Jueces 2 - Quechua Ayacucho Bible 1987

Boquim lawman Tayta Diospa angelnin risqanmanta

¹ Gilgal llaqtamanta Boquim lawman Tayta Diospa angelnin rispanmi Israel casta runakunata nirqa: —Ñoqam horqomurqaykichik Egipto nacionmanta hinaspam abueloykichikman juramentowan qosqay allpaman yaykuchirqaykichik. Paykunamanmi nirqani: “Qamkunawan rurasqay contratoytaqa manam yanqachasaqchu

² ichaqa kay allpapi yachaqkunawanqa amam contratota rurankichikchu aswanqa altarninkutapas tuñichinkichikmi” nispa. Chaynata nichkaptiypas manam kasukurqankichikchu. ¿Imanasqamá chaynataqa rurarunkichik?

³ Chayraykum nikichik: “Chay runakunataqa manam qayllaykichikmanta qarqosaqchu, paykunaqa qamkunapaqmi trampa hina kanqa, diosninkupas qamkunapa urmachiqnikichikmi kanqa” nispa.

⁴ Tayta Diospa angelnin chay palabrakunata Israelpa llapallan mirayninkunaman niykuptinmi qaparispa waqarqaku.

⁵ Chayraykum chay sitiota suticharqaku Boquinwan hinaspam animalkunata wañuchispa Tayta Diosta adorarqaku.

Josueypa wañukusqanmanta

⁶ Runakunata Josuey aviaruptinmi Israelpa mirayninkuna sapakama pasakurqaku tupaqnin allpankuta dueñochakunankupaq.

⁷ Runakunam adorarqaku Tayta Diosta Josuey kawsanankama chaynataq Josueypa ancianomasinkuna kawsanankamapas, chay ancianokunam qawarqaku Israel casta runakunapaq Tayta Diospa tukuy ima rurasqankunata.

⁸ Tayta Diospa serviqnin Nunpa churin Josueymi ichaqa wañukurqa pachak chunkan watayoqña.

⁹ Hinaptinmi pamparurqaku Timnat-heres llaqta law allpanpi, chay Timnat-heres llaqtaqa karqa Efrain castakunapa orqonpim otaq Gaas moqopa norte lawninpim.

¹⁰ Chaynapimá Canaan allpaman yaykuq llapallan miraykunapas wañukurqaku abuelonkuna hina hinaptinmi paykunapa qepantaqa huk mirayña nacemurqa, paykunaqa manam reqsirqakuchu Tayta Diosta nitaqmi yacharqakuchu Israelpa mirayninkunapaq imam Tayta Diospa rurasqantapas.

Israel castakunam karunchakunku Tayta Diosmanta

¹¹ Israelpa mirayninkunam Tayta Diospa qayllanpi mana allinta rurarqaku, paykunaqa Baal sutiyoq taytachakunatañam adorarqaku.

¹² Egipto nacionmanta horqomuqninku abuelonkupa yupaychasqan Tayta Diosmantam karunchakururqaku. Taytacha-mamachakunata qatispañam muyuriqninkupi runakunapa diosninkuta adorarqaku chaynapim Tayta Diosta piñachirqaku.

¹³ Tayta Diosta qepanchakuruspankum Baal sutiyoq taytachatawan Astarot sutiyoq mamachataña adorarqaku.

¹⁴ Chaymi Israel castakunapa contranpi Tayta Dios piñakuruspan salteaqkunamanña qoykurqa salteasqa kanankupaq. Muyuriqninkupi enemigonkumanña qoykuptinmi manaña defiendekuyta atirqakuchu.

¹⁵ Sapa kuti guerraman riptinkupas Tayta Diosmi paykunapa contranpi karqa, ñawpaqmantaraq nisqanpi hina hinaspa paykunapa contranpi jurasqanman hina. Ichaqa chayna sinchita ñakarichichkaspanpas

¹⁶ kikin Tayta Diosmi jefekunata hatarichirqa salteaqkunamanta librananpaq

¹⁷ ichaqa Israelpa mirayninkunaqa manataqmi jefekunatapas kasukurqakuchu, paykunaqa pierdekuq warmi hinam taytacha-mamachakunataña adorarqaku. Tayta Diospa kamachikuyninkunatam ñawpa abuelonkuqa kasukurqaku, paykunam ichaqa chaylla chay kamachikuyninkunamanta rakikururqaku, manam ñawpa abuelonku hinachu rurarqaku.

¹⁸ Hinaptinmi Tayta Dios paykunapaq jefekunata hatarichispan chay jefekunata yanaparqa. Chay jefe kawsanankamaqa paykunatam enemigonkunamanta librarqa. Tayta Diosmá paykunata llakipayarirqa ñakariypi hinaspa llakikuypi kaspa waqasqankuta uyarispan.

¹⁹ Aswanqa jefe wañuruptinqa kasqallanmi ñawpaq rurasqankuman kutikuqku hinaspam abuelonkumantapas aswan penqaypaq kaqtaraq ruraqku. Taytacha-mamachakunataña servispankum adorarqaku. Manam Wanakuqkuchu mana allin rurayninmantawan rumi sonqo kayninkumantaqa.

²⁰ Chaymi Israel casta runakunapa contranpi Tayta Dios piñakuruspan nirqa: —Kay nacionniyoq runakunaqa abuelonkuman kamachisqay contratota qepanchakuruspam nisqaykunatapas mana kasukunkuchu

²¹ chayraykum ñoqapas mana qarqosaqchu Josuey kawsachkaspanraq mana qarqosqan nacionkunataqa.

²² Chaynapim Israel casta runakunataqa chay nacionkunawan ñoqa Tayta Dios pruebasaq chaynapi ñoqapa munasqayman hina kawsasqankuta otaq mana kawsasqankutapas yachanaypaq, abuelonkuqa munasqayman hinam kawsarqaku —nispa.

²³ Chayraykumá Tayta Diosqa saqerurqa chay nacionniyoq runakunataqa, manamá chaypunillachu qarqorurqa, manataqmi Josueywanpas qarqochirqachu.