Jueces 13 - Quechua Ayacucho Bible 1987

Sansonpa nacesqanmanta

¹ Israelpa mirayninkunam huktawan Diospa qayllanpi mana allinta rurarqaku hinaptinmi Filistea casta runakunaman Tayta Dios qoykurqa tawa chunka watapaq.

² Dan ayllumanta kaq Zora llaqtapim *f**yacharqa huk qari, paypa sutinmi karqa Manoa, paypa warminñataqmi karqa mana wachakuq.

³ Chay warmimanmi Tayta Diospa angelnin rikuriykuspan nirqa: —Qamqa mana wachakuq kachkaspapas wiksayakuspaykim qari wawata wachakunki.

⁴ Chaynaqa amam tomankichu vinota nitaq ima sinkachikuqtapas. Amataqmi mikunkichu mana mikuna kaqkunataqa.

⁵ Wiksayakuspam wachakunki qari wawata, paypa chukchantaqa amam pipas rutunqachu, payqa nacesqanmantapunim Diospaq rakisqa kanqa. Paymi qallarinqa Filistea casta runakunamanta Israel nacion librayta —nispa.

⁶ Chay warmim qosanman hamuspan willarqa kaynata: —Diosmanta kaq runam hamuwarqa, rikchayninpas kasqa Diospa angelnin hina sinchi manchakuypaqmi. Manam tapurqanichu maymantam kasqanta, manataqmi paypas sutintaqa willawarqachu.

⁷ Paymi niwarqa: “Wiksayakuspaykim qari wawata wachakunki, amam tomankichu vinota nitaq ima sinkachikuqtapas, amataqmi mikunkichu mana mikuna kaqkunataqa, chay wawaqa nacesqanmantapunim wañukunan punchawkama Diospaq rakisqa kanqa” nispa.

⁸ Chaymi Tayta Diosta Manoa mañakuspa nirqa: —Señorlláy, mañakullaykim chay qampa kachamusqayki runayá ñoqaykuman kutimuchun hinaspayá yachachiwachunku nacemuq wawawan imam ruranaykuta —nispa.

⁹ Manoapa mañakusqanta Dios uyariruptinmi Diospa angelnin huktawan chay warmiman kutimurqa campopi kachkaptin aswanqa qosan Manoaqa manam chaypichu karqa.

¹⁰ Warmiñataqmi apurawllamanña kallpaspan qosanman willamurqa: —¡Qayninpa rikuriwaqniy runam huktawan rikuriykuwan! —nispa.

¹¹ Chaymi Manoa warminwan rispa chay runapa kasqanman chayaruspan nirqa: —¿Qamchu warmiywan rimaq runa kachkanki? —nispa. Payñataqmi nirqa: —Arí ñoqam kachkani —nispa.

¹² Manoam nirqa: —Nisqaykikuna cumplikuptinqa ¿imaynatataq chay wawataqa uywasaqku? ¿Imatataq payqa ruranqa? —nispa.

¹³ Chaymi Manoata Diospa angelnin nirqa: —Warmikim kasukunqa ñoqapa llapa ima nisqaykunata.

¹⁴ Amam imatapas uvasmanta kaqtaqa mikunqachu, amataqmi vinotapas nitaq ima sinkachikuqtapas tomanqachu. Amataqmi mikunqachu mana mikuna kaqkunataqa, kasukuchunyá lliw kamachisqaytaqa —nispa.

¹⁵ Hinaptinmi Tayta Diospa angelninta Manoa nirqa: —Ama hina kaspaykiyá suyaykuwayku huk cabrachata yanurapunaykukama —nispa.

¹⁶ Tayta Diospa angelninñataqmi nirqa: —Harkawaptikipas mikuynikitaqa manam mikusaqchu Tayta Diospaq animalta kañapuyta munaspaqa paypaqyá kañaykapuy —nispa. Manoaqa manam yacharqachu Tayta Diospa angelnin kasqanta.

¹⁷ Chayraykum Tayta Diospa angelninta nirqa: —Sutikitayá willaykuwayku niwasqaykiku cumplikuptin agradecekunaykupaq —nispa.

¹⁸ Hinaptinmi Tayta Diospa angelninñataq nirqa: —¿Imanasqataq sutiyta tapuwanki? Sutiyqa admirakuypaqmi —nispa.

¹⁹ Hinaptinmi Manoa huk cabrachatawan kawsaykunamanta ofrendata apaspan rumipa hawanpi Tayta Diospaq kañarqa. Chaymi Manoa warminpiwan qawachkaptinku Tayta Diospa angelnin milagrota rurarqa

²⁰ altarmanta nina altoman lenguaptinmi Tayta Diospa angelnin wicharirqa lenguachkaq ninapi. Manoam warminpiwan chayta qawaspanku qonqoranpa pampaman kumuykurqaku.

²¹ Tayta Diospa angelnin Manoamanpas chaynataq warminmanpas manaña huktawan rikurimuptinmi Manoaqa yacharurqa Tayta Diospa angelnin kasqanta.

²² Manoam nirqa warminta: —Cheqaptapunim wañurusunchik Diosta rikusqanchikrayku —nispa.

²³ Hinaptinmi warminñataq nirqa: —Sichu Tayta Dios wañunanchikta munaspanqa manach chaskiwachwanchu karqa ofrenda kañasqanchiktapas nitaq kawsaykunamanta ofrendatapas, manataqchá tukuy kaykunatapas qawachiwachwanchu karqa, nitaqchá chaykunatapas willawachwanchu karqa —nispa.

²⁴ Chay warmi wachakuruspanmi chay wawanta suticharqa Sansonwan. Wawa wiñaptinmi Tayta Dios payta bendecirqa.

²⁵ Zora llaqtamanta Estaol llaqtaman riq ñanpi kaq Danpa campamentonpi Sanson kachkaptinmi Tayta Diospa Espiritun pay kallpanchayta qallarirqa.