Jueces 11 - Quechua Ayacucho Bible 1987

Jeftey sutiyoq jefenkumanta

¹ Galaad lawmanta kaq Jefteymi karqa valeroso soldado. Payqa chuchumika warmipa wawanmi karqa, Jefteypa taytanñataqmi karqa Galaad.

² Warminpipas karqam Galaadpa churinkunaqa, chay churinkuna wiñaruspanmi Jefteyta wasinmanta qarqorurqaku kaynata nispa: —Huk warmipa wawan kasqaykiraykum taytanchikpa wasinpiqa mana herenciata chaskiwaqchu —nispa.

³ Chaymi Jefteyqa wawqenkunamanta lluptiruspa Tob lawpi *f**yacharqa, qella runakuna payman hukllawakuykuptinmi paykunawan lloqsiqku.

⁴ Tiempomantañam Amonpa mirayninkuna Israel castakunawan pelearqaku.

⁵ Chayraykum Galaad lawpi ancianokuna rirqaku Tob lawmanta Jefteyta pusamunankupaq.

⁶ Paytam nirqaku: —Hakuchikyá jefeyku kanaykipaq chaynapi Amonpa mirayninkunapa contranpi peleamunanchikpaq —nispa.

⁷ Hinaptinmi Jefteyñataq Galaad lawpi ancianokunata nirqa: —¿Manachum qamkunaqa cheqniwaspaykichik taytaypa wasinmanta qarqomuwarqankichik? ¿Llakipi kaspaykichikñachum kunan hamuwankichik? —nispa.

⁸ Hinaptinmi paykunañataq nirqaku: —Sasachakuypi kasqaykuraykumá kunan hamuniku ñoqaykuwan rinaykipaq hinaspa Amonpa mirayninkunapa contranpi peleaspa Galaad lawpi llapallan *f**yachaqkunapa jefenña kanaykipaq —nispa.

⁹ Hinaptinmi Jefteyñataq nirqa: —Sichu Amonpa mirayninkunapa contranpi peleaq kutichiwaptikichik Tayta Dios vencechiwaptinqa qamkunapa jefekichikmi kasaq —nispa.

¹⁰ Hinaptinmi Galaad lawpi ancianokunañataq nirqa: —Tayta Diosyá testigonchik kachun, nisqaykiman hinam rurasaqku —nispa.

¹¹ Jeftey paykunawan riptinmi runakuna churarqaku kamachiqninkupaq chaymi Tayta Diospa qayllanpi lliw rimasqankunata yapatawan Jeftey rimarqa Mizpa llaqtapi.

¹² Chaymantam Jeftey willakuqkunata kacharqa Amonpa mirayninkunapa reyninman kaynata nispa: —¿Imanarqaykitaq ñoqaqa nacionniypa contranpi hamunaykipaq? —nispa.

¹³ Chaymi Jefteypa kachasqankunata Amonpa mirayninkunapa reynin nirqa: —Ñoqaykuqa qamkunawan peleaqmi hamuchkaniku, Israel casta runakunam Egipto nacionmanta lloqsimuspa Arnon Mayumanta Jaboc Mayukama hinaspa Jordan Mayukama allpaykuta dueñochakururqaku, chaynaqa kunanyá mana guerrallawan kutiykachipuwayku —nispa.

¹⁴ Hinaptinmi Amon casta runakunapa reyninman Jeftey huktawan willakuqkunata kacharqa.

¹⁵ Hinaspam kaynata nichimurqa: —Israel casta runakunaqa manam dueñochakurqakuchu Moab castakunapa allpantaqa nitaq Amonpa mirayninkunapa allpantapas.

¹⁶ Egiptomanta Israel casta runakuna lloqsimuspaqa chunniqnintam hamurqaku Puka Lamar Qochakama hinaspam Cades llaqta lawman chayamurqaku.

¹⁷ Hinaptinmi Israel castakuna kacharqa willakuqkunata Edom nacionpa reyninman: “Allpayki ukuntayá pasarullasaqku” nispa. Ichaqa Edom nacionpa reyninmi mana munarqachu. Moab nacionpa reyninmanpas kacharqam ichaqa paypas manataqmi munarqachu, chayraykum Israel castamasiykuqa qeparqaku Cades llaqta lawllapi.

¹⁸ Chaymantañataqmi chunniqninta hamuspanku Edom castakunapa hinaspa Moab castakunapa allpanta muyumurqaku, Moab casta runakunapa allpanpa intipa qespimunan lawninman chayaramuspankum Arnon Mayupa chimpanpi samarurqaku, manam pasarqakuchu Moab casta runakunapa linderontaqa Arnon Mayu Moab nacionpa linderon kasqanrayku.

¹⁹ Israel casta runakunam kacharqa willakuqkunata Hesbon llaqtapi gobiernaq Amor casta runakunapa reynin Sehonman: “Allpayki ukuntayá pasarullasaqku mayman rinaykuman chayarunaykupaq” nispa.

²⁰ Chay Rey Sehonmi ichaqa mana munarqachu Israel casta runakuna paypa allpan pasanankuta, llapallan runankunata Jahaza llaqta lawpi huñuruspanmi Israel casta runakunapa contranpi pelearqa.

²¹ Ichaqa Israelpa yupaychasqan Tayta Diosmi Rey Sehonta llapallan runankunatawan Israel castakunaman qoykurqa hinaptinmi paykunata wañurachispan dueñochakururqa chay nacionpi *f**yachaq llapallan Amor casta runakunapa allpanta.

²² Dueñochakururqakutaqmi Amor runakunapa llapallan allpantapas Arnon Mayumanta Jaboc Mayukama chaynataq chunniqmanta Jordan Mayukamapas.

²³ ¿Chaynaqa Israelpa yupaychasqan Tayta Diospa qowasqankutachu munachkanki qechuruwaykuta? Chaytaqariki Tayta Diosmi Amor casta runakunamanta qechururqa.

²⁴ Quemos diosnikipa qosusqaykitaqa ¿manachum dueñochakuwaq? Chaynataqmi ñoqaykupas yupaychasqayku Tayta Diospa qowasqankutaqa dueñochakuniku.

²⁵ ¿Moab nacionpa reynin Ziporpa churin Balacmantapas aswan allinpaqchu hapikunki? Payqa manam atipanakurqachu nitaq pelearqachu Israel casta runakunapa contranpiqa.

²⁶ Israel casta runakunaqa yaqa kimsa pachak watañam *f**yachachkaniku Hesbon hinaspa Aroer llaqtakunapiqa chaynataq llaqtachankunapipas chaynataq Arnon Mayupa patan llaqtakunapipas. ¿Imanasqataq mana chay tiempopichu kutichikurqankichik?

²⁷ Ñoqaqa manam imanarqaykichu, qamqariki mana allintam rurachkanki contraypi peleaspayki. Tayta Diosmi juezqa, kunanqa paypuniyá juzgawasunchik Israelpa mirayninkunatapas chaynataq Amonpa mirayninkunatapas —nispa.

²⁸ Amon casta runakunapa reyninqa manam caso-preciotapas churarqachu Jefteypa willachisqantaqa.

Jefteypa prometekusqanmanta

²⁹ Tayta Diospa Espiritun Jefteyta yanapaptinmi pasarqa Galaad hinaspa Manases lawninta. Pasarqataqmi Galaad lawpi Mizpa llaqtantapas. Mizpa llaqtamantañataqmi pasarqa Amonpa mirayninkunapa kasqanman.

³⁰ Jefteymi Tayta Diosman prometekurqa kaynata: —Sichum Amonpa mirayninkunata makiyman churaykuptikiqa

³¹ vencesqaymanta kutimuptiy tupanaypaq wasiymanta lloqsimuqmi qampaq kanqa, wañuchispaymi kañapusqayki —nispa.

³² Amonpa mirayninkunapa contranpi Jeftey peleaq riptinmi Tayta Dios paypa makinman churaykurqa.

³³ Iskay chunka llaqtakunatam vencerurqa Aroer llaqtamanta Minit llaqtakama hinaspa Abel-keramim llaqtakama. Wañurachirqataqmi achkallaña runakunatapas. Chaynatam Amonpa mirayninkunata Israelpa mirayninkuna humillarachirqa.

³⁴ Mizpa llaqtapi wasinman Jeftey kutimuptinmi chullachalla kapuq warmi churin lloqsiramurqa, payqa taytan chaskinanpaqmi lloqsimurqa tinyakunawan tusustin. Jefteypa huk churinqa manam karqachu.

³⁵ Chay churinta Jeftey qawaykuspanmi pachankunata llikipakuspan kaynata nirqa: —Ay churilláy, humillarachiwaspaykim hatun llakiman churaruwanki, Tayta Diosmanmi prometekurqani, chay prometekusqaytaqa cumplisaqchá —nispa.

³⁶ Chaymi churinñataq nirqa: —Taytay, sichu Tayta Diosman prometekuspaqa ñoqawanyá ruray prometekusqaykiman hina, enemigoyki Amonpa mirayninkunataqariki Tayta Diospunim vengakurun.

³⁷ Ichaqa taytay, suyaykuwayá iskay killata doncellamasiykunawan orqokunaman rispay doncella kasqaymanta chaypi waqamunaypaq —nispa.

³⁸ Hinaptinmi taytanñataq nirqa: —Riyá —nispa. Iskay killa suyaykuptinmi doncellamasinkunawan orqokunapi doncella kasqanmanta waqamurqa.

³⁹ Iskay killa pasaruptinmi taytanman kutimurqa chaymi taytanñataq prometekusqanman hina paywan rurarqa. Chaynapim chay churinqa doncellalla wañukurqa.

⁴⁰ Chaymantapunim Israel nacionpi costumbreña karqa, sipaskunam watan-watan riqku Galaad lawmanta Jefteypa warmi churinmanta tawa punchaw waqaq.