Jueces 19 - Quechua Ayacucho Bible 1987

Leviy ayllu runapa compañeranta imam rurasqankumanta

¹ Chay tiempokunapim Israel nacionpi rey manaraq karqachu. Efrain orqokuna cantonpim *f**yacharqa forastero hina Leviy ayllumanta huk qari, paymi Juda lawpi Belen llaqtamanta warmita pusamurqa compañeranpaq.

² Hinaptinmi compañeranqa hukwan tupakuruspan Juda law Belen llaqtapi taytanpa wasinman pasakurqa. Chaypi tawa killa kachkaptinmi

³ compañeron qatirqa kuyakuyllawan rimapayaspa kutichimunanpaq. Pusarqataqmi huk sirviententawan iskay asnokunatapas hinaptinmi chay compañeranqa taytanpa wasinpi chaskirqa.

⁴ Compañeranpa taytanpas qawaykuspanmi kusikuywan chaskirqa wasinpi, harkaptinmi qeparurqa kimsa punchaw, chaypitaqmi mikurqapas, tomarqapas hinaspa puñurqapas.

⁵ Tawa kaq punchawpim ripukunanpaq tutapayta hatarirurqaku ichaqa pasakunankupaqña kachkaptinmi chay compañeranpa taytan chay masanta nirqa: —Mikuykuyraqyá aschallatapas ñanpi mana pisiparunaykipaq, chaymantañachiki pasakunkiqa —nispa.

⁶ Chaymi iskayninku tiyaykurqaku mikunankupaq hinaspa tomanankupaq hinaptinmi sipaspa taytan chay qarita nirqa: —Ama hina kaspayá kunan tutatawanraq quedaykuy kusikunanchikpaq —nispa.

⁷ Hatariruspan pasakunanpaqña kachkaptinpas suegron ruegapayaptinmi huktawan chay tuta chaypi puñurqa.

⁸ Pichqa kaq punchawpim tutapayta pasakunanpaq hatarirurqa hinaptinmi sipaspa taytan nirqa: —Kunanpas mikuykuyraqyá kallpanchakunaykipaq, kaypiraqyá karisunchik tardeyanankama —nispa. Chaynapimá iskayninku mikurqaku.

⁹ Compañeranwan hinaspa sirvientenwan pasanankupaq chay qari kaptinmi sipaspa taytan otaq suegron payta nirqa: —Tardeyamuspam tutaykamuchkanña, chaynaqa kunan tutatawanyá kaypi samakuy. Kayqayá punchawqa tukurunña, chaynaqa kusisqa kanaykipaqyá kaypi samakuy. Paqarin tutapaytañachiki hatariruspa wasikiman ripukunki —nispa.

^10-11 Chay runam ichaqa mana munarqachu chay tutatawan samayta, iskay silla asnonkunapi cargakuykuspanmi pasakurqa compañeranpiwan, Jebus llaqtapa otaq Jerusalen llaqtapa chinpanman chayaruptinkum yaqaña intipas seqaykuchkarqa chaymi Leviy casta patronninta sirvienten nirqa: —Hakuchikyá Jebus runakunapa llaqtanpi samakuq —nispa.

¹² Chaymi patronninñataq nirqa: —Mana Israelpa mirayninkunapa llaqtanmanqa manam richwanchu, Gabaa llaqtakamayá hakuchikqa —nispa.

¹³ Samaspaqariki-samasunchik Gabaa llaqtapiñach otaq Ramá llaqtapiñach —nispa.

¹⁴ Richkaspankum inti seqaykuytaña chayarurqaku Benjamin law Gabaa llaqtapa hichpanman.

¹⁵ Gabaa llaqtamanmá muyuykurqaku chaypi samapakunankupaq ichaqa pipas mana samachiyta munaptinmi llaqtapa plazanpi tiyaykurqaku.

¹⁶ Hinaptinmi huk machucha campopi llamkasqanmanta tutaykuqtaña hamuchkasqa, payqa Efrain orqokunamanta kasqanraykum yacharqa Gabaa llaqtapi forastero hina. Chay llaqtapi *f**yachaqkunaqa karqaku Benjaminpa mirayninkunam.

¹⁷ Chay campomanta hamuq machucham llaqtapa plazanpi tiyaq viajerota rikuruspan tapurqa: —¿Maymantaq richkanki? ¿Maymantataq hamuchkanki? —nispa.

¹⁸ Hinaptinmi payñataq nirqa: —Ñoqaykuqa Juda lawpi Belen llaqtamantam hamuchkaniku hinaspam Efrain law orqokunapa cantonpi *f**yachasqayman richkaniku. Ñoqaqa rirqani Juda law Belen llaqtamanmi, kunanñataqmi Tayta Diospa santuarionman richkani ichaqa manam pipas wasinpi samaykachiwanchu.

¹⁹ Asnoykupaqqa kachkanmi pajapas chaynataq pastopas. Ñoqapaqpas compañeraypaqpas chaynataq sirvienteypaqpas kapuwachkankum tantawan vinopas, manamá imapas pisipuwankuchu —nispa.

²⁰ Ichaqa chay machucham nirqa: —Wasiymanyá hakuchik, imapas pisisuqnikitaqa ñoqam qosqayki, kunan tutaqa amayá plazapiqa puñuychu —nispa.

²¹ Wasinman pusaruspamá asnonkunaman qaramurqa hinaptinmi chay samakuqkunaqa chakinkuta mayllakuruspa mikurqaku hinaspa tomarqaku.

²² Ichaqa kusisqa kachkaptinkum chay llaqtapi mana allin qarikuna muyururqa chay wasita, punkuta takaspankum wasipa dueñon machuchata nirqaku: —Wasikiman yaykumuq runata horqomuy abusanaykupaq —nispa.

²³ Wasipa dueñon machucham ichaqa lloqsiramuspan ruegakurqa: —Runamasillaykuna, amayá kay penqaypaq kaqtaqa ruraychikchu, kay viajeroqa wasiypim samakuchkan.

²⁴ Kachkanmi doncella churiy, kay qaripapas kachkantaqmi warmin, paykunata horqomuptiyá munasqaykichikta ruraychik ichaqa amayá kay qariwanqa penqaypaq kaqtaqa ruraychikchu —nispa.

²⁵ Aswanqa chay runakunam mana munarqakuchu uyariyta chaymi Leviy casta runa compañeranta calleman horqoramuptin paytaña abusarqaku tukuylla tuta achikyanankama, achikyamuchkaptinñam dejarurqaku.

²⁶ Achikyamuchkaptinñam chay warmi kutimurqa machuchapa wasinpi compañeronpa kasqanman hinaspam punkupa waqtanpi wichiykurqa, chaypim karqa achikyanankama.

²⁷ Compañeronmi tutapayta hatariruspan punkuta kichaykurqa ripukunanpaq ichaqa compañeranmi wasipa punkunpa ñawpaqninpi chutarayachkasqa chay wasiman yaykuna rumiman hapipakuykuspa.

²⁸ Chaymi compañeron nirqa: —Hatariy, hakuchik —nispa. Ichaqa manam rimarirqañachu wañusqa kasqanrayku chaymi compañeranpa cuerponta asnonman churkuykuspa pasakurqa maymi *f**yachasqanman.

²⁹ Wasinman chayaruspanmi cuchillota hapiykuspan compañeranpa cuerponta chunka iskayniyoq parteman cuartezarurqa hinaspam chay piezakunata apachirqa Israel nacionpi sapa aylluman.

³⁰ Llapallan chayta qawaqkunam nirqaku: —Israelpa mirayninkuna Egipto nacionmanta lloqsimusqankumantapunim kunankama mana haykapipas kayna pasaqtaqa rikurqanchikchu. Kaymanta tanteanakuspayá imam rurananchikmanta rimanakusunchik —nispa.