Levítico 1 - Quechua Ayacucho Bible 1987

Lliw kañana ofrendakunamanta

^1-2 Asuykuna karpamanta Moisesta Tayta Dios qayaspanmi Israelpa mirayninkunata ninanpaq kaynata nirqa: —Qamkunamanta huk kaqnikichik animal ofrendata ñoqa Tayta Diosman apamuwaspanqa presentawananpaqmi apamunqa vacata otaq ovejata otaq cabrata.

³ —Sichu vacakunamanta lliw kañanapaq ofrendan kaptinqa sumaqnin sano torota qowaspanmi ñoqaman asuykuna karpapa punkunpi presentawanqa.

⁴ Chay presentawaqniymi makinta churanqa lliw kañana animalpa umanman hinaptinmi chaskisaq chaynapi huchankunata pampachanaypaq.

⁵ Hina kikintaqmi kuchurunqa uña toropa kunkantaqa ñoqapa qayllaypi hinaptinmi Aaronpa miraynin sacerdotekunañataq yawarninta apamuspan challanqaku altarpa muyuriqninman. Chaykunatam ruranqaku ñoqaman asuykuna karpapa punkunpi.

⁶ Chay presentawaqniymi lliw kañana animalta nakaruspan kuchuparunqa piezan-piezan.

⁷ Hinaptinmi sacerdote Aaronpa mirayninkunañataq ninata ratachinqaku altarpa hawanpi hinaspam yantata hinanqaku chupqallata.

⁸ Chaypa hawanmanmi sacerdotekuna churanqaku piezan-piezan kuchusqa animalta chaynataq chaypa umantawan wirankunatapas.

⁹ Chay presentawaqniymi mayllanqataq animalpa chunchulninkunatawan piernankunata hinaptinmi sacerdoteñataq kañanqa lliwta altarpi. Chay ofrendaqa lliw kañanapaq animalmi hinaspapas ñoqapaq miskillaña asnariq ofrendam.

¹⁰ —Pipapas ovejakunamanta otaq cabrakunamanta ofrendan kaptinqa presentawanqa orqon kaqtam chaynataq sanon kaqtam.

¹¹ Chay presentawaqniymi ñoqa Tayta Diospa qayllaypi animalpa kunkanta kuchurunqa altarpa norte lawninpi. Aaronpa miraynin sacerdotekunañataqmi animalpa yawarninwan challanqaku altarpa muyuriqninman.

¹² Chay presentawaqniymi nakasqan animalta piezan-piezan kuchuparunqa hinaptinmi sacerdoteñataq churanqa umantawan wirankunata altarpi yantapa hawanman.

¹³ Chay presentawaqniymi mayllanqataq animalpa chunchulninkunatawan piernankunatapas chaymi sacerdote presentawaspan lliwta kañanqa altarpi, chay ofrendaqa lliw kañanapaq animalmi hinaspapas ñoqapaq miskillaña asnariq ofrendam.

¹⁴ —Raprayoq animalkunamanta pipapas ofrendan kaptinqa presentawananpaqmi apamunqa qoqñuta otaq palomata.

¹⁵ Chaymi sacerdote altarpi presentawanqa chay raprayoq animalta. Umanta tipiruspam kañanqa altarpa hawanpi, yawarnintañataqmi sutuchinqa altarpa perqanman.

¹⁶ Uytuntapas horqoruspam wischuykunqa uchpakunapa hawanman, chay uchpaqa kachkan altarpa hichpan intipa qespimunan lawpim.

¹⁷ Raprankunamanta sacerdote hapiykuspanmi iskayman chitqarunqa ichaqa amam pasaypaqtachu partirunqa, chaytaqa altarpa hawanpimá kañanqa. Chay ofrendaqa lliw kañanapaq animalmi hinaspapas ñoqapaq miskillaña asnariq ofrendam.