Juan 4 - Quechua Ayacucho Bible 1987

Samaria law warmiwan Jesuspa rimasqanmanta

¹ Jesusmi yacharurqa *f**fariseokunapa rimasqanta. Paykunam nirqa: —Juanmantaqa Jesustam aswan achka runakuna qatichkan chaymi masta bautizachkan —nispa.

² Manam Jesuschu bautizarqaqa aswanqa discipulonkunam.

³ Chay rimasqankuta yacharuspanmi Judea lawmanta Jesus kutikurqa Galileaman.

⁴ Kutispanmi Samaria lawninta pasanan karqa.

⁵ Chaymi chayarurqa Sicar sutiyoq llaqtaman. Chaypim kachkarqa churin Joseyman qosqan Jacobpa chakran.

⁶ Chaypim karqa Jacobpa pozon. Jesusmi richkaspan pisiparuspan tiyaykurqa pozopa waqtanpi yaqa chawpi punchawta.

⁷ Samaria law warmi yaku horqoq hamuruptinmi Jesus nirqa: —Yakullayki mamáy —nispan.

⁸ Discipulonkunaqa manam chaypiñachu karqaku llaqtaman mikuy rantiq risqankurayku.

⁹ Chay Samaria law warmim Jesusta nirqa: —Judio kachkaspaykiqa ¿imanasqataq ñoqa samaritanataqa yakuta mañawanki? —nispa. Judiokunaqa manam rimanakuqkuchu Samariapi kaqkunawanqa.

¹⁰ Chaymi Jesus payta nirqa: —Sichum reqsiwaq Diospa qokuyninta chaynataq pim yaku mañakusuqnikita hinaspaqa ñoqatachá mañakuwankiman kawsachikuq yakuta hinaptinqa qoykimanmi —nispa.

¹¹ Hinaptinmi chay warmiñataq ñirqa: —Señor, manataq imaykipas kanchu yaku horqonaykipaqqa, pozopas ukuraqtaq. ¿Maymantataq qowankiman chay kawsachikuq yakutaqa?

¹² Ñawpa abueloyku Jacobmi saqewarqaku kay pozotaqa. Kay pozomantam tomaq kikinpas churinkunapas chaynataq animalninkunapas. ¿Icha paymantapas aswan munayniyoqchu qamqa kanki? —nispa.

¹³ Chaymi Jesusñataq nirqa: —Pipas kay yaku tomaqqa mosoqmantam yakunayachikunqa.

¹⁴ Ñoqapa yaku qosqay tomaqmi ichaqa haykapipas mana yakunayachikunqachu. Chay yaku qosqayqa toqyaq yaku hinam rikurinqa runapa ukunpi hinaspam qonqa wiñay kawsayta —nispa.

¹⁵ Chaymi warmiñataq nirqa: —Señor, qoykuwayá chay yakuta manaña yakunayachikunaypaq, chayna kaptinqa manañach hamusaqchu yaku horqoq —nispa.

¹⁶ Hinaptinmi Jesus nirqa: —Qosaykita qayamuspayá hamuychik kuska —nispa.

¹⁷ Chaymi warmiñataq nirqa: —Manam kanchu qosayqa —nispa. Chaymi Jesus nirqa: —Arí, allintam ninki “Manam kanchu qosayqa” nispayki.

¹⁸ Pichqañam karqa qosaykiqa, kunan kaqwanñataqmi uywanakuchkanki, arí chay nisqaykiqa cheqapmi.

¹⁹ Chaynata niptinmi warmiñataq ñirqa: —Señor, Diosmanta willakuqchusmi qamqa kasqanki.

²⁰ Ñawpaq abueloykum Diosta yupaycharqa kay moqopi, judiokunañataqmi ninkichik Jerusalenpim yupaychanaqa —nispa.

²¹ Hinaptinmi Jesus nirqa: —Creeway mamáy, hamuq punchawpiqa Dios Taytataqa yupaychankichik manam kay moqopichu nitaq Jerusalenpichu.

²² Samaria law runakunaqa yupaychankichik mana yachastinmi, ñoqaykum ichaqa yupaychaniku reqsisqaykuta, salvakuqqa hamun judio casta runakunamantam.

²³ Ichaqa hamuchkanmi punchaw, ñam chayamuchkanña, cheqap yupaychaqkunaqa Dios Taytatam cheqap espiritupi yupaychanqaku. Paymi chaynata munan llapa yupaychaqninkuna rurananta.

²⁴ Diosqa Espiritum, chaymi yupaychaqninkunapas yupaychananku cheqap espiritupi.

²⁵ Chaymi warmiñataq nirqa: —Yachanim Cristo nisqanku Mesias hamunanta, pay hamuspanmi lliwta willawanqaku —nispa.

²⁶ Jesusmi nirqa: —Kay rimapayaqnikim Mesiasqa kani —nispa.

²⁷ Chaynata rimachkaptinkum discipulonkuna chayaramurqaku hinaspam admirakurqaku warmiwan rimaqta qawaykuspanku, ichaqa manam mayqanninkupas nirqakuchu: “¿Imatataq tapuchkanki?” nispaqa otaq “¿imanasqataq warmiwanqa rimachkanki?” nispaqa.

²⁸ Warmim puyñunta saqeruspan kutirirqa llaqtaman hinaspam willarqa runakunaman:

²⁹ —Rispa qawamuychik, huk runam tukuy ima rurasqayta niykuwan, ichapas payqa Cristo —nispa.

³⁰ Chaymi llaqtamanta runakuna rirqaku Jesuspa kasqanman.

³¹ Discipulonkunañataqmi ruegarqa Jesusta: —Mikuykuy —nispanku.

³² Jesusñataqmi nirqa: —Ñoqapaqa kachkanñam mikunayqa qamkunapa mana yachasqaykichik —nispa.

³³ Discipulonkunañataqmi tapunakurqaku: —¿Pitaqcha aparamunman karqa mikuyta? —nispanku.

³⁴ Jesusmi nirqa: —Chaytaqa rurachkani kachamuwaqniypa munasqanta ruraspaymi hinaspa kamachisqanta tukuspaymi.

³⁵ Qamkunam ninkichik: “tawa killaraqmi faltachkan cosechapaq” nispa, ichaqa ñoqam nikichik, qawariychik tarpusqakunata, ñam kachkan poqosqaña cosechanapaq.

³⁶ Cosechapi llamkaqkunapas chaskinqañam pagonta, paykunam huñunqaku wiñay kawsaypaq cosechata chaymi kusikunqa tarpuqpas chaynataq rutuqpas.

³⁷ Runakunaqa cheqaptam ninku: “Tarpuqqa hukmi, hukñataqmi cosechaq” nispa.

³⁸ Ñoqam kacharqaykichik mana llamkasqaykichik kaqta cosechanaykichikpaq, hukkunamá llamkarqaqa, qamkunañataqmi paykunapa llamkasqanta tukupankichik.

³⁹ Chay Samaria law runakunam achkaq iñirqaku Jesusman: “Tukuy ima rurasqaytam niykuwan” nispa chay warmi nisqanrayku.

⁴⁰ Samaria law runakuna hamuspanmi Jesusta ruegarqaku paykunawan qeparinanpaq, chaymi Jesus paykunawan karqa iskay punchaw.

⁴¹ Jesuspa rimasqanta uyarispankum aswan achkaraq iñirqaku.

⁴² Chay warmitam nirqaku: —Manam qampa nisqallaykiwanñachu iñinikuqa aswanqa kikiykuñam uyariykuniku hinaspam yachaniku payqa cheqaptapuni kay pachapi runakuna salvaq kasqanta.

Rey yanapaqpa churinta Jesus sanoyachisqanmanta

⁴³ Jesusmi Samaria lawpi iskay punchaw karuspan Galilea lawman rirqa.

⁴⁴ Jesusmi niq: —Diosmanta willakuqtaqa kikinpa llaqtanpiqa manam allintaqa chaskinmankuchu —nispan.

⁴⁵ Galilea lawman chayaruptinkum chaypi runakuna kusikuywan chaskirqaku. Jerusalen *f**Pascua Fiestaman riqkunam rikumurqaku fiestapi Jesuspa tukuy imakunapas rurasqanta.

⁴⁶ Jesusmi kutirqa Galilea lawpi kaq Cana llaqtaman, chay llaqtapim ñawpaqta yakuta vinoyarachirqa. Capernaum llaqtapim karqa reyta yanapaq runa, paypa churinmi onqorqa.

⁴⁷ Chaymi Judea lawmanta Galileaman Jesuspa chayaramusqanta yacharuspan rirqa churin sanoyachinanpaq ruegakuq, chay onqoqqa ñam wañunayachkarqaña.

⁴⁸ Jesusmi nirqa: —Qamkunaqa manam creewaqchikchu admirakuypaq milagrokunata mana rikuspaykichikqa —nispa.

⁴⁹ Hinaptinmi reypa yanapaqninñataq nirqa: —Hakuchikyá manaraq churillay wañuruchkaptin —nispa.

⁵⁰ Jesusmi nirqa: —Ripukuyñayá, churikiqa sanoyarunñam —nispa. Chay runam Jesuspa nisqanta creespan ripukurqa.

⁵¹ Wasinman hichpaykuchkaptinmi sirvientenkuna taripaykamuspan nirqa: —Churikiqa sanoyarunñam —nispa.

⁵² Chaymi tapurqa: —¿Imay horatataq sanoyarurqa? —nispa. Chaymi nirqaku: —Qayna punchaw doce waqtaytam calenturan chinkarurqa —nispa.

⁵³ Chaymi taytan yuyarirurqa chay horatapuni Jesuspa nisqanta, paymi nirqa: “Churikiqa sanoyarunñam” nispa. Chaymi payqa llapallan aylluntin Jesusman iñikurqa.

⁵⁴ Kay iskay kaq milagrotaqa rurarqa Judeamanta Galileaman Jesus rispanmi.