Jueces 18 - Quechua Ayacucho Bible 1987

Dan ayllu runakunawan Micaia atipanakusqanmanta

¹ Chay tiempokunapim Israel nacionpi rey manaraq karqachu. Chay tiempokamam Dan ayllupa herencian manaraq karqachu Israel ayllukunapa herencian ukupi chaymi maskachkarqaku maypim *f**yachanankupaq.

² Chaymi Danpa mirayninkuna Zora llaqtamantawan Estaol llaqtamanta pichqa kallpasapa qarikunata kacharqaku chaynapi allpata reqsimuspa qawamunankupaq, paykunatam nirqaku: —Rispayá allpata qawamuychik —nispa. Chay pichqantin runakuna Efrain orqokunaman chayaruspankum Micaiapa wasinman rirqaku samakunankupaq.

³ Micaiapa wasinpa hichpanpiña kachkaspankum Leviy casta mozopa vozninta musyarurqaku hinaspam yaykuruspa tapurqaku: —¿Pitaq pusamusurqanki kayman? ¿Imatataq ruranki kaypi? ¿Imanasqataq kaypi kachkanki? —nispa.

⁴ Hinaptinmi willakurqa Micaiapa paywan rurasqanmanta chaynataq sacerdote kananpaq contratasqanmantapas.

⁵ Chaymi paykuna nirqaku: —Kunanyá Diosta tapuykapuwayku kay risqaykupi allinpas otaq mana allinpas kamunaykumanta yachaykunaykupaq —nispa.

⁶ Hinaptinmi chay Leviy casta mozo sacerdoteñataq nirqa: —Hawkallayá riychik, Tayta Diosmi risqaykichikpi yanapamusunkichik —nispa.

⁷ Chaymantam chay pichqa qarikuna pasarqaku Lais llaqtaman. Chay llaqtapi *f**yachaq runakunaqa Sidon llaqtapi yachaqkunapa costumbrenman hinam confiakuspa hawkalla yachakuqku, chay allpapiqa mana pipapas imanasqanmi hawka kakuqku, chaypiqa manamá pipas munaychakurqachu. Paykunaqa Sidon runakunamanta karupi kasqankuraykum mana piwanpas hukllawakuqkuchu.

⁸ Chay qawamuqkuna Zora llaqtapi hinaspa Estaol llaqtapi kaq ayllunkuman kutimuptinkum paykuna tapurqaku: —¿Imaynataq kamurqankichik? —nispa.

⁹ Hinaptinmi paykunañataq nirqaku: —Allinsum, hakuchikyá hinaspa peleamusunchik. Chay qawamusqayku allpaqa allinsum kasqa, amayá qellakuychikchu, apurawmanyá allpata dueñochakamusunchik.

¹⁰ Rispaykichikmi tarimunkichik hawka *f**yachakuq runakunata hinaspa mana imapa pisinan hatun allpata. Chay allpataqa Diosmi qoykusunkichik —nispa.

¹¹ Dan ayllu soqta pachak qarikunam guerrapaq allin armasqakama lloqsirqaku Zora llaqtamantawan Estaol llaqtamanta.

¹² Juda lawman chayaruspankum Quiriat-jearim llaqtapa hichpanpi otaq intipa seqaykunan lawpi campamentonkuta sayarachirqaku chaymi chay sitiota suticharqaku “Danpa Campamenton” nispanku kay libro qellqasqa kasqan punchawkama.

¹³ Chaymanta pasaspankum chayarurqaku Efrain orqokunapi kaq Micaiapa wasinman.

¹⁴ Hinaptinmi chay Lais allpa reqsimuq pichqa runakuna ayllun runakunaman nirqaku: —¿Yachankichikchu? Kay wasikunapiqa Dios adoranapaqmi kachkan huk Efod, kachkantaqmi wasiyoqpa taytachanpas chaynataq tallasqa taytachawan fundisqa taytachapas. Chaynaqa yachankichikñam imam rurayta —nispa.

¹⁵ Chayman chayaruspankumá Leviy casta mozopa wasinman otaq Micaiapa wasinman yaykuruspanku: —¿Imaynallataq kachkanki? —nirqaku.

¹⁶ Danpa mirayninkunamanta guerrapaq allin armasqa soqta pachak qarikunañataqmi suyachkarqaku zaguan punkupi.

¹⁷ Hinaptinmi allpa reqsimuq pichqa qarikuna wasiman yaykuruspanku apakunankupaq hapirqaku tallasqa taytachatawan fundisqa taytachata, hapirqakutaqmi Dios adorana efodtapas chaynataq wasiyoqpa taytachantapas. Sacerdotewan guerrapaq allin armasqa soqta pachak qarikunañataqmi kachkarqaku zaguan punkupi.

¹⁸ Micaiapa wasinman yaykuruspankum horqomurqaku tallasqa taytachatawan fundisqa taytachata, horqomurqakutaqmi Dios adoranapaq efodtapas chaynataq wasiyoqpa taytachantapas. Chayta rikuruspanmi sacerdote nirqa: —¿Imapaqtaq chaykunataqa horqochkankichik? —nispa.

¹⁹ Hinaptinmi paykunañataq nirqaku: —Upallay, ama imatapas rimarispa ñoqaykuwan hamuy, qamqa sacerdoteyku kaspam taytayku hinaña kanki. Huk familiallapaq sacerdote kanaykimantaqa ¿manachu aswan allin kanman Israel castakunamanta kaq ayllupaq sacerdote kayniki? —nispa.

²⁰ Sonqonpaq hina kaptinmi chay sacerdoteqa Dios adorana efodtawan wasiyoqpa taytachanta aparikurqa, aparikurqataqmi tallasqa taytachatawan fundisqa taytachatapas hinaspam chay runakunawan pasakurqa.

²¹ Dan ayllu runakunam pasakurqaku wawa-churinkuta animalninkuta hinaspa kapuqninkuta ñawpachispanku.

²² Micaiapa wasinmanta karunchakuruptinkuñam Micaiawan vecinonkuna huñunakuruspanku Danpa mirayninkunata qatirqaku.

²³ Danpa mirayninkunata qayaykachaptinkum Danpa mirayninkunañataq muyuriykuspanku Micaiata nirqaku: —¿Imataq pasasunki qayaykachamuwanaykikupaq? —nispa.

²⁴ Hinaptinmi Micaiañataq nirqa: —Rurachikusqay taytachaykunatam apakuchkankichik, pusakuchkankichiktaqmi sacerdoteytapas ¿mana imayoqta saqeruwachkaspaykichikchu tapuwankichikraq: “¿Imataq pasasunki?” nispa?

²⁵ Hinaptinmi Danpa mirayninkunañataq nirqaku: —Ama qaparkachamuychu yanqañataq piñakuruspa huk kaqniyku wañurachisunkiman qamtapas chaynataq familiaykikunatapas —nispa.

²⁶ Danpa mirayninkuna pasakuptinmi Micaiaqa achka kasqankuta qawaykuspa wasinman kutikurqa.

²⁷ Danpa mirayninkunam Micaiapa rurasqankunata apaspanku hinaspa sacerdotentapas pusaspanku chayarurqaku Lais llaqtaman, chaypi runakunaqa mana pipapas imanasqanmi hawkalla kachkasqaku hinaptinmi Danpa mirayninkuna espadawan wañuchispanku llaqtankutapas kañaykurqaku.

²⁸ Paykunaqa Sidon llaqtamanta karupi kasqankuraykum wakin runakunawanpas mana hukllawakurqakuchu chayraykum defiendeqninkuta mana tarirqakuchu. Lais llaqtaqariki karqa Bet-rehob law qechwapim. Danpa mirayninkunam chaypi *f**yacharqaku kasqallan llaqtata hatarichispanku.

²⁹ Chay llaqtatam “Dan” nispa suticharqaku Israelpa churin Dan abuelonkupa sutinman hina. Ñawpaqtaqa chay llaqtapa sutinmi karqa Lais.

³⁰ Danpa mirayninkunam chay tallasqa taytachata chaypi churarqaku adoranankupaq, sacerdotenku kananpaqñataqmi churarqaku Gersonpa churinta otaq Moisespa willkan Jonatanta. Jonatanpa mirayninkunapas sacerdotekunam karqaku Israel nacioninkumanta preso pusasqa rinankukama.

³¹ Micaiapa tallachisqan taytachamá paykunawan karqa Diospa santuarion Silo llaqtapi kanankama.