Jueces 12 - Quechua Ayacucho Bible 1987

Efrain castamasinkunawan Jeftey peleasqanmanta

¹ Efrain casta qarikunam huñunakuruspanku Zafon llaqta lawman Jordan Mayuta chimparurqaku hinaspam Jefteyta nirqaku: —Amonpa mirayninkunapa contranpi peleaq richkaspaqa ¿imanasqataq mana qayamuwarqankikuchu qamkunawan rinaykupaq? Chaynaqa ñoqaykum wasikita qamtawan kuskata kañasaqku —nispa.

² Hinaptinmi Jefteyñataq nirqa: —Ñoqam runaykunapiwan Amonpa mirayninkunawan hatun peleopi karqaniku chaymi qamkunata qayamuchkaptiypas mana yanapawarqankikuchu,

³ mana yanapawasqaykikuta qawaspaymi vidayta peligroman churaspay Amonpa mirayninkunawan peleamurqani hinaptinmi Tayta Dios makiyman churaykurqa. Chaynaqa ¿imanasqamá kunanqa hamuchkankichik ñoqapa contraypi peleanaykichikpaq? —nispa.

⁴ Chaymi Galaad lawpi llapallan runakunata Jeftey huñuruspan pelearqa Efrain ayllu tropakunawan hinaptinmi Galaad lawmanta kaqkuna Efrain castakunata vencerurqaku. Efrain castakunam nirqaku: —Yaw Galaad lawpi *f**yachaqkuna, qamkunaqa Efrain ayllumanta hinaspa Manases ayllumanta lluptimuqkunam kankichik —nispa.

⁵ Hinaptinmi Galaad lawmanta kaqkuna Jordan Mayupa vadonkunata dueñochakururqaku Efrain castakuna mana chimpanankupaq. Efrain castamanta lluptiqkuna: “Pasaytam munaniku” niptinkum Galaad lawmanta kaqkunañataq tapurqaku: “¿Efrain ayllumantachu kanki?” nispa. “Manam” niptinkuñataqmi

⁶ niqku: “Chaynaqa ‘Shibolet’ nispayá niychik”. Hinaptinmi: “Sibolet” nispa mana rimayta atiptinkuqa hapiruspa Jordan Mayupa vadonpi wañuchirqaku. Efrain ayllumanta kaqkunamá wañururqaku tawa chunka iskayniyoq waranqa runakuna.

⁷ Jefteymi gobiernarqa Israel nacionpi soqta wata, Galaad lawmanta kaq Jeftey wañuruptinmi Galaadpa huknin kaq llaqtapi pamparurqaku.

Kimsa jefekunapa gobiernasqanmanta

⁸ Jeftey wañuruptinmi Israel casta runakunata Belen llaqtamanta kaq Ibzan sutiyoq runa gobiernarqa.

⁹ Paypam karqa kimsa chunka qari churinkunawan kimsa chunka warmi churinkuna, llapallantam casarachirqa mana ayllunmanta kaqkunawan. Ibzanmi Israel nacionpi gobiernarqa qanchis wata.

¹⁰ Ibzan wañuruptinmi pamparurqaku Belen llaqtapi.

¹¹ Ibzanpa qepantam gobiernarqa Israel nacionpi Zabulon ayllumanta kaq Elon, paymi Israel nacionpi gobiernarqa chunka wata.

¹² Zabulon ayllumanta kaq Elon wañuruptinmi pamparurqaku Zabulon ayllupa allpan Ajalon llaqtapi.

¹³ Elonpa qepantam gobiernarqa Israel nacionpi Piraton lawmanta kaq Hilelpa churin Abdon.

¹⁴ Abdonpam kapurqa tawa chunka churinkuna hinaspa kimsa chunka willkankuna, paykunam sillakuqku qanchis chunka asnokunapi. Abdonmá Israel nacionpi gobiernarqa pusaq wata.

¹⁵ Piraton lawmanta kaq Hilelpa churin Abdon wañuruptinmi pamparurqaku Piraton lawpi. Piratonqa karqa Amalec runakunapa orqonpim otaq Efrain ayllupa allpanpim.