi mana mikuna animal kasqantapas.