Jueces 21 - Quechua Ayacucho Bible 1987

Benjamin casta qarikunapaq warmi maskasqankumanta

¹ Israel runakunam Mizpa llaqtapi juramentarqakuña kaynata: —Amam mayqanninchikpas Benjamin castakunawanqa casarachisunchu warmi churinchikta —nispa.

² Ichaqa runakuna Betel llaqtapi huñunakuruspankum Diospa qayllanpi tukuylla punchaw sinchita waqaspanku nirqaku:

³ —Israelpa yupaychasqan Dios Taytallayku ¿imataq kay pasaruwanku Israel nacionpi huk ayllu faltananpaq —nispa.

⁴ Paqarinnintin punchaw runakuna tutapayta hatariruspankum chaypi altarta ruraspanku ofrecerqaku lliw kañana animalkunatawan allinlla kasqankumanta ofrendakunata.

⁵ Israelpa mirayninkunam tapunakurqaku: —Llapallan Israel ayllumanta mayqanninchiktaq Tayta Diospa qayllanpi huñunakuyman mana rirqachu? —nispa. Paykunam juramentarqakuña kaynata: —Tayta Diospa qayllanpi Mizpa llaqtapi huñunakuyman mana riqkunaqa wañuchisqapunim kanqaku —nispa.

⁶ Israelpa mirayninkunam sinchi llakisqa kachkarqaku Benjamin ayllu runakunata desgracia pasarusqanmanta, paykunam nirqaku: —Kunanmi Israel castamanta huk ayllu chinkarun.

⁷ ¿Imatataq rurasunchik Benjamin ayllu puchuq runakunapaq chaynapi warmiyoq kanankupaq? Tayta Diosrayku juraspam nirqanchik: “Warmi churinchikwanqa amam casarachisunchu” nispa.

⁸ ¿Chaynaqa kachkanchu huk kaqnin Israel ayllumanta Mizpa llaqtapi Tayta Diospa qayllanman mana hamuq? —nispa. Chaymi yacharurqaku chay guerrapaq Galaad lawpi kaq Jabes llaqtamanta mana mayqenninpas chay huñunakuyman risqanta.

⁹ Runakunata yupaptinkumá Galaad lawpi *f**yachaq Jabes llaqtamanta qarikuna mana pipas karqachu.

^10-11 Chaymi huñunakuypi llapallan kaqkuna Galaad law Jabes llaqtapi kaqkunaman kacharqaku chunka iskayniyoq waranqa soldadokunata chaynapi qarikunata, wawakunata hinaspa mana doncella kaq warmikunata lliwta wañuchimunankupaq.

¹² Hinaptinmi Galaad law Jabes llaqtapi tarimurqaku tawa pachak doncellakunata hinaspam Canaan law Silo llaqtapi campamentoman pusamurqaku.

¹³ Llapallan huñunakuypi kaqkunam Rimon Qaqapi Benjamin castakunaman kacharqaku hinaspam hawkayaypiña kanankupaq willachimurqaku.

¹⁴ Hinaptinmi Benjamin castakuna kutiramuptinku Israel castakuna Galaad law Jabes llaqtayoq puchuq warmikunata warminkupaq qorqaku, warmikunam ichaqa mana hayparqachu llapallan qarikunapaq.

¹⁵ Israel castakunam llakikurqaku Benjamin castakunamanta Israel ayllukunapi huk aylluta Tayta Dios chinkarachisqanrayku.

¹⁶ Huñunakuypim ancianokuna ninakurqaku: —¿Imatataq rurasunchik mana warmiyoq puchuqkunapaq? Benjamin casta warmikunam wañuchisqa karunku,

¹⁷ Benjamin castamanta lluptiqkunaqa mirayniyoqmi kananku chaynapi Israel nacionpi huk ayllu mana chinkachisqa kananpaq.

¹⁸ Ñoqanchik Israelpa mirayninkunaqa manam casarachichwanchu warmi churinchikkunawanqa. Ñoqanchikqa juraspam nirqanchik: “Ñakasqayá kachun Benjamin castakunawan pipas warmi churinta casarachiqqa” nispa.

¹⁹ Sapa watam Tayta Diospaq Silo llaqtapi hatun fiestata ruranku. Chay Silo llaqtaqariki kachkan Betel llaqtapa norte lawninpim otaq Betel llaqtamanta Siquem llaqtaman riq ñanpa intipa qespimunan lawninpim otaq Lebona llaqtapa surlawninpim.

²⁰ Israel castakunapa ancianonkunam Benjamin castakunaman nichimurqaku kaynata: —Silo llaqtapa hichpan uvas huertakunapi pakakuspam

²¹ listollaña kankichik. Maypacham Silo llaqtamanta warmikuna tusustin lloqsimuptinkum qamkunapas uvas huertakunapi pakakusqaykichikmanta lloqsimuspa sapakama sipasta hapikunkichik warmikichikpaq hinaspam Benjamin law llaqtaykichikman pasakunkichik.

²² Sichum paykunapa taytan otaq turin reclamanankupaq hamuwaptinkuqa kaynatam nisaqku: “Qoykullawaykuyá, ñoqaykum Jabes llaqtapi kaqkunawan peleamuspayku mana llapan qarikunapaqchu warmikunata pusamurqaniku. Chaywanpas juramentomantaqa manam huchayoqchu kankichik mana casarachisqaykichikrayku” nispa.

²³ Benjaminpa mirayninkuna chaynata ruraspankum sapakama hapikurqaku sipasta warminkupaq. Tusuqkunamanta suwakuspankumá kutikurqaku maymi herencia allpankuman hinaspam llaqtakunata mosoqmanta ruraspanku chaypi *f**yacharqaku.

²⁴ Israelpa wakin mirayninkunapas chaymantam kutikurqaku sapakama ayllunkuman hinaspa familiankuman. Sapakamamá lloqsirqaku tocanciankuman otaq maymi herencia allpankuman.

²⁵ Chay tiempokunapim Israel nacionpi manaraq rey kasqanrayku sapakama munasqankuta rurarqaku.