Jueces 20 - Quechua Ayacucho Bible 1987

Gabaa llaqtayoqkunata vengakusqankumanta

¹ Israelpa llapallan mirayninkunam Mizpa llaqtaman rispanku huñunakururqaku huk runa hinalla Tayta Diospa qayllanpi, huñunakururqakumá Dan llaqtamanta, Beerseba llaqtamanta hinaspa Galaad lawmantapas.

² Chaynapimá karqaku Israel ayllukunapa llapallan kamachiqninkuna Diospa runankunapa huñunakuyninpi. Guerrapi peleaqkunam karqaku tawa pachak waranqa chakillawan puriqkuna.

³ Benjaminpa mirayninkunam yacharurqaku Israelpa mirayninkunaqa Mizpa llaqtaman risqankuta. Hinaptinmi Israelpa mirayninkuna chay Leviy ayllu runata tapurqaku imaynam chay warmita wañuchisqankumanta.

⁴ Chaymi Leviy ayllu runa otaq wañuq warmipa compañeron kaynata nirqa: —Compañeraywanmi Benjamin lawpi Gabaa llaqtaman chayaramurqaniku chaypi tuta samanaykupaq.

⁵ Hinaptinmi Gabaa llaqtapi runakuna contraypi hatarispanku wasita tuta muyururqaku wañuchiwayta piensaspanku hinaspam compañeraytaña abusarqaku wañurachinankukama.

⁶ Chaymi compañeraypa cuerponta cuartezaruspay Israel ayllukunapa dueñochakusqan enteron allpaman aparachirqani chaynapi chay mana allin rurasqankumanta hinaspa Israel nacionpi penqaypaq kaq rurasqankumanta llapallaykichik yachanaykichikpaq.

⁷ Chaynaqa kunanyá Israelpa mirayninkuna kasqaykichikrayku llapallaykichik imam ruranaykichikta tanteanakuychik —nispa.

⁸ Hinaptinmi llapallan runakuna huk runa hinalla hatarispanku nirqaku: —Manam mayqanninchikpas kutisunchu karpanchikmanqa nitaq wasinchikmanpas.

⁹ Kunanpunim suerteananchik Gabaa llaqtapi kaqkunawanqa pikunam peleananmanta.

¹⁰ Israelpa llapallan ayllunmantam sapa pachakmanta rakisunchik chunka qarikunata, sapa waranqamantañataqmi rakisunchik pachak qarikunata, chunka waranqamantañataqmi rakisunchik waranqa qarikunata, chay rakisqanchik qarikunam tropakunapaq mikuyta apanqaku, wakinñataqmi Benjamin lawpi Gabaa llaqtaman rispa Israel nacionpi penqaypaq rurasqankumanta vengakamunqaku.

¹¹ Chaymi Israel casta llapallan runakuna Gabaa llaqtapa contranpi peleanankupaq huñunakururqaku huk runa hinallaña.

¹² Israelpa ayllun runakunam kacharqaku Benjaminpa llapallan ayllunman kaynata nispanku: —¿Imanasqamá kay mana allintaqa rurarunku qamkuna ukupiqa?

¹³ Kunanyá makiykuman churamuy Gabaa llaqtapi chay penqaypaq ruraq qarikunata wañuchinaykupaq chaynapi chay mana allinta Israel nacionmanta chinkachinaykupaq —nispa. Benjamin ayllu runakunam ichaqa Israelpa miraynin ayllumasinkunapa nisqanta mana kasurqakuchu

¹⁴ aswanqa Gabaa llaqtamanmi lliw llaqtankumanta huñunakururqaku Israel castamasinkupa contranpi peleanankupaq.

¹⁵ Wakin llaqtakunamanta kaq Benjaminpa mirayninkunam chay tiempopi yupasqa karurqaku iskay chunka soqtayoq waranqa peleaqkuna, Gabaa llaqtapi *f**yachaq qanchis pachak akllasqa qarikunam ichaqa mana yupasqachu karqaku.

¹⁶ Benjamin ayllu runakunamantam karqa qanchis pachak akllasqa *f**ichoqwan warakaqkuna. Paykunaqa chukchata warakaspapas hapichiqkupunim.

¹⁷ Castamasinku Israel castakunañataqmi karqaku guerrapi tawa pachak waranqa peleaqkuna.

Benjamin ayllupa contranpi peleasqankumanta

¹⁸ Israelpa mirayninkunam Betel llaqtaman rirqaku Diosta tapukunankupaq: —Ñoqaykumanta ¿pitaq puntata rinqa Benjaminpa mirayninkunapa contranpi peleaq? —nispa. Hinaptinmi Tayta Dios nirqa: —Juda castakunam puntata rinqaku —nispa.

¹⁹ Israel castakunam tutapayta hatariruspanku Gabaa llaqtapa chimpanpi campamentonkuta sayarachirqaku.

²⁰ Benjamin castakunapa contranpi peleaq rispankum Gabaa llaqtapa contranpi peleanankupaq kinrayninman churakurqaku.

²¹ Hinaptinmi Benjaminpa mirayninkuna Gabaa llaqtamanta lloqsimuspanku chay punchawpi wañurachirqaku Israelpa mirayninkunamanta iskay chunka iskayniyoq waranqa qarikunata.

²² Aswanqa Israel casta runakuna kallpanchakuspankum huktawan peleanankupaq kinrayninman churakurqaku punta kaq punchawpi peleasqanku sitiollapi.

²³ Chaynataqa rurarqaku Israelpa mirayninkuna tutaykuqkama Tayta Diospa qayllanpi waqasqankuraykuñam, chaypim Tayta Diosta tapurqaku kaynata: —¿Huktawanchu risaqku castamasiyku Benjamin aylluwan peleaq? —nispa. Hinaptinmi Tayta Diosñataq nirqa: —Riychikyá paykunapa contranpi peleaq —nispa.

²⁴ Chaymi Israelpa mirayninkunaqa chay iskay kaq punchawpi kasqallan rirqaku Benjamin ayllupa contranpi peleaq.

²⁵ Ichaqa Benjamin castakuna iskay kaq punchawpi Gabaa llaqtamanta lloqsiramuspankum Israelpa mirayninkunata wañurachirqaku chunka pusaqniyoq waranqa qarikunata, paykunaqa karqa espadawan peleaq qarikunam.

²⁶ Hinaptinmi Israelpa llapallan mirayninkuna rirqaku Betel llaqtaman Tayta Diospa qayllanpi waqaspa mañakunankupaq hinaspam chay punchaw ayunarqaku tutaykunankama, presentarqakutaqmi lliw kañana animalkunatapas chaynataq allinlla kasqankumanta ofrendakunatapas.

^27-28 Chay tiempopim Dioswan contrato rurasqanku Baul kachkarqa Betel llaqtapi, sacerdotenñataqmi karqa Eleazarpa churin Finees, paymi karqa Aaronpa willkan. Israelpa mirayninkunam yapatawan Tayta Diosta tapurqaku: —¿Huktawanchu peleamusaqku aylluyku Benjamin castakunapa contranpi icha manañachu? —nispa. Chaymi Tayta Dios nirqa: —Rispayá peleamuychik, paqarinmi makikichikman churamusaq —nispa.

²⁹ Hinaptinmi Israel castakuna churarurqaku Gabaa llaqtapa muyuriqninpi wateqaqkunata,

³⁰ Israelpa wakin mirayninkunañataqmi kimsa kaq punchawpi Benjaminpa mirayninkunawan peleanankupaq Gabaa llaqtapa contranpi churakururqaku wakin kutipi hina.

³¹ Hinaptinmi Benjaminpa mirayninkuna Israel tropakunawan peleanankupaq llaqtamanta karunchakururqaku hinaspam wakin kutipi hina wañuchiyta qallarirqaku. Wañuchirqakumá Betel llaqtaman hinaspa Gabaa llaqtaman riq ñankunapipas chaynataq campokunapipas yaqa kimsa chunka qarikunata.

³² Benjaminpa mirayninkunam piensarqaku: —Ñoqanchikpa qayllanchikpim ñawpaqta hina vencesqa karunku —nispa. Israelpa mirayninkunam ninakurqaku: —Lluptikuspayá llaqtamanta ñankama karuncharachisunchik —nispa.

³³ Ichaqa llapallan Israel castakunam maymi kasqankumanta lloqsirqaku peleanankupaq hinaspam kinrayninman churakururqaku Baal-tamar lawpi. Chaynataqmi Israel castamanta wateqaqkunapas Gabaa llaqtapa muyuriqnin campopi pakakusqankumanta lloqsimurqaku.

³⁴ Chaynapim Israelpa llapallan mirayninkunamanta Gabaa llaqtapa contranpi ñawpaqman rirqaku chunka waranqa akllasqa qarikuna. Nisyu-nisyuta peleasqankuraykum Benjamin castakunaqa mana yacharqakuchu pierdesqankuta.

³⁵ Tayta Dios yanapaptinmi Israel castakuna vencerurqa Benjamin castakunata, wañurachirqakumá chay punchawpi iskay chunka pichqayoq waranqa pachaknin Benjamin casta runakunata, paykunaqa karqa espadawan peleaq qarikunam.

³⁶ Benjaminpa mirayninkunam qawakuykurqaku vencesqa kasqankuta. Israelpa mirayninkunam ayqeq tukurqaku Benjamin castakuna qatiptinku. Israelpa mirayninkunaqa confiakurqakumá wateqaqkuna Gabaa llaqtata vencerunankumanta.

³⁷ Chay wateqaqkunamá Gabaa llaqtata apurawman atacarurqaku hinaspam kayman-chayman kallpakacharuspanku espadawan wañurachirqaku chaypi *f**yachaqkunata.

³⁸ Chay wateqaqkunam ñawpaqtaraq yachachinakurqaku Israel castamanta kaq wakin runakunawan llaqtata dueñochakuruspankuqa hatu-hatunta qosnichinankupaq,

³⁹ chaynapi Israel runakunamanta lluptiqkuna chay señalwan kutirimuspa Benjamin castakunata atacanankupaq. Benjamin castakunam wañuchiyta qallaykuspanku wañurachirqaku yaqa kimsa chunka Israel runakunata, chaywanmi piensarqaku: —Ñoqanchikpa qayllanchikpim ñawpaq hina vencesqa karunku —nispa.

⁴⁰ Ichaqa llaqtamantam hatu-hatun qosni lloqsimuyta qallaykamurqa chaymi Benjamin castakuna qepankuta qawariykuptinku lenguachkaq nina chaynataq qosnipas cielokama haypachkasqa.

⁴¹ Israel castamanta wakin runakuna kutiriykuptinmi Benjamin casta runakunaqa sinchita mancharikururqaku paykunapa hawanman hatun desgracia hamusqanta qawakuykuspanku.

⁴² Benjamin casta runakunaqa Israel wakin runakunamanta chunniqman riq ñanninta lluptiyta munaspapas manam guerramanta lluptiyta atirqakuchu, llaqtamanta lloqsimuqkunam harkaruspanku wañuchirqaku.

⁴³ Israel castakunamá Benjamin castakunapa ñanninta wichqaruspa tukuparurqaku Gabaapa chimpan intipa qespimunan lawkama.

⁴⁴ Benjamin castakunamantam wañurachirqaku chunka pusaqniyoq waranqa qarikunata, paykunaqa karqa espadawan peleaq qarikunam.

⁴⁵ Puchuqninkunam chunniqman lluptirurqaku Rimon Qaqa lawman hinaptinmi ñanpi wañurachirqaku pichqa waranqa qarikunata. Gidom lawkama qatispankum wañurachirqaku iskay waranqa qarikunatawan.

⁴⁶ Benjamin castakunamanta chay punchawpi llapallan wañuqkunam karqa iskay chunka pichqayoq waranqa qarikuna, paykunam karqa espadawan peleaq valeroso qarikuna.

⁴⁷ Ichaqa Benjamin castamanta soqta pachak qarikunam lluptikurqaku chunniq lawpi Rimon Qaqa lawman, chaypim *f**yacharqaku tawa killa.

⁴⁸ Chaymantam Israel runakuna kutimuspanku Benjaminpa mirayninkunata espadawan wañuchirqaku sapa llaqtapi, wañurachirqakumá runakunatapas, animalkunatapas chaynataq llapa ima tarisqankutapas, kañaykurqakutaqmi llapallan llaqtakunatapas.