Jueces 16 - Quechua Ayacucho Bible 1987

Gaza llaqtapi Sanson kasqanmanta

¹ Gaza llaqtaman Sanson rispanmi chaypi rikururqa huk chuchumika warmita hinaspam paywan puñurqa.

² Gaza llaqtapi runakuna llaqtankuman Sansonpa hamurusqanta yacharuspankum llaqtapa muyuriqninpi churakururqaku. Tukuy tutam qasillalla chay llaqtapa punkunkunata wateqarqaku: “Achikyaruptinñam wañurachisunchik” nispa.

³ Sansonmi ichaqa puñurqa chawpi tutakamalla. Chay horata hatariruspanmi llaqtapa zaguanninpa punkunkunata pilarnintinta hinaspa cerrojontinta hombrorikuspa pasakurqa. Rispanmi Hebron llaqtapa chinpan moqopa puntankama zaguan punkuta aparurqa.

Sansonta Dalila engañasqanmanta

⁴ Chaymantam Sansonqa Sorec Wayqopi huk warmita kuyarurqa, paypa sutinmi karqa Dalila.

⁵ Dalilaman Filistea runakunapa kamachiqninkuna chayaruspankum nirqaku: —Sansonta llullallawan tapuruy imapim sinchi kallpam kasqanmanta. Imaynatataq ñoqaykuqa venceruspa chaqnaruymanku paypi munaychakurunaykupaq, rurasqaykimantaqa sapakamam qosqaykiku chunka kimsayoq kilo qollqeta —nispa.

⁶ Dalilam Sansonta nirqa: —Ama hina kaspaykiyá imapim sinchi kallpayki kasqanmanta willaykuway. ¿Imawantaq chaqnarachikuwaq munaychakusqa kanaykipaq? —nispa.

⁷ Chaymi Sansonñataq nirqa: —Sichu chaqnaruwanmanku manaraq chakisqa qanchis waskakunawan hinaptinqa kallpay pisiruptinmi wakin qarikuna hinallaña rikurirusaq —nispa.

⁸ Filistea runakunapa kamachiqninkunaman Dalila willaykamuptinmi aparamurqaku manaraq chakisqa qanchis waskakunata hinaptinmi Dalila chaykunawan Sansonta chaqnarurqa.

⁹ Filistea runakuna Dalilapa cuartonpi pakakusqa kachkaptinkum Dalila nirqa: —¡Sanson, Filistea runakunam hapirusuchkankiña! —nispa. Chaymi Sanson waskakunata tipirurqa ninapa rupasqan lino qaytuta hinalla chaynapim mana yacharqakuchu imapim kallpan kasqanta.

¹⁰ Chaymantam Sansonta Dalila nirqa: —Llullakuspam yanqakunallata niwanki, kunanyá ichaqa niykuway imawanmi chaqnasqa kanaykimanta —nispa.

¹¹ Sansonmi nirqa: —Sichu chaqnaruwanmanku mosoq waskakunawan teqoy-teqoyta hinaptinqa kallpay pisiruptinmi wakin qarikuna hinallaña rikurirusaq —nispa.

¹² Chaymi Dalila mosoq waskakunawan chaqnaruspan nirqa: —¡Sanson, Filistea runakunam hapirusuchkankiña! —nispa. Filistea runakunam cuartopi pakakusqa kachkarqaku ichaqa Sansonmi chay chaqnachikusqan waskakunata brazonkunamanta tipirurqa huk qaytuta hinalla.

¹³ Hinaptinmi Sansonta Dalila nirqa: —Kunankamam yanqakunallata niwaspayki llullakuwachakanki. Kunanyá ichaqa niykuway ¿imawantaq chaqnasqa karuwaq? —nispa. Chaymi Sansonñataq nirqa: —Sichu qanchisman simpasqa chukchayta telarpi telawan awaruwaq hinaspañataq sumaqta perqaman estacaruwaq hinaptinqa kallpay pisiruptinmi wakin runakuna hinaña rikurirusaq —nispa. Chaymi Sansonta Dalila puñurachispa qanchisman simpasqa chukchankunata telarpi telawan awarurqa

¹⁴ hinaspam perqaman estacaruspan nirqa: —¡Sanson, Filistea runakunam hapirusuchkankiña! —nispa. Ichaqa Sansonmi puñusqanmata rikchariruspan estacata telarnintinta aysarurqa.

¹⁵ Chaymi Dalila nirqa: —¡Yaw llulla! ¿Imanasqataq “Kuyaykim” nispa niwanki mana kuyawachkaspaykiqa? Ñam kimsa kutikamaña engañaruwanki, manamá willawankichu imapim sinchi kallpayki kasqantaqa —nispa.

¹⁶ Dalilam sapa punchaw chay tapukuywan hikutaspan Sansonta rabiachirqa hinaptinmi pasaypaqtaña amiruspan

¹⁷ chay secretonta willaykurqa kaynata: —Manam haykapipas chukchaytaqa rutuwarqakuchu, ñoqaqa mamaypa wiksanmantapunim Diospaq rakisqa kani. Sichu chukchayta ruturuwaptinkuqa kallpaymi ñoqamanta chinkarunman, kallpay pisiruptinmi wakin runakuna hinallaña rikuriruyman —nispa.

¹⁸ Sansonpa tukuy secretonta Dalila yacharuspanmi Filistea runakunapa kamachiqninkunata qayarachimuspan nirqa: —Kunanqa hamuychikyá, payqa willaykuwanñam tukuy secretonta —nispa. Chaymi Filistea runakunapa kamachiqninkuna hamurqaku qollqeta aparikuspanku.

¹⁹ Dalilam moqonkunapa hawanpi Sansonta puñurachirqa hinaspam huk qarita qayaykuspan qanchisman simpasqa chukchanta kachiy-kachiyta ruturachirqa, paypa kallpan chinkaruptinmi ñakarichiyta qallaykuspan

²⁰ nirqa: —¡Sanson, Filistea runakunam hapirusuchkankiña! —nispa. Puñusqanmanta Sanson rikchariruspanmi piensarqa: —Kunanpas wakin kutipi hinam librakurusaq —nispa. Ichaqa manam yacharqachu Tayta Dios paymanta karunchakurusqanta.

²¹ Filistea runakuna Sansonta hapiruspankum ñawinkunata horqorurqaku hinaspam aparqaku Gaza llaqtaman, chaypim broncemanta cadenawan watasqata carcelpi kaq molinota kutachirqaku.

²² Ichaqa rutusqa chukchanmi kasqallan wiñayta qallarirqa.

Sansonpa wañukusqanmanta

²³ Filistea runakunapa kamachiqninkunam huñunakururqaku Dagon sutiyoq taytachankuta adoraspa animalkunata wañuchipunankupaq, paykunam kusikuspa nirqaku: Diosninchikmi Sansonta qoykuwanchik. Enemigonchik runatam qoykuwanchik.

²⁴ Wakin runakunapas Sansonta qawaykuspankum diosninkuta yupaycharqaku kaynata: Diosninchikmi Sansonta qoykuwanchik. Enemigonchik runatam qoykuwanchik. Chakranchikkuna purmachiqtam qoykuwanchik. Ayllunchikkuna wañuchiqtam makinchikman churaykun.

²⁵ Anchata kusikuspankum nirqaku: —Sansonta pusachimuychik asichiwananchikpaq —nispa. Sansonta carcelmanta pusamuptinkum paykunapa qayllanpi asichiqninku karqa. Chaymantañataqmi Sansonta pilarkunapa chawpinman sayaykachirqaku.

²⁶ Chaymi aysaqnin warmata Sanson nirqa: —Llapchaykachiway templo takyachiq pilarkunata chaykunapi tawnapakuykunaypaq —nispa.

²⁷ Chay templopim kachkarqaku huntay-huntayllaña qarikunawan warmikuna. Filistea runakunapa llapallan kamachiqninkunapas chaypim kachkarqaku, templopa altosninpipas yaqa kimsa waranqa qarikunawan warmikunam kachkarqaku Sansonpa asichisqanta qawaspanku.

²⁸ Hinaptinmi Tayta Diosta Sanson mañakuspan nirqa: —Señor Dioslláy, kunanllañayá yuyariykuway. Diosnilláy, kunan kutillañayá kallpanchaykullaway ñawiykunamanta Filistea runakunata vengakurunaypaq —nispa.

²⁹ Sansonmi templopa iskay pilarninkunaman hapipakuykuspan tanqaspan

³⁰ nirqa: —Wañusaqyá Filistea runakunawan kuska —nispa. Chaynata nispanmi llapallan kallpanwan templo takyachiq pilarkunata tanqarqa hinaptinmi templo wichiykurqa kamachikuqkunapa hawanman chaynataq chaypi kaq runakunapa hawanmanpas. Wañuyninpiraqmi Sansonqa wañurachirqa kawsayninpi wañuchisqanmantapas aswan mastaraq.

³¹ Sansonpa wawqenkuna taytanpa llapallan ayllunkunapiwan hamuruspankum aparqaku Sansonpa cuerponta hinaspam pamparqaku Zoramanta Estaolman riq sitiopi, paytaqa pamparurqaku taytan Manoapa sepulturanpim. Sansonmi Israel casta runakunata gobiernarqa iskay chunka wata.