Jueces 6 - Quechua Ayacucho Bible 1987

Gedeon sutiyoq jefenkumanta

¹ Israelpa mirayninkuna Tayta Diospa qayllanpi mana allinta ruraptinkum Madian casta runakunaman qanchis watapaq qoykurqa.

² Madian casta runakunam Israel casta runakunata ñakarichirqaku hinaptinmi Israelpa mirayninkunaqa orqokunapi pakakuna uchkukunata rurarqaku, rurarqakutaqmi machaykunapipas chaynataq sasa qespinakunapipas.

³ Israel casta runakuna tarpuptinkum Madian casta runakuna, Amalec casta runakuna chaynataq intipa qespimunan lawmanta kaq runakunapas paykunapa contranpi hamurqaku.

⁴ Hinaspam chaypi karpankuta sayarachispanku chakrapi kawsayninkutapas tukuqku Gaza llaqtaman chayanankukama. Manam puchuqkuchu kawsaykunatapas, ovejakunatapas, bueyeskunatapas hinaspa asnokunatapas.

⁵ Chay runakunam hamuqku animalnintin karpankunapiwan aqarway uru hina achka achkallaña, paykunapas, camellonkunapas mana yupay atinam karqa, chaynam hamuqku chay allpapi kaqkunata tukunankupaq.

⁶ Chaynapim Madian casta runakunaqa Israel casta runakunata llumpayta wakchayarachirqa chaymi Israelpa mirayninkunaqa Tayta Diosta qaparispa mañakurqaku.

⁷ Israelpa mirayninkuna Madian casta runakunarayku Tayta Diosta qaparispa mañakuptinkumá

⁸ payñataq Israelpa mirayninkunaman kachamurqa paymanta willakuqta, chay willakuqmi Israelpa yupaychasqan Tayta Diospa nisqanta paykunaman kaynata nirqa: —Ñoqam horqomurqani castamasikichikta Egipto nacionpi sirviente kasqankumanta.

⁹ Egipto runakunamantam libramurqani, llapallan ñakarichiqnin runakunamanta libramuspaymi enemigonkuta paykunapa qayllanmanta qarqorqani hinaspam allpankutapas castaykichikkunamanña qorqani.

¹⁰ Paykunatam nirqani: “Ñoqam qamkunapa yupaychasqaykichik Tayta Dios kani, Amor casta runakunapa diosninkutaqa amam manchakunkichikchu, paykunapa allpanpim kunanqa *f**yachachkankichik” nispa. Ichaqa chaynata castamasikichikkunaman nichkaptiypas manam kasukurqankichikchu.

¹¹ Hinaptinmi Tayta Diospa angelnin Ofra llaqtachaman hamuspa chaypi kaq encina sachapa sikinpi tiyaykurqa, chay sacham karqa Abiezer casta Joaspa. Joaspa churin Gedeonmi uvas saruna pozopi trigota wayrachichkarqa, chaypiqa wayrachichkarqa Madian casta runakuna mana rikurunanpaqmi.

¹² Tayta Diospa angelnin rikuriykuspam Gedeonta nirqa: —¡Yaw kallpasapa qari, Tayta Diosmi qanwan kachkan! —nispa.

¹³ Hinaptinmi Gedeonñataq nirqa: —Señorlláy, Tayta Dios ñoqaykuwan kachkaptinqa ¿imanasqamá tukuy kaykunaqa hamuwanku? ¿Maytaq abueloykunapa willawasqanku tukuy admirakuypaq milagrokunaqa? Paykunam willakuqku “Tayta Diosmi Egipto nacionmanta horqomuwarqanchik” nispanku. Kunanñataqmi Tayta Diosqa dejaruwaspanku Madian casta runakunaman qoykuwanku.

¹⁴ Chaymi Gedeonta Tayta Dios qawariykuspan nirqa: —Rispayá kallpaykiman hina Israel casta runakunata Madian casta runakunamanta libramuy. Ñoqam qamtaqa kachachkayki —nispa.

¹⁵ Hinaptinmi Gedeonñataq nirqa: —Ichaqa Señorlláy, ñoqaqa ¿imawantaq librasaq Israel casta runakunataqa? Manases ayllumantapas familiayqa llumpay wakcham, ñoqañataqmi taytaypa churinkunamantapas sullka kaq kani —nispa.

¹⁶ Tayta Diosmi nirqa: —Qamta yanapaptiymi Madian casta runakunataqa vencerunki chulla runata hinalla —nispa.

¹⁷ Chaymi Gedeonñataq nirqa: —Ama hina kaspaykiyá señalta qoykuway rimapayawasqaykimanta.

¹⁸ Kaymantaqa amaraqyá, ripukuychu ofrendayta apamuspay ñawpaqnikiman churamunaykama —nispa. Chaymi Tayta Dios nirqa: —Ñoqaqa suyasqaykim kutimunaykikama —nispa.

¹⁹ Gedeon rispanmi yanururqa huk malta cabrachata, rurarurqataqmi iskay chunka kilo harinamanta mana qonchuyoq tantatapas hinaspam aychata churarqa canastillapi, caldontañataqmi mankapi, chaykunata apaspanmi presentarqa chay encina sachapa sikinpi.

²⁰ Diospa angelninñataqmi Gedeonta nirqa: —Aychatawan mana qonchuyoq tantata kay rumipa hawanman churaspayá caldontañataq talliy —nispa. Chaymi pay rurarqa chaynata.

²¹ Hinaptinmi Tayta Diospa angelninñataq makinpi kaq tawnata haywarispan puntanwan aychata hinaspa mana qonchuyoq tantata tupaykurqa hinaptinmi rumimanta nina rataramuspan aychatawan mana qonchoyoq tantata ruparurqa. Ichaqa Tayta Diospa angelninmi ñawpaqninmanta chinkarurqa.

²² Tayta Diospa angelnin kasqanta Gedeon yacharuspanmi nirqa: —¡Ay Señor Diosnilláy, angelnikipa uyantam rikurullani! —nispa.

²³ Tayta Diosmi ichaqa nirqa: —Ama manchakuychu manam wañunkichu, hawkalla kay —nispa.

²⁴ Chaymi Tayta Diospaq chaypi altarta ruraruspan Gedeon suticharqa: “Tayta Diosmi Hawkayayqa” nispa. Kay libro qellqasqa kasqan punchawkamapas chay altarqa hinallam kachkan Abiezer castapa kasqan Ofra llaqtachapi.

²⁵ Hinaptinmi Tayta Dios chay tutalla Gedeonta nirqa: —Taytaykipa animalninkunamanta qanchis watayoq iskay kaq allinnin toronta hapispayá chaywan tuñichiy taytaykipa Baal sutiyoq taytachanpa altarninta, qoruruytaqyá altarpa ladonpi Asera mamachatapas.

²⁶ Wak qaqapa pantanpiyá yupaychasqayki Tayta Diospaq altarta rurapamuway hinaspayá allinnin torota wañuchipuwaspayki lliwta kañapamuway chay Asera mamacha yantasqayki kaspiwan —nispa.

²⁷ Chaynapimá Gedeonqa chunka sirvientenkunawan Tayta Diospa nisqanta hina rurarqa aswanqa taytanpa familiankunatawan llaqtapi runakunata manchakusqanraykum punchawpi rurayta mana munaspan tutallan rurarqa.

²⁸ Paqarinnintin tutapayta llaqtapi runakuna hatarimuspankum Baalpa altarninta tuñichisqata rikururqaku, qorusqatataqmi rikururqaku chaypa waqtanpi kaq Asera mamachatapas, rikurqakutaqmi altar rurasqanpa hawanpi allinnin toro kañasqatapas.

²⁹ Chaymi runakuna ninakurqaku: —¿Pitaq kaytaqa rurarun? —nispanku. Tapukachanakuspankum nirqaku: —Joaspa churin Gedeonmi kaytaqa rurarun —nispa.

³⁰ Chaymi Joasta nirqaku: —Churikita horqomuy wañuchinaykupaq, payqariki Baal taytachapa altarnintam tuñirachin, qoruruntaqmi chay altarpa waqtanpi Asera mamachatapas —nispa.

³¹ Hinaptinmi chay llapallan contranpi kaqkunata Joas nirqa: —¿Baalpa favorninpichu peleankichik? ¿Paytachu defiendenkichik? Pipas paypa favorninpi peleaqqa kunanpuniyá manaraq achikyachkaptin wañuchun. Sichu Baal dios kaspaqa kikillanyá peleachun altarnin tuñichiqwan —nispa.

³² Chay punchawmantam Gedeonta suticharqaku Jerobaalwan, Jerobaal ninanqa “Baal paywan peleachun” ninanmi, chaynataqa suticharqaku Baalpa altarninta tuñichisqanraykum.

³³ Llapallan Madian casta runakunam, Amalec casta runakunapiwan hinaspa intipa qespimunan lawmanta kaq runakunapiwan huklla huñunakuruspanku Jordan Mayuta chimparurqaku hinaspam Jezreel Pampapi carpankuta sayarachirqaku.

³⁴ Hinaptinmi Tayta Diospa Espiritun Gedeonta huntaykuptin cornetata tocarqa chaymi Abiezer casta runakuna payman huñunakaramurqaku.

³⁵ Hinaptinmi Manasespa llapallan ayllunman willakuqkunata Gedeon kacharqa chaymi Manases ayllu runakuna payman huñunakamurqaku. Willachimurqataqmi Aser ayllumanpas, Zabulon ayllumanpas chaynataq Neftaliy ayllumanpas chaymi paykunapas rirqaku Manases ayllu runakunawan tupanankupaq.

³⁶ Hinaptinmi Gedeon nirqa Diosta: —Sichu Israel castakunata nisqaykipi hina ñoqawan libraptikiqa ñoqam kayta rurasaq:

³⁷ Tutam oveja millwata churasaq erapi, sichu millwallapi sulla kaptin allpañataq chakilla kaptinqa yachasaqmi niwasqaykipi hina Israel casta runakunata ñoqawan libranaykita —nispa.

³⁸ Chaynamá karqa. Tutapaytam Gedeon hatarimuspan millwapi sullata qapirurqa huk tazon huntata.

³⁹ Chaywanpas Gedeonmi Diosta nirqa: —Yapatawan rimariptiyqa amamá contraypiqa piñakunkichu, kunallanñam millwawanqa pruebasqayki. Millwañataqyá kunanqa chaki kachun hinaptin lliw allpañataq sullayoq kachun —nispa.

⁴⁰ Chay tutamá Dios rurarqa chaynata, millwallam chaki kachkasqa, lliw allpañataqmi sullayoq.