Jueces 4 - Quechua Ayacucho Bible 1987

Deborawan Barac guerrapi vencesqankumanta

¹ Aod wañuruptinmi Israelpa mirayninkuna kasqallan Tayta Diospa qayllanpi mana allinta rurarqaku

² chaymi paykunataqa Canaan casta runakunapa reynin Jabinman Tayta Dios qoykurqa. Jabinqa gobiernarqa Hazor llaqtapim, tropanpa kamachiqninmi karqa Sisara, payqa *f**yacharqa Haroset-goim llaqtapim.

³ Chaymi Israelpa mirayninkuna Tayta Diosta qaparispa mañakurqaku. Jabinpaqa guerrapaq fierromanta carretankunam karqa isqon pachak. Israelpa mirayninkunatam iskay chunka wata llumpayta ñakarichirqa.

⁴ Chay tiempopim Israel casta runakunapa gobiernaqnin karqa Diosmanta willakuq Debora sutiyoq warmi, payqa karqa Lapidotpa warminmi.

⁵ Deboraqa costumbrenman hinam tiyaq Efrain Orqokunapi Rama llaqtamanta Betel llaqtaman riq ñanpi otaq Deborapa Palmeran sutiyoq sachapa sikinpi, Israelpa mirayninkunaqa Deboramanmi riqku allin arreglota rurananpaq.

⁶ Neftaliy law Cedes llaqtayoq Abinoampa churin Baracta Debora qayarachimuspanmi nirqa: —Israelpa yupaychasqan Tayta Diosmi kaynata kamachisunki: “Tabor Moqoman rispaykiyá huñumuy Neftaliypa chaynataq Zabulonpa mirayninkunamanta chunka waranqa runakunata.

⁷ Ñoqam pusamusaq Cison Mayu Wayqoman Rey Jabinpa tropankunapa kamachiqnin Sisarata chaynataq carretankunata hinaspa tropankunatapas, chaypim qanpa makikiman churasaq” nispa.

⁸ Hinaptinmi Baracñataq Deborata nirqa: —Ñoqawan riptikiqa risaqmi, mana chayqa manam risaqchu —nispa.

⁹ Chaymi Deborañataq nirqa: —Risaqpunim qanwan ichaqa risqaykipiqa manam qamchu hatunchasqa kanki, Sisarataqa Tayta Diosmi warmipa makinman churaykunqa —nispa. Chaymi Deboraqa hatarispan Baracwan rirqa Cedes llaqtaman.

¹⁰ Cedes llaqtamanmi Barac huñurachirqa Zabulon ayllumanta hinaspa Neftaliy ayllumanta chunka waranqa runakunata. Deborapas paywantaqmi rirqa.

¹¹ Moisespa suegron Hobabpa mirayninkunamanta Cain casta Hebermi castankunamanta rakikuruspan Zaanaim pampapi karpanta sayarachirqa encina sachapa hichpanpi, chay sitioqa karqa Cedes llaqtapa hichpanpim.

¹² Abinoampa churin Barac Tabor Moqoman seqarusqantam Sisaraman willaykurqaku.

¹³ Chaymi Sisarañataq guerrapaq fierromanta isqon pachaknintin carretankunata chaynataq llapallan tropankunata huñurachispan rirqa Haroset-goim llaqtamanta Cison Wayqokama.

¹⁴ Hinaptinmi Baracta Debora nirqa: —Kunan punchawmi Tayta Dios makikiman churaykun Sisarata, kikin Tayta Diosmi ñawpaqnikita richkan —nispa. Chaymi Baracñataq Tabor Moqomanta uraykamurqa chunka waranqa runakunawan.

¹⁵ Hinaptinmi Barac peleaptin Tayta Dios musparachirqa Sisarata chaynataq llapallan carretankunatapas hinaspa llapallan tropankunatapas chaymi Sisaraqa carretanmanta uraykuspan chakillawanña lluptirurqa.

¹⁶ Aswanqa Baracmi qatirqa carretankunatawan tropankunata Haroset-goim llaqtakama chaynapim Sisarapa llapallan tropankunaqa espadawan wañururqa, manam chullallapas puchurqachu.

¹⁷ Chaymi Cain casta Heberpa warmin Jaelpa karpanman Sisara chakillawan lluptiruspa chayarurqa. Chaymanmi ayqekurqa Hazor llaqtapa reynin Jabinqa Cain casta Heberpa ayllunwan hawkalla kasqankurayku.

¹⁸ Sisarata chaskinanpaq Jael lloqsimuspanmi nirqa: —Taytay, yaykukamuy, ama manchakuychu —nispa. Chaymi Jaelpa karpanman yaykuruptin payñataq huk qatawan qataykurqa.

¹⁹ Hinaptinmi Sisara nirqa: —Yakullayki, yakunayawachkanmi —nispa. Hinaptinmi Jaelñataq odrepi lecheta kichaykuspan qoykurqa tomananpaq hinaspam kasqallan qataykurqa.

²⁰ Chaymi Sisara nirqa: —Karpapa punkunpiyá sayaykamuy, pipas hamuspa tapusuptikiqa kaynatam ninki: “Manam pipas kaypiqa kanchu” nispa.

²¹ Sisarañataqmi sinchi pisipasqa kasqanrayku puñururqa chaymi Heberpa warmin Jaelñataq karpanpa estacantawan mazota hapiykuspan upallalla Sisaraman asuykurqa hinaspam sentidonpi estacawan allpaman takarurqa chaynapimá wañururqa.

²² Chaymi Sisarata Barac qatichkaptin Jael chaskiqnin lloqsimuspa nirqa: —Yaykumuy, maskasqayki qarita qawachisqayki —nispa. Barac chay warmipa kasqanman yaykuruptinmi Sisaraqa sentidonpi estacawan takasqa wañusqaña kachkasqa.

²³ Chay punchawpimá Canaan casta runakunapa reynin Jabinta Dios humillachirqa Israelpa mirayninkunapa qayllanpi

²⁴ chaymi Israelpa mirayninkuna astawan kallpanchakururqaku Canaan casta runakunapa reynin Jabinpa contranpi payta chinkachinankukama.