Jueces 3 - Quechua Ayacucho Bible 1987

Canaan allpapi puchuq runakunamanta

¹ Israel casta runakunata pruebananpaqmá Tayta Diosqa puchuchirqa nacionkunata. Chay tiempopi kaq Israel casta runakunaqa manaraq nacesqankuraykum Canaan allpapi guerrakunataqa mana qawarqakuchu.

² Chay Israel casta runakuna mana yachasqankuraykum guerrapi peleayta yachanankupaq kay runakunata puchuchirqa:

³ Filistea casta runakunamantam puchuchirqa pichqa kamachikuqkunata, puchuchirqataqmi Canaan casta llapallan runakunatapas, Sidon llaqtayoq runakunatapas chaynataq Baal-hermon Orqomanta qallarispa Hamat lawman yaykuna qasakama otaq Libano Orqopi *f**yachaq Hiv casta runakunatapas.

⁴ Chay runakunamá karqa Israel casta runakunata Tayta Dios pruebananpaq chaynapi kamachikuyninkuna kasukusqanta otaq mana kasukusqantapas qawananpaq, chay kamachikuyninkunatamá abuelonkuman Tayta Dios kamachirqa Moiseswan.

⁵ Chaynapimá Israelpa mirayninkunaqa yacharqa Canaan casta runakunawan, Het casta runakunawan, Amor casta runakunawan, Ferez casta runakunawan, Hiv casta runakunawan hinaspa Jebus casta runakunawan.

⁶ Chaymi warmi churinkutapas hinaspa qari churinkutapas casarachirqaku chay nacionniyoq runakunawan, paykunaqa chay runakunapa taytacha-mamachankutañam adorarqaku.

Otoniel sutiyoq jefenkumanta

⁷ Israelpa mirayninkunamá Tayta Diospa qayllanpi mana allinta ruraspanku yupaychasqanku Tayta Diosta qonqarurqaku hinaspam Baal sutiyoq taytachakunataña chaynataq Asera sutiyoq mamachakunataña adorarqaku.

⁸ Hinaptinmi Tayta Dios piñakururqa Israel casta runakunapa contranpi hinaspam Aram-naharaim nacionpa reynin Cusan-risataim runamanña qoykurqa chaynapim Israelpa mirayninkunaqa Cusan-risataim reytaña pusaq wata servirqaku.

⁹ Chaymi Israelpa mirayninkuna qaparispa mañakurqaku Tayta Diosta hinaptinmi Calebpa sullka wawqen Cenazpa churin Otonielta libraqninkupaq hatarichirqa.

¹⁰ Tayta Diospa espiritun payta yanapaptinmi gobiernarqa Israel casta runakunata. Otoniel peleaq lloqsiptinmi Aram nacionpa reynin Cusan-risataim runata Otonielman Tayta Dios qoykurqa, chaynapimá Cusan-risataim reyta vencerurqa.

¹¹ Chaymi Israel nacionpi guerra mana karqachu tawa chunka wata, chaymantañam Cenazpa churin Otonielqa wañukurqa.

Aod sutiyoq jefenkumanta

¹² Israelpa mirayninkunam kasqallan Tayta Diospa qayllanpi mana allinta rurarqaku, chaymi Moab nacionpa reynin Eglonta Israel casta runakunapa contranpi Tayta Dios kallpanchaykurqa, chaynataqa rurarqa Israel casta runakuna Tayta Diospa qayllanpi mana allinta rurasqankuraykum.

¹³ Chay Rey Eglonmi Amonpa hinaspa Amalecpa mirayninkunata huñuruspan Israel casta runakunawan pelearqa hinaspam Palmeras sutiyoq llaqtata dueñochakururqa.

¹⁴ Chaymi Israelpa mirayninkuna Moab nacionpa reynin Eglonta servirqaku chunka pusaqniyoq wata.

¹⁵ Israelpa mirayninkuna qaparispa Tayta Diosta mañakuptinkum hatarichirqa libraqninkuta, chay libraqninkuqa karqa Benjamin ayllumanta kaq Gerapa churin Aod sutiyoq *f**ichoq maki runam. Paywanmi Israelpa mirayninkuna contribucionta apachirqaku Moab nacionpa reynin Eglonman.

¹⁶ Chay Aod sutiyoq runam parte metro sayayniyoq iskay lawnin filoyoq espadata rurakuruspan pachanpa ukun *f**alleq lawninpi churakuykurqa.

¹⁷ Hinaspam Moab nacionpa reynin Eglonman contribucionta aparqa. Eglonqa llumpay wirasapam karqa.

¹⁸ Eglonman contribucionta qoykuspanmi chay contribucion apaysiqmasinkunata aviarurqa.

¹⁹ Gilgal llaqtapi taytachakunapa kasqankama riruspanmi kutirqa Rey Eglonman hinaspam payta nirqa: —Reylláy, secretom qanman ninay kachkan —nispa. Chaymi reyñataq serviqninkunata nirqa: —¡Upallaychik! —nispa. Hinaptinmi paypa ñawpaqninpi llapallan kaqkuna lloqsirqaku.

²⁰ Wayraparikuna salapi Rey Eglon sapallan tiyachkaptinmi, Aod asuykuspan nirqa: —Diospa palabranmi qanman willanay kachkan —nispa. Chaymi Rey Eglon tiyananmanta hatariruptin

²¹ Aodñataq *f**ichoq makinwan *f**alleq lawninmanta espadanta horqoykuspan reypa wiksanta tuksirurqa.

²² Chaymi espadaqa cabontin yaykururqa wiranpi chinkarunankama, Aodqa espadantapas mana horqoptinmi Rey Eglonpa hatun ispayninpas tallikururqa.

²³ Aodñataqmi corredorman lloqsiramuspan salapa punkunkunata wichqarurqa cerrojowan.

²⁴ Aod pasakuptinñam reypa serviqninkuna hamurqaku chaymi salapa punkunkunata wichqasqata qawaykuspanku nirqaku: —Payqa ispakuchkanchá —nispa.

²⁵ Rey manaña salapa punkunkunata kichamuptinmi suyasqankumanta muspaypi hinaña kaspanku llavewan punkuta kicharqaku hinaptinmi reyninkuqa pampapi wañusqa chutarayachkasqa.

²⁶ Reypa serviqninkuna suyanankukamam Aodqa lluptirurqa hinaspam Gilgal llaqtapi taytachakunapa kasqanta pasaruspan Seirat lawman ayqekurqa.

²⁷ Chay lawman chayaruspanñataqmi cornetata tocarqa Efrain Orqokunapi hinaptinmi Israelpa mirayninkuna paywan kuska orqomanta uraykamurqaku, Aodñataqmi paykunapa puntanta rispa.

²⁸ nirqa: —Qatiwaychik, enemigonchik Moab casta runakunatam Tayta Dios makinchikman churaykun —nispa. Chaymi payta qatispa Moab lawman chimpana Jordan Mayupa vadonta dueñochakururqaku, manam chaynintaqa pitapas pasachirqakuchu.

²⁹ Chay tiempopim Moab casta runakunamanta wañurachirqaku yaqa chunka waranqa valeroso soldadokunata, manataqmi chulla runatapas lluptichirqakuchu.

³⁰ Chaynapimá Moab nacionniyoq runakunaqa Israel casta runakunapa humillachisqan karqa hinaptinmi chay lawpi guerra mana karqachu pusaq chunka wata.

Samgar sutiyoq jefenkumanta

³¹ Chay Aodpa qepantañataqmi jefe karqa Anatpa churin Samgar, paymi soqta pachak Filistea casta runakunata wañurachirqa bueyes tuksina puyawan, paypas Israel casta runatam librarqa.