Jueces 15 - Quechua Ayacucho Bible 1987

¹ Unay tiempomantañam trigo rutuy tiempopi cabrachata Sanson aparikuspan warmin watukuq kutirqa. Chayaruspanmi suegronta nirqa: —Warmiypa kasqan cuartomanmi yaykusaq —nispa. Chaymi Suegronñataq mana munaspan

² nirqa: —Ñoqaqa piensarqani cheqnisqaykitam chaymi casararachirqani amigoykiwanña aswanqa sullka ñañanmi kachkan paymantapas aswan buenamoza, paywanñayá casarakuruy mayorninpa rantinpi —nispa.

³ Hinaptinmi Sansonñataq nirqa: —Chaynaqa mana huchayoqmi kasaq Filistea casta runakunata mana allinta ruraspayqa —nispa.

⁴ Sansonmi campoman pasaspan hapiramurqa kimsa pachaq atoqkunata, iskay atoqpa chupanta tinkiruspam yantata wataykurqa chawpinman.

⁵ Chaymantam yantata rataykachispan atoqkunata kachaykurqa Filistea runakunapa kawsayninman chaymi montonasqa gavillakunatawan sayaq kawsaykunata ruparurqa, ruparurqataqmi uvaskunatapas chaynataq aceituna sachakunatapas.

⁶ Hinaptinmi Filistea runakuna nirqaku: —¿Pitaq kayta rurarun? —nispa. Hinaptinmi nirqaku: —Timnat llaqtayoq runapa masan Sansonmi kaytaqa rurarun warminta suegron qechuruspan amistadninwan casararachisqanrayku —nispa. Chaymi Filistea runakuna hamuruspanku warmintawan taytanta kañarurqaku.

⁷ Sansonñataqmi paykunata nirqa: —Kay rurasqaykichikmanta vengakuspayñam ñoqaqa samasaq —nispa.

⁸ Chaymi mana llakipayaspa Sansonqa tullunkupas pakipakunankama wañurachirqa mancharikuypaqta. Chaymanta rispanmi Etam Qaqa machaypi *f**yacharqa.

Asnopa kakichunwan enemigonkunata Sanson vencesqanmanta

⁹ Filistea runakuna hamuruspankum Juda lawpi campamentonkuta sayarachirqaku Lehi lawkama.

¹⁰ Chaymi Juda lawpi *f**yachaq runakuna paykunata tapurqaku: —¿Imanasqataq contraykupi peleaq hamurunkichik? —nispa. Chaymi Filistea runakunañataq nirqaku: —Imaynam rurawasqankuman hina ruranaykupaqmi Sanson chaqnaq hamuniku —nispa.

¹¹ Hinaptinmi Juda lawmanta kimsa waranqa qarikuna Etam Qaqa machayman rispanku Sansonta nirqaku: —¿Manachum qamqa yachanki Filistea runakunaqa ñoqanchikpi munaychakusqanta? ¿Imanasqataq kaytaqa ruraruwankiku? —nispa. Hinaptinmi Sansonñataq nirqa: —Paykunapa imaynam rurawasqanta hinam ñoqapas paykunata rurarqani —nispa.

¹² Chaymi Juda runakuna nirqaku: —Ñoqaykum hamuniku qamta chaqnaspayku Filistea runakunapa makinman churamunaykupaq —nispa. Hinaptinmi Sansonñataq nirqa: —Jurawaychik ama wañuchiwanaykichikpaq —nispa.

¹³ Chaymi paykunañataq nirqa: —Manam wañuchisqaykikuchu, chaqnaruspallaykum Filistea runakunaman qosqaykiku —nispa. Iskay mosoq waskakunawan chaqnaruspankum qaqamanta pusamurqaku.

¹⁴ Lehi lawman chayarachimuptinkum Filistea runakuna kusikuymanta qaparistin lloqsimurqaku Sansonwan tupanankupaq ichaqa Tayta Diospa Espiritun payta yanapaptinmi brazonkunapi chaqnasqa waskakunata tipirurqa rupasqa lino waskata tipichkaq hinalla hinaptinmi makinkunamanta wichirurqa.

¹⁵ Chayllaraq wañuruq asnopa kakichunta tariruspam chaywan wañurachirqa waranqa Filistea runakunata.

¹⁶ Chaymi Sanson nirqa: Asnopa kakichunwanmi monto-montonta rurarurqani. Asnopa kakichunwanmi waranqata wañurachirqani.

¹⁷ Rimayta tukuruspanmi asnopa kakichunta wischururqa hinaspam chay sitiota suticharqa “Ramat-lehi” nispa.

¹⁸ Chaymantam Sanson sinchita yakunayarachikuspa Tayta Diosta mañakurqa: —¿Kaynasuta vencerachiwachkaspachu kunanñataq yakumanta wañurachiwanki kay mana señalasqa runakunapa makinpi? —nispa.

¹⁹ Chay Lehi lawpi rumipa uchkunmanta Dios yakuta lloqsirachimuptinmi Sanson tomaykuspa kallpanchakururqa. Chayraykum chay sitiota suticharqa “En-hacore” nispa, chay pukyuqa Lehi lawpim karqa kay libro qellqasqa kasqan punchawkama.

²⁰ Sansonmi Israel nacionpi iskay chunka wata gobiernarqa Filistea runakunapa munaychakusqan punchawkunapi.