Juan 5 - Quechua Ayacucho Bible 1987

Samana punchawpi onqoqta sanoyachisqanmanta

¹ Chaykunapa qepantam karqa judiokunapa fiestan chaymi Jesus rirqa Jerusalenman.

² Chay llaqtapim Oveja sutiyoq punkupa hichpanpi karqa pichqa portalniyoq estanque, hebreo idiomapi chaypa sutinqa Betesdam.

³ Chaypim kaqku achkaq onqoqkuna, ñawsakuna, wistukuna hinaspa suchukuna. [Paykunam suyaqku yaku kuyurinanta.]

⁴ Angelmi estanqueman uraykamuspan kuyuchiq yakuta, pipas chayman puntata yaykuqmi sanoyaq ima onqoymantapas.

⁵ Chaypim kachkarqa kimsa chunka pusaqniyoq wataña onqoq runa.

⁶ Unay wataña onqosqanta yachaspanmi Jesus nirqa: —¿Munankichu sanoyayta? —nispa.

⁷ Onqoqmi nirqa: —Señor, manam piyniypas kanchu qocha kuyuriptin yakuman wischuykuqniy. Yaykuy mana atinaykamam hukkuna puntata yaykurunku —nispa.

⁸ Chaymi Jesus nirqa: —Hatariy, camaykita hoqarispa puriy —nispa.

⁹ Chaynata niykuptinmi runa sanoyarurqa hinaspam camanta hoqariruspan purirqa. Chay punchawmi karqa samana punchaw.

¹⁰ Chaymi wakin judiokuna chay sanoyaruq runata nirqa: —Kunanqa samana punchawmi, camaykitaqa manam apawaqchu —nispanku.

¹¹ Chaymi sanoyaruq runañataq nirqa: —Sanoyachiqniymi niwarqa: “Camaykita hoqarispa puriy” nispa.

¹² Chaymi paykuna nirqa: —¿Pitaq nisurqanki: “Camaykita hoqarispa puriy” nispa?

¹³ Chay sanoyaruqqa manam yacharqachu pim sanoyachisqantapas. Jesusqa chinkarurqam chaypi achkallaña runa kaptin.

¹⁴ Jesusmi tumpa unaymanta chay runata tarirurqa templopi hinaspam nirqa: —Sanoyaruchkaspaykiqa amañayá mastaqa huchallikuyñachu, yanqañataq imapas aswanraq hamusunkiman —nispa.

¹⁵ Hinaptinmi chay runaqa chay judiokunaman willamurqa: —Jesusmi kasqa sanoyachiqniyqa —nispa.

¹⁶ Chaymi paykuna Jesusta perseguirqaku, *f**samana punchawpi chaykuna rurasqanmanta.

¹⁷ Chaymi Jesus nirqa: —Taytayqa kunankamam llamkachkan llamkachkanitaqmi ñoqapas —nispa.

¹⁸ Judiokunaqa wañurachiytaqa munarqaku manam *f**samana punchawpi imapas rurasqallanmantachu, aswanqa “Diosqa Taytaymi” nispa Dioswan igualakusqanraykum.

Diospa Churinqa munayniyoq kasqanmanta

¹⁹ Jesusmi nirqa: —Cheqaptapunim nikichik, Churiqa ima ruraytapas sapallanqa manam atinmanchu, ruraspaqa ruran Taytapa rurasqanta qawaspallanmi, Taytapa tukuy rurasqantam Churipas ruran pay hina.

²⁰ Dios Taytaqa kuyanmi Churita hinaspam qawachin tukuy ima rurasqanta, ichaqa qamkuna admirakunaykichikpaqmi aswan hatun kaqkunataraq qawachinqa.

²¹ Dios Taytam wañuqkunata kawsarichin, chaynam Churipas kawsarichin munasqankunata.

²² Taytaqa manam pitapas juzganchu, payqa Churinmanmi tukuy atiyta qoykurqa juzgananpaq

²³ chaynapi Taytata yupaychasqankuta hina Churitapas llapallanku yupaychanankupaq. Churita pipas mana yupaychaqqa manam yupaychanchu kachamuqnin Taytatapas.

²⁴ —Cheqaptapunim nikichik, pipas nisqaykunata uyariqqa hinaspa kachamuwaqniypi iñiqqa wiñay kawsayniyoqñam kachkan. Payqa manam castigasqachu kanqa, aswanqa wañuymantam kawsaymanña pasarun.

²⁵ Cheqaptapunim nikichik, hamuchkanmi punchaw, ñam chayamuchkanña, wañuqkunam uyarinqa Diospa Churinpa qayasqanta, uyariqninkunaqa kawsanqam.

²⁶ Dios Taytaqa kikinpi vidayoqmi, Churimanpas qoykurqam kikinpi vidayoq kananpaq.

²⁷ Runakunata juzgananpaqmi atiytapas qoykurqa Diosmanta Hamuq kasqanrayku.

²⁸ Kay nisqaymantaqa amayá admirakuychikchu, huk punchawmi Diospa Churinpa qayasqanta uyarispanku llapallan wañuqkuna kawsarimunqaku.

²⁹ Allin ruraqkunaqa wiñay kawsanankupaqmi kawsarimunqaku, mana allin ruraqkunañataqmi kawsarimunqaku castigasqa kanankupaq.

Jesusqa munayniyoq kasqanmanta testigokuna

³⁰ —Kikillayqa manam imatapas ruraymanchu. Ñoqaqa uyarisqayman hinam justiciawan juzgani. Ñoqaqa rurani manam kikiypa munasqaytachu aswanqa kachamuwaqniypa munasqantam.

³¹ Kikillaymanta willakuptiyqa manachá cheqapchu kanman.

³² Hukmi ñoqamantaqa willakun, paypa willakusqanqa cheqapmi.

³³ Qamkunam Juanta tapuchimurqankichik, chaymi payqa cheqapta willakurqa.

³⁴ Ñoqaqa pruebataqa manam maskanichu runakunamantaqa, kaykunataqa nikichik qamkuna salvakunaykichikpaqmi.

³⁵ Juanqa karqa lampara hina rataspa achkiqmi, chaymi munarqankichik chay achkiywan as tiempollapas kusikuyta.

³⁶ Ñoqapa testigoyqa Juanpa nisqanmantapas aswan confiakunaraqmi. Taytaypa kamachiwasqantam ñoqaqa rurani, chay rurasqaykunam ñoqamanta willakun testigo hina, chay rurasqaykunawantaqmi yachanku Taytapa kachamuwasqantapas.

³⁷ Kachamuwaqniy Dios Taytam ñoqamanta willakun. Qamkunaqa manam haykapipas uyarirqankichikchu Taytapa rimasqantaqa, manataqmi rikurqankichikchu rikchaynintapas.

³⁸ Sonqoykichikpiqa manam paypa palabranpas kanchu ñoqapi mana iñisqaykichikrayku, ñoqataqariki paymi kachamuwarqa.

³⁹ Wiñay kawsay tariyta munaspaqa Bibliatayá allinta estudiaychik. Bibliaqa ñoqamantam willakun testigo hina.

⁴⁰ Wiñay kawsayniyoq kanaykichikpaq qayachkaptiypas manam ñoqaman hamuyta munankichikchu.

⁴¹ —Runakunapa alabawasqantaqa manam chaskinichu.

⁴² Qamkunataqa reqsikichikmi chaymi yachani Dios mana kuyasqaykichikta.

⁴³ Ñoqaqa hamurqani Taytaypa sutinpim hinaptinmi mana chaskiwankichikchu, huk hamunman kikinpa sutillanpi hinaptinmi ichaqa chaskiwaqchik.

⁴⁴ Kikikichikpuralla alabanakuchkaspaqa hinaspa Diospa alabasunaykichikta mana maskachkaspaqa ¿imaynataq iñiyta atiwaqchik?

⁴⁵ Qamkunaqa amayá piensaychikchu Taytapa qayllanpi acusanaymantaqa, Moisesmi acusasunkichikqa payman hapipakusqaykichikrayku.

⁴⁶ Moisespa nisqankunata creechkaspaqa ñoqapipas creewaqchikchá, Moisesqa ñoqamantam qellqarqa.

⁴⁷ Moisespa qellqasqanpi mana creespaqa ¿imaynataq creewaqchik ñoqapa nisqaykunataqa?