Juan 8 - Quechua Ayacucho Bible 1987

¹ Jesus rirqa Olivos moqoman.

² Tutapaytañataqmi temploman kutimurqa. Llapa runakuna payman asuykuptinmi tiyaykuspa yachachirqa.

³ Diospa leynin yachachiqkunam fariseokunapiwan tarirurqaku warmita hukwan pierdekuchkaqta chaymi llapa runapa chawpinman apaykuspanku

⁴ Jesusta nirqaku: —Yachachikuq, kay warmitam tariramuniku hukwan pierdekuchkaqta.

⁵ Moisespa qellqasqan Diospa leyninqa kamachikun kayna warmikunataqa rumiwan chamqapanapaqmi. ¿Qamqa imaninkitaq?

⁶ Chaynataqa nirqaku Jesusta pantarachispa chaykunawan acusanankupaqmi. Jesusñataqmi kurkuykuspan allpapi qellqarqa dedonwan.

⁷ Ichaqa tapupayaptinkum Jesus sayariykuspa nirqa: —Mayqannikichikpas mana huchayoq kaqyá puntata chamqaychik kay warmita.

⁸ Chaynata niruspanmi kasqallan kurkuykuspan qellqarqa allpapi.

⁹ Jesuspa nisqanta uyarispankum chulla-chullallamanta asurikurqaku machukunamanta qallaykuspa, chaymi Jesusllaña warmiwan qeparurqa.

¹⁰ Jesusmi sayariykuspan warmita nirqa: —¿Maytaq acusaqnikikunaqa? ¿Manachum pipas condenasunki? —nispa.

¹¹ Warmiñataqmi nirqa: —Manam mayqanninpas Señor —nispa. Jesusñataqmi nirqa: —Ñoqapas manam sentenciaykichu, ripukuspayá amaña huchallikuyñachu —nispa.

Jesusqa runakunapa achkiynin kasqanmanta

¹² Huktawanmi runakunata Jesus nirqa: —Ñoqam kani runakunapa achkiynin, pipas qatiwaqniyqa manam tutayaypichu purinqa, payqa kanqa kawsay qokuq achkiyoqmi —nispa.

¹³ Chaymi *f**fariseokuna nirqa: —Qamqa favornillaykipim rimachkanku, chayqa manam cheqapchu —nispa.

¹⁴ Jesusñataqmi nirqa: —Favornillaypi rimaptiypas rimasqayqa cheqapmi, ñoqaqa yachanim maymantam hamusqaytapas chaynataq maymanmi risqaytapas, qamkunam ichaqa mana yachankichikchu maymantam hamusqaytapas nitaq maymanmi risqaytapas.

¹⁵ Qamkunaqa juzgankichik runakuna hinallam. Ñoqaqa manam pitapas juzganichu.

¹⁶ Juzgaptiyqa cheqapcha kanman. Ñoqaqa manam sapallaychu kachkani aswanqa kachamuwaqniy Taytaypiwanmi.

¹⁷ Leynikichikpim nichkan “Iskay testigopa nisqanmi creenaqa” nispa.

¹⁸ Kikiymi kani huknin testigo, kachamuwaqniy Taytayñataqmi huknin kaq testigo.

¹⁹ Hinaptinmi *f**fariseokuna nirqaku: —¿Maypitaq kachkan taytaykiqa? —nispa. Chaymi Jesusñataq nirqa: —Qamkunaqa manam reqsiwankichikchu nitaqmi Taytaytapas reqsinkichikchu, ñoqata reqsiwaspaykichikqa Taytaytapas reqsiwaqchikmi —nispa.

²⁰ Templopi yachachispanmi chaynataqa nirqa ofrenda chaskinankupa waqtanpi, manam pipas presochayta atirqachu manaraq tiempon chayamusqanrayku.

“Ñoqapa risqaytaqa manam riwaqchikchu” nispa Jesuspa nisqanmanta

²¹ Huktawanmi Jesus nirqa: —Ñoqa pasakuptiymi qamkuna maskawankichik hinaspam huchaykichikpi wañunkichik. Ñoqapa kasqaymanqa qamkunaqa manam chayayta atiwaqchikchu —nispa.

²² Judiokunañataqmi nirqaku: —¿Kikillanchu wañurachikunqa? ¿Chaychu nin: “Ñoqapa kasqaymanqa qamkunaqa manam chayayta atiwaqchikchu” nispa?

²³ Jesusmi nirqa: —Qamkunaqa kankichik kay pachallamantam, ñoqañataqmi kani hanaq pachamanta. Qamkunaqa kankichik kay pachapi kaqmi, ñoqam ichaqa mana kay pachapi kaqchu kani.

²⁴ Chaymi nirqaykichik “Huchaykichikpim wañunkichik” nispa. Pim kasqayta mana creespaykichikqa huchaykichikpim wañunkichik.

²⁵ Hinaptinmi tapurqaku: —Chaynaqa ¿pitaq qamqa kanki? —nispa. Jesusñataqmi nirqa: —Ñam nirqaykichikña puntamantaraq.

²⁶ Achkam qamkunamanta ninay kachkan juzganaypaq. Kachamuwaqniyqa cheqapmi chaymi paymanta uyarisqayta runakunaman willani —nispa.

²⁷ Paykunaqa manam entiendeyta atirqakuchu Taytanmanta nisqantaqa.

²⁸ Chaymi Jesus nirqa: —Diosmanta Hamuq Runata chakataruwaspaykichikñam yachankichik pim kasqayta. Tukuy imatapas manam kikillaymantachu rurani, Taytaypa yachachiwasqallantam ñoqaqa willaykichik.

²⁹ Kachamuwaqniyqa ñoqawanmi kachkan, Taytaqa manam sapallaytachu saqeruwan chaymi ñoqaqa paypa agradonpaq tukuy tiempo rurani —nispa.

³⁰ Jesus chaynata niptinmi achkaq iñirqaku payman.

Cheqap librasqakunamanta

³¹ Jesusmi nirqa iñiqnin judiokunata: —Sichu qamkuna seguinkichik nisqaykunata hinaspaqa cheqap discipuloykunam kankichik.

³² Yachankichikmi cheqap kaqmanta, chay cheqapmi libreyachisunkichik —nispa.

³³ Judiokunañataqmi nirqa: —Ñoqaykuqa Abrahampa castanmi kaniku, manam haykapipas nitaq mayqanniykupas sirvienteqa karqanikuchu. ¿Imaynanpitaq qamqa ninki: “Chay cheqapmi libreyachisunkichik” nispaqa?

³⁴ Jesusñataqmi nirqa: —Cheqaptapunim nikichik, huchakuna ruraqqa huchapa sirvientenmi.

³⁵ Sirvienteqa manam kanmanchu wasi familiaqa, churim ichaqa wasi familia.

³⁶ Qamkunata Diospa Churin libreta kachariptiyqa cheqaptapunim libre kankichik.

³⁷ Arí, Abrahampa castanmi kankichik, ichaqa wañurachiwaytam munankichik nisqaykunata mana chaskisqaykichikrayku.

³⁸ Ñoqaqa rimani Taytaypa kasqanpi rikusqaykunatam, qamkunapas rurankichikqa taytaykichikpa nisusqaykichiktam —nispa.

³⁹ Chaymi paykunañataq nirqa: —Taytaykuqa Abrahamllam —nispa. Jesusñataqmi nirqa: —Abrahampa miraynin kaspaqa paypa rurasqankunatachá rurawaqchik.

⁴⁰ Wañurachiwaytam munachkankichik Diosmanta cheqap kaqta uyarispay qamkunaman willasqayrayku. Abrahamqa manam chaynatachu rurarqa.

⁴¹ Qamkunaqa rurankichik taytaykichikpa rurasqallantam —nispa. Hinaptinmi paykunañataq nirqa: —Ñoqaykuqa manam churyapakuychu kaniku, ñoqaykupa taytaykuqa Diosllam —nispa.

⁴² Jesusñataqmi nirqa: —Dios kanman taytaykichik hinaptinqa kuyawankichikmanchá. Diosmanta hamuspaymi kaypi kachkani. Ñoqaqa manam kikillaymantachu hamurqani aswanqa Taytam kachamuwarqa.

⁴³ ¿Imanasqamá manaqa entiendenkichikchu rimasqaykunataqa? Manam atinkichikchu kasukuyta rimasqay kasukuyta.

⁴⁴ Qamkunapa taytaykichikqa diablom chaymi paypa munasqallanta rurankichik. Qallariyninmantapuni runa wañuchiqmi chay diabloqa, payqa llullalla rimaqmi mana cheqappi kasqanrayku. Llullata kuspanqa kikinmantam willakuchkan llulla kasqanrayku hinaspa llullakuqkunapa taytan kasqanrayku.

⁴⁵ Ñoqam ichaqa cheqapta nikichik aswanqa manam creenkichikchu.

⁴⁶ ¿Mayqannikichiktaq huchayoq kasqayta pruebawankichikman? Cheqapta nichkaptiyqa ¿imanasqamá manaqa creewankichikchu?

⁴⁷ Diospaq kaqkunaqa uyarinmi Diospa nisqankunata, qamkunam ichaqa mana uyarinkichikchu Diosmanta mana kasqaykichikrayku.

Abrahanmantapas ñawpaqmantaraq Jesucristoqa kasqanmanta

⁴⁸ Judiokunam Jesusta nirqa: —Razontam nikiku “qamqa samaria law” runa kasqaykimanta hinaspa demonioyoq kasqaykimanta —nispa.

⁴⁹ Jesusmi nirqa: —Manam kanchu demonioyqa, ñoqaqa hatunchani Taytaytam, qamkunam ichaqa penqayman churawankichik.

⁵⁰ Manan munanichu alabawanaykichiktaqa, Diosmi ichaqa munan alabawanaykichikta, paymi tukuy imataqa juzganqa.

⁵¹ Cheqaptapunim nikichik, pipas nisqaykunata kasuspaqa manapunim wañunqachu —nispa.

⁵² Judiokunañataqmi nirqa: —Kunanmi ichaqa yachaniku demonioyoq kasqaykita. Abrahampas chaynataq Diosmanta willakuqkunapas wañurqam, qamñataqmi ninki: “Ñoqapa nisqaykuna kasukuqqa manapunim wañunqachu” nispa.

⁵³ ¿Icha qamqa mastachu kawsanki abuelonchik Abrahanmantapas? Payqa ñam wañukunña, wañukunñataqmi Diosmanta willakuqkunapas. ¿Pi kasqaykipaqtaq qamqa creekunki? —nispa.

⁵⁴ Jesusmi nirqa: —Kikillaypa alabakusqayqa manam valenchu. Alabawaqniyqa Taytaymi, paytam qamkuna ninkichik “Diosniykum” nispa.

⁵⁵ Paytaqa manam reqsinkichikchu. Ñoqam ichaqa reqsini. “Manam reqsinichu” nispayqa qamkuna hinachá llullakuyman. Ñoqaqa reqsinim, chayraykum ñoqaqa kasukuni paypa nisqankunata.

⁵⁶ Abueloykichik Abrahamqa kusikurqam hamunay tiempota qawaspan. Rikuykuspamá kusikurqa.

⁵⁷ Judiokunañataqmi nirqa: —Manaraqtaq pichqa chunka watayoqpasraqchu kankiqa hinaspaqa ¿imaynataq Abrahamtaqa rikuwaq karqa? —nispa.

⁵⁸ Hinaptinmi Jesusñataq nirqa: —Cheqaptapunim nikichik, manaraqpas Abraham kachkaptinqa ñam karqaniña —nispa.

⁵⁹ Chaynata niptinmi rumiwan choqaparuyta munarqaku, Jesusñataqmi pakakuruspa templomanta lloqsikaramurqa.