Jueces 7 - Quechua Ayacucho Bible 1987

Madian casta runakunata Gedeon vencesqanmanta

¹ Paqarinnintin tutapayta hatariruspankum Jerobaalwan sutichasqa Gedeon hinaspa paywan kaq llapallan runakuna Harod pukyu yakupa ladonpi karpankuta sayachirqaku. Madian casta runakunapa campamentonmi karqa More Moqopa hichpan qechwapi, chay campamentoqa karqa Israel tropakunapa norte lawninpim.

² Hinaptinmi Tayta Dios nirqa Gedeonta: —Madian casta runakunata makikiman churanaypaqqa qanwan kaq runakunam achkallaña kachkan, Israel castakunaqa yanqañataqmi contraypi alabakunman: “Kikiykum librakunikuqa” nispa.

³ Kunanyá runakunaman willachiy: “Pipas manchakuqqa otaq umpu kaq runaqa Galaad orqomantayá kutikuchunku” nispa. Hinaptinmi chay runakunamanta iskay chunka iskayniyoq waranqa kutikuptinku qeparurqaku chunka waranqallaña.

⁴ Aswanqa Tayta Diosmi Gedeonta nirqa: —Runakunaqa achkaraqmi, yakumanyá paykunata pusay chaypim huk kutitawan pruebamusqayki pikunam qanwan rinanta chaynataq pikunam qanwan mana rinantapas —nispa.

⁵ Gedeonmá runakunata pusarqa yakuman, chaypim Gedeonta Tayta Dios nirqa: —Pipas allqo hina qallunwan yaku tomaqtaqa huklawmanmi sayachinki, pipas qonqorakuykuspa yaku tomaqtañataqmi huklawman sayachinki —nispa.

⁶ Makinwan hoqarispa yaku tomaqkunam karqa kimsa pachak qarikuna, wakinkunañataqmi karqa qonqorakuykuspa yaku tomaqkuna.

⁷ Chaymi Gedeonta Tayta Dios nirqa: —Kay kimsa pachak allqo hina yaku tomaq qarikunawan libraspaymi Madian casta runakunata makikiman churasaq, wakinqa sapakamayá maymi kasqanman kutikuchunku —nispa.

⁸ Chaymi mana akllasqa Israel casta runakunata Gedeon kutichirqa wasinkuman ichaqa manaraq pasakuchkaptinkum huñurachirqa qoqawninkutawan cornetankuta, chay kimsa pachak qarikunatañataqmi qeparachirqa. Madian casta runakunapa campamentonqa kachkarqa uray pampapim.

⁹ Chay tutam Gedeonta Tayta Dios nirqa: —Hatarispa uraykamuy Madian casta runakunapa campamentonman, paykunataqa makikimanmi churasaq.

¹⁰ Peleanaykipaq uraykuyta manchakuspaykiqa sirvienteki Furawanyá campamentoman riy,

¹¹ chay campamentopi rimasqankuta uyarispaykim kallpanchakunki hinaspam campamentopa contranpi uraykunki —nispa. Hinaptinmi sirvienten Furawan rirqa armasqa kaq campamentopa patanman otaq campamento cuidaqkunapa kasqanman.

¹² Chay pampapimá Madian casta runakuna, Amalec casta runakuna hinaspa intipa qespimunan lawmanta kaq runakuna aqarway urukuna hina achka-achkallaña mastarayachkasqaku, camellonkupas Lamar Qochapa patanpi aqo hinañam mana yupay atina kachkasqa.

¹³ Campamentoman Gedeon chayaruptinmi soldadomasinman huk runa mosqoyninta kaynata willachkasqa: —Mosqoyniypim qawachkasqani cebada tantata Madian casta runakunapa campamentonkama kuchpakamuchkaqta chaymi karpata hapiruptin karpa wichiykurqa —nispa.

¹⁴ Hinaptinmi chay soldadomasinñataq nirqa: —Chay mosqoyqa Israel casta Joaspa churin Gedeonpa guerrapi ganananmanta willakuymi. Diosmi Madian casta runakunata llapallan campamentontinta Gedeonman qoykunqa —nispa.

¹⁵ Gedeonmi mosqoy willakusqanta hinaspa imam ninanta uyariykuspan Tayta Diosta adorarqa, Israel castakunapa campamentonman kutirispanmi nirqa: —Hatariychikyá, Tayta Diosmi Madian casta runakunapa campamentonta qoykuwasunchik —nispa.

¹⁶ Chay kimsa pachak runakunata kimsaman rakiruspanmi sapakamaman cornetata qorqa, qoykarirqataqmi ukunpi ratachkaq mecheroyoq puyñukunatapas.

¹⁷ Paykunatam nirqa: —Madian casta runakunapa campamentonpa patanman chayaruptiymi qamkunapas rurankichik ñoqapa rurasqayta hina.

¹⁸ Llapallan riqkunawan tocaptiykum qamkunapas tocankichik tukuy campamentopa muyuriqninpi hinaspam qaparinkichik: “¡Tayta Diosrayku hinaspa Gedeonraykum peleaniku!” nispa.

¹⁹ Tutaña yaqa chunka horata campamento cuidaqkunata cambiaruptillankum Gedeonpa pusasqan pachak runakuna campamentoman chayarurqaku hinaspam cornetankuta tocarqaku, sapakamam pakirqaku puyñu apasqankutapas.

²⁰ Chay kimsaman rakisqakunamá tocarqaku cornetankuta hinaspam pakirqakutaq puyñunkutapas. *f**Ichoq makinkuwan mecherota hapispankum *f**alleq makinkuwanñataq cornetata hapirqaku tocanankupaq hinaspam qaparirqaku: —¡Tayta Diosrayku hinaspa Gedeonraykum peleaniku! —nispa.

²¹ Israel casta runakuna sapakama campamentopa muyuriqninpi sayaruptinkum Madian casta runakunaqa lliw tropantin qapariyllawanña lluptirqaku.

²² Kimsa pachak Israel casta runakuna cornetankuta tocaptinmi lliw campamentopi kaq Madian casta runakunata kikinkupurallata Tayta Dios espadawan peleanarachirqa. Paykunaqa lluptirqaku Zerera lawman riq Bet-sita lawkamam chaynataq Tabat lawpa hichpanpi kaq Abel-mehola llaqtapa linderonkamam.

²³ Chaymantam Gedeon qayachirqa Israelpa miraynin Neftaliy ayllu runakunata, Aser runakunata chaynataq llapallan Manases ayllu runakunatapas, paykunataqa qayachirqa Madian casta runakunata qatinankupaqmi.

²⁴ Willakuqkunataqa kacharqataqmi Efrain orqokunapi *f**yachaq llapallan runakunamanpas, paykunatam kaynata nichimurqa: —Rispayá Madian casta runakunata hapimuychik, Bet-bara llaqtapa hichpanpi Jordan Mayupa vadonkunatayá dueñochakamuychik manaraq paykuna chayaruchkaptinku —nispa. Chaymi llapallan Efrain casta runakuna huñunakuruspa Bet-bara llaqtapa hichpanpi Jordan Mayupa vadonkunata dueñochakururqaku.

²⁵ Presocharurqakutaqmi Madian casta tropakunapa iskay kamachiqnintapas otaq Orebtawan Zeebta, chay Oreb sutiyoq runatam wañurachirqaku Oreb sutiyoq qaqapi. Zeebtañataqmi wañurachirqaku Zeeb sutiyoq uvas sarunanku pozopi. Madian casta runakunata qatispankum Rey Orebpa hinaspa Rey Zeebpa umankunata apamurqaku Gedeonman Jordan Mayupa chimpanmanta.