Juan 9 - Quechua Ayacucho Bible 1987

Ñawsa runata Jesus sanoyachisqanmanta

¹ Richkaspanmi Jesus rikururqa nacekusqanmantapuni ñawsa runata.

² Hinaptinmi discipulonkuna tapurqa: —Yachachikuq ¿imanasqataq wak runaqa nacerqa ñawsa? ¿Tayta-mamanpa huchanmantachu icha kikinpa huchanmantachu? —nispa.

³ Jesusñataqmi nirqa: —Manam kikinpa huchanmantachu nitaq tayta-mamanpa huchanmantachu, kayqa karqa Diospa rurasqankuna qawanankupaqmi.

⁴ Punchawraq kachkaptinqa llamkanaymi kachamuwaqniypa rurasqankunapi, tutayaramuptinmi ichaqa manaña atiymanñachu llamkayta.

⁵ Kay pachapiraq kanaykamaqa runakunatam achkisaq.

⁶ Chaynata nispanmi allpaman toqaykuspan mituta rurarurqa hinaspam ñawsapa ñawinman llusiykuspan

⁷ nirqa: —Rispayki mayllakaramuy Siloe estanquepi —nispa. Siloeqa “kachasqa” ninanmi. Chay runam rispan mayllakaramurqa hinaspam kutimurqa qawakustinña.

⁸ Vecinonkunawan limosnero kasqan rikuqkunam nirqaku: —¿Kayqa tiyaykuspa limosna mañakuqchús? —nispa.

⁹ Chaymi wakinñataq nirqaku: —Arí, paypunim —nispa. Wakinninñataqmi nirqaku: —Manam paychu, rikchayllam-rikchakun —nispanku. Hinaptinmi Kikinña nirqa: —Arí, ñoqam kani —nispa.

¹⁰ Hinaptinmi tapurqaku: —¿Imaynamá qawarikururqankiqa? —nispa.

¹¹ Payñataqmi willakurqa: —Jesus sutiyoq runam mituta ruraykuspan ñawiyman llusiykuwarqa hinaspam niwarqa: “Siloe *f**estanqueman rispayki mayllakaramuy” nispan. Rispaymi mayllakamurqani hinaspam qawarikururqani —nispa.

¹² Chaymi Paykunañataq nirqaku: —¿Maypitaq kachkan chay runaqa? —nispa. Hinaptinmi chay runañataq nirqa: —Manam yachanichu —nispa.

Qawarikuruq runata tapupayasqankumanta

¹³ Chay qawarikuq runatam *f**fariseokunaman pusarqaku.

¹⁴ Paytaqa Jesusmi sanoyarachirqa *f**samana punchawpi mituta ruraykuspan.

¹⁵ Fariseokunam tapurqa chay runata ñawsa kachkaspaqa imaynam sanoyarusqanmanta. Paymi willakurqa: —Mituta ruraykuspam ñawiyman llusiykuwarqa hinaptinmi mayllakuruspay qawarikururqani —nispa.

¹⁶ Wakinnin *f**fariseokunañataqmi nirqa: —Chay sanoyarachisuqniki runaqa manam Diosmantachu samana punchawpi mana samasqanrayku —nispa. Wakinninñataqmi nirqaku: —Huchasapa runaqa ¿imaynataq ruranman milagrokunataqa? —nispanku. Chaynapim runakuna kikinkupura mana acuerdochu karqaku.

¹⁷ Mosoqmantam tapurqaku chay ñawpaq kaq ñawsata: —Qamqa ¿imaninkitaq ñawiki qawarichisuqniki runamantaqa? —nispa. Hinaptinmi payñataq nirqa: —Payqa Diosmanta willakuqmi —nispa.

¹⁸ *f**Judiokunañataqmi mana creerqachu ñawsa kaspan kunanñataq qawarikurusqanta chaymi qayachimurqaku tayta-mamanta

¹⁹ hinaspam tapurqaku: —¿Kay runapa tayta-mamanchum kankichik, paychum nacesqanmantapuni ñawsa nisqaykichik? ¿Imaynataq kunanqa qawakuchkanña? —nispa.

²⁰ Paykunañataqmi nirqaku: —Arí, ñoqaykum tayta-maman kaniku, yachanikum ñawsa nacesqantaqa.

²¹ Ichaqa manam yachanikuchu imaynam qawarikusqantapas chaynataq pim ñawin sanoyachisqantapas. Tapuychik payta, yuyayniyoqñam, kikinmi willakunqa —nispa.

²² Tayta-mamanqa chaynataqa nirqa *f**judiokunata manchakuspankum. Chay judiokunaqa ñam tanteanakururqakuña pipas: “Jesusqa Cristom” niptinqa *f**huñunakuna wasimanta wischurunankupaq.

²³ Chayraykum tayta-mamanqa nirqa: “Tapuychik payta, yuyayniyoqñam payqa” nispa.

²⁴ *f**Judiokunam mosoqmanta qayachimurqa ñawpaq ñawsa kaqta hinaspam nirqaku: —Cheqapta rimaspa Diosta alabay, ñoqaykuqa yachanikum chay runaqa huchasapa kasqanta —nispa.

²⁵ Payñataqmi nirqa: —Ñoqaqa manam yachanichu huchasapa kasqantaqa, yachakunim ichaqa ñawpaqtaqa ñawsa kachkaspaypas kunan qawakusqayta —nispa.

²⁶ Chaymi mosoqmanta tapurqaku: —¿Imanaykusurqankitaq? ¿Imatataq ruraykusurqanki ñawiki qawarikurunanpaq? —nispa.

²⁷ Payñataqmi nirqa: —Ñam nirqaykichikña, ichaqa manam uyariwankichikchu. ¿Imapaqñataq munankichik yapatawan ninaytaqa? Seguroch qamkunapas puriqmasinña kayta munankichik —nispa.

²⁸ Chaynata niptinmi insultaspanku nirqaku: —Chay runataqa qanmi qatichkanki, ñoqaykuqa qatiniku Moisestam.

²⁹ Ñoqaykuqa yachanikum Diosqa Moiseswan rimasqanta. Jesusmantam ichaqa mana yachanikuchu maymantam kasqantapas.

³⁰ Chay runañataqmi nirqa: —¡Admirakuypaqmi kayqa! Maylawmantam kasqanta mana yachachkaptikichikpas ñoqallaytam qawariykachiwan.

³¹ Yachasqanchikman hinapas Diosqa manam huchasapakunataqa uyarinchu aswanqa yupaychaqninkunallatam hinaspa paypa munasqan ruraqkunallatam.

³² Kunankamam manaraq uyarikurqachu nacesqanmantapuni ñawsata pipas qawarichisqanmantaqa.

³³ Sichu chay runa Diosmanta mana hamuspaqa manachá kaykunataqa ruranmanchu —nispa.

³⁴ Chaymi *f**judiokunañataq nirqaku: —Qamqa nacerqankipas huchapa huntasqanmi ¿hinachkaspachu yachachiwaykutaraq munanki? —nispa. Chaynata niruspankum qarqorurqaku *f**huñunakunanku wasimanta.

Qawakuq ñawsakunamanta

³⁵ Jesusmi yacharurqa chay runata *f**huñunakunanku wasimanta wischurusqankuta, paywan tupaykuspanmi nirqa: —¿Creenkichu Diosmanta Hamuq Runapi? —nispa.

³⁶ Chay runam nirqa: —Señorlláy ¿pitaq payqa payman iñikunaypaq? —nispa.

³⁷ Chaymi Jesusñataq nirqa: —Ñam rikuykunkiña, ñoqam kani qanwanmi rimachkani —nispa.

³⁸ Chaymi chay runa nirqa: —Iñinim Señor —nispa. Chaynata niykuspanmi qonqorakuykuspa adorarqa.

³⁹ Jesusñataqmi nirqa: —Ñoqaqa kay pachamanqa hamurqani allin arreglo ruraqmi hinaspa ñawsakunapa ñawin kichaykuqmi chaynapi wakinkunañataq qawakuchkaspankupas mana rikukunankupaq —nispa.

⁴⁰ Wakinnin *f**fariseokunañataqmi chayna nisqanta uyariruspanku nirqaku: —Chaynaqa ñoqaykupas ñawsachiki kaniku —nispa.

⁴¹ Hinaptinmi Jesusñataq nirqa: —Ñawsa kaspaykichikqa mana huchayoqchá kawaqchik, ichaqa: “Qawakunikum” nisqaykichikraykum huchayoq kankichik —nispa.