Jueces 8 - Quechua Ayacucho Bible 1987

Madian casta runakunapa reyninkunata Gedeon presochasqanmanta

¹ Efrain casta runakunam ichaqa Gedeonta nirqaku: —¿Imanasqamá kaytaqa rurawankiku? ¿Imanasqamá Madian casta runakunapa contranpi peleaq richkaspaqa manaqa qayamuwarqankikuchu? —nispa. Paywan llumpayta churanakuruspankum piñakururqaku.

² Chaymi Gedeonñataq nirqa: —Qamkunaqa ñoqapa rurasqaymantapas aswan mastam rurarunkichik, ñoqayku Abiezer castakunaqa uvas cosechachkaq hina asllatam rurarqaniku, Efrain castakunañataqmi pallapaq hinalla kachkaspapas astawan mastaraq rurarqankichik.

³ Diosmi Madian casta tropakunapa kamachiqninku Orebtawan, Zeebta qamkunaman qoykusurqankichik, chaynaqa ñoqapa rurasqayqa manam igualanchu qamkunapa rurasqaykichikmanqa —nispa. Chaynata niruptinmi Gedeonpa contranpi piñakuyninku tanirurqa

⁴ kimsa pachak rimaqmasin runakunapiwan Jordan Mayuman Gedeon chayaruspanmi chimparurqaku. Pisipasqa kachkaspankupas enemigonkutam qatirqaku.

⁵ Sucot llaqtaman chayaruptinkum chaypi runakunata Gedeon nirqa: —Ama hina kaspayá kay pusasqay runakunaman as mikuyllaykichiktapas qoykapuwaychik, paykunaqariki pisipasqam kachkanku. Ñoqaykuqa Madian casta runakunapa reynin Zebatawan Zalmunatam qatichkaniku —nispa.

⁶ Hinaptinmi Sucot llaqtapi kamachikuqkunañataq nirqaku: —¿Zebatawan Zalmunataqa hapirunkiñachu tropaykikunaman mikuchinaykupaqqa? —nispa.

⁷ Gedeonñataqmi nirqa: —Zebadatawan Zalmunata makiyman Tayta Dios churaykamuptinmi cuerpoykichikta llikiparusaq chunniqpi kichkakunawan hinaspa qotu-qotukunawan —nispa.

⁸ Chaymanta Penuel llaqtaman chayaruspañataqmi chaypipas hina chaynallatataq mañakurqa hinaptinmi chaypi *f**yachaqkunapas Sucot llaqtayoqkuna hinalla nirqaku.

⁹ Chaymi Gedeonñataq nirqa: —Venceramusqaymanta kutimuspayqa wak torrekichiktam tuñirachisaq —nispa.

¹⁰ Chay Zebawan Zalmuna reykunam kachkarqaku Carcor llaqtapi, paykunawantaqmi kachkarqa yaqa chunka pichqayoq waranqa tropakunapas, chay tropakunaqa karqa intipa qespimunan lawmanta kaq puchuq tropakunam, espadawan peleaq pachak iskay chunkan waranqa soldadokunam wañururqakuña.

¹¹ Gedeonmi karpapi yachaqkunapa purinanku ñanman chayarurqa, chay ñanmi karqa Noba llaqtapa chaynataq Jogbeha llaqtapa intipa qespimunan lawpi, chay tropakunapa campamentontam qonqayllamanta atacarurqa.

¹² Chaymi Zebawan Zalmuna lluptirurqaku hinaptinmi Gedeonñataq qatispan Madian runakunapa chay iskaynin reyninkunata presocharurqa, llapallan tropankunatapas sinchillatañam katkatatarachirqa.

¹³ Hinaptinmi Joaspa churin Gedeon kutimurqa guerramanta Heres Qasanta,

¹⁴ Sucot llaqtapi yachaq huk mozota hapiruspa tapuptinmi chay mozoqa Sucot llaqtapa qanchis chunka qanchisniyoq anciano autoridadkunapa sutinta qellqaykuspa qoykurqa.

¹⁵ Sucot llaqtaman chayaruspanmi chaypi *f**yachaq runakunata Gedeon nirqa: —¿Yuyachkankichikchu Zebamantawan Zalmunamanta? Paykunaraykum penqayman churawaspa niwarqankichik: “¿Zebatawan Zalmunataqa hapirunkiñachu pisipasqa tropaykikunaman mikuchinaykupaqqa?” nispa. ¡Kayqayá chay reykunaqa!

¹⁶ Gedeon chaynata niruspanmi Sucot llaqtapi ancianokunata hapiruspa chunniqpi wiñaq kichkakunawan hinaspa qotu-qotukunawan castigarqa.

¹⁷ Chaynallataqmi Penuel llaqtapi torretapas tuñichispan llaqtapi runakunata wañurachirqa.

¹⁸ Chaymantam Zebatawan Zalmunata Gedeon tapurqa: —Tabor Moqopi wañuchisqaykichik runakunaqa ¿imayna runakunataq karqa? —nispa. Hinaptinmi paykunañataq nirqaku: —Paykunaqa karqa qam kaqllam, sapakamam rikchakurqaku reypa churinman —nispa.

¹⁹ Chaymi Gedeonñataq nirqa: —Wawqeykunam paykunaqa karqa, mamaypa wawankunam paykunaqa karqa. Tayta Diosraykum jurani: Paykunata mana wañuchiptikichikqa ñoqapas manam wañuchikichikmanchu karqa —nispa.

²⁰ Chaymi Gedeon piwi churin Jeterta nirqa: —Wañurachiy kay runata—nispa. Chay mozom ichaqa espadanta mana horqorqachu warmaraq kaspa manchakusqanrayku.

²¹ Hinaptinmi Zebawan Zalmunañataq Gedeonta nirqa: —Qari kaspaykiqa qamyá wañuchiwayku —nispa. Hinaptinmi paykunata kikin Gedeon wañurachispan camellonkunapa kunkanpi llullu killaman rikchakuq adornokunata apakurqa.

²² Hinaptinmi Israel runakunañataq Gedeonta nirqaku: —Madian casta runakunamanta librawachkaspaykikuqa qamyá gobiernawayku, gobiernawachunkutaqyá miraynikikunapas —nispa.

²³ Chaymi Gedeonñataq nirqa: —Manam ñoqapas nitaq mirayniykunapas gobiernaykikumanchu, Tayta Diosmi qamkunataqa gobiernasunkichik.

²⁴ Ichaqa kayllatam mañakuykichik: Sapakamayá qoykuwaychik aretekuna qechumusqaykichikta —nispa. Chay vencerachikuq runakunaqa Ismael casta runakuna kasqankuraykum qori areteyoqkama karqaku.

²⁵ Israel casta runakunam Gedeonta nirqaku: —Tukuy sonqoykumantam qosqaykiku —nispa. Chaymi llikllata mastaykuspa chayman sapakama qechumusqanku aretekunata churarqaku.

²⁶ Gedeonpa mañakusqan qorimanta llapallan aretekunapa llasayninqa karqa yaqa chunka isqonniyoq kilom, ichaqa manam yuparqakuchu llullu killaman rikchakuq adornokunataqa nitaq huk rikchaq aretekunatapas nitaq Madian casta reykunapa grosella pachankunatapas nitaq camellonkunapa kunkanpi collarkunatapas.

²⁷ Chay adornokunamanta huk Efodta Gedeon rurachispanmi churachirqa Ofra llaqtanpi, chay efodtam Israel casta llapallan runakuna pierdekuq warmi hina adorarqaku, chaywanmi huchallikurqa Gedeonpas chaynataq familiankunapas.

²⁸ Chaynapimá Madian casta runakunaqa Israel casta runakunapa qayllanpi humillachisqa karqaku, manañam haykapipas umankutaqa hoqarirqakuchu. Chaylawpiqa manam guerra karqachu tawa chunka wata, Gedeon kawsanankamaqa hawkallamá kawsakurqaku.

Gedeonpa wañukusqanmanta

²⁹ Joaspa churin Jerobaalmi wasinman pasakuspan chaypi *f**yacharqa.

³⁰ Payqa achka warmiyoq kasqanraykum qanchis chunka churiyoq karqa.

³¹ Siquem llaqtapi kaq compañeranpipas karqam Gedeonpa churin, paytam suticharqa Abimelecwan.

³² Joaspa churin Gedeon machuña wañuruptinmi taytan Joaspa sepulturanpi pamparurqaku, chay sepulturam karqa Abiezer castakunapa kasqan Ofra llaqtapi.

³³ Gedeon wañuruptinmi ichaqa Israelpa mirayninkuna yapamanta huchallikurqaku pierdekuq warmi hinam, paykunaqa Baal sutiyoq taytachakunataña adorarqaku, paykunaqa Baal-berit sutiyoq taytachatam diosninkupaq akllakuykurqaku.

³⁴ Chaymi Israelpa mirayninkuna yupaychasqanku Tayta Diosta qonqarurqaku, muyuriqnin nacionkunapi llapallan enemigonkumanta libraqnin Tayta Diostamá qonqarurqaku.

³⁵ Manataqmi reqsikurqakuchu Israel casta runakunapaq Jerobaalwan sutichasqa Gedeonpa tukuy allinkuna rurasqantapas.