Juan 21 - Quechua Ayacucho Bible 1987

Qanchis discipulonkunaman Jesuspa rikurisqanmanta

¹ Kaykunapa qepantam Jesus huktawan rikurirqa discipulonkunaman Tiberias Qochapa patanpi, kaynatamá rikurirqa:

² Simon Pedrowanmi kachkarqa mellizowan sutischasqa Tomas, Galilea law Cana llaqtayoq Natanael, Zebedeopa churinkuna hinaspa iskay discipulonkuna.

³ Simon Pedrom nirqa: —Risaqyá challwakuq —nispa. Chaymi wakinninpas nirqa: —Hakuchik ñoqaykupiwan —nispa. Botepi rispankum chay tutaqa mana imaniraqtapas challwarqakuchu.

⁴ Achikyamuqtam Jesus qochapa patanpi sayachkarqa, discipulonkunañataqmi mana yacharqakuchu Jesus kasqanta.

⁵ Jesusmi nirqa: —Qarikuna ¿manachu challwa hapisqaykichik kan? —nispa. Paykunañataqmi nirqaku: —Manam kanchu —nispanku.

⁶ Chaymi Jesus nirqa: —Botepa *f**alleqnin lawman mallaykichikta wischuychik hinaspaqa hapinkichikmi. Nisqanta hina ruraspankum manaña malla chutayta atirqakuñachu achkallaña challwa kasqanrayku.

⁷ Jesuspa kuyasqan discipulonñataqmi Pedroman nirqa: —Payqa Señormi —nispa. Simon Pedroñataqmi Señor kasqanta yacharuspan mana pachayoq kasqanrayku huknin pachanta hinakuykuspan yakuman pawakaykamurqa.

⁸ Wakiqnin discipulonkunañataqmi botewan yakupa patanman chayamurqaku challwata mallapi aysamuspanku, yakupa patanmanqa karqa yaqa huk cuadrallañam.

⁹ Qochapa patanman chayaramuspankum tarirurqaku nina sansata, chaypa hawanpiñataq challwatawan tantata.

¹⁰ Jesusmi nirqa: —Challwa hapimusqaykichikta apamuychik —nispa.

¹¹ Simon Pedrom boteman yaykuspa qochapa patanman mallata chutamurqa hunta challwayoqta, chaymi karqa pachak pichqa chunkan kimsayoq hatun challwakuna, achkallaña challwa kachkaspapas manam mallataqa llikirurqachu.

¹² Jesusmi nirqa: —Hamuychik mikusunchik —nispa. Manataqmi mayqan discipulonpas atirqachu: “¿Qamqa pitaq kanki?” niyta. Yacharqakum payqa Señorpuni kasqanta.

¹³ Jesusmi asuykuspa qoykarirqa tantatawan challwata.

¹⁴ Kaywanqa kimsakamañam Jesusqa discipulonkunaman rikurirqa wañusqanmanta kawsarimuspan.

Simon Pedrowan Jesuspa rimasqanmanta

¹⁵ Mikuruptinkuñam Simon Pedrota Jesus tapurqa: —Juanpa churin Simon ¿paykunamanta mastachu kuyawanki? —nispa. Pedroñataqmi nirqa: —Arí Señor, qanmi yachanki kuyasqayta —nispa. Chaymi Jesus nirqa: —Chaynaqa ovejachaykunatayá michiy —nispa.

¹⁶ Huktawanmi tapurqa: —Juanpa churin Simon ¿kuyawankichu? —nispa. Pedroñataqmi nirqa: —Arí Señor, qanmi yachanki kuyasqayta —nispa. Chaymi Jesus nirqa: —Chaynaqa ovejaykunatayá nanachikuy —nispa.

¹⁷ Kimsakamaña tapuspanmi nirqa: —Juanpa churin Simon ¿kuyawankichum? —nispa. Pedroñataqmi llakikururqa kimsa kutikamaña “Kuyawankichu” nispa tapuptin, chaymi nirqa: —Señor, qamqa tukuy imatam yachanki, yachankim kuyasqaytapas. Chaymi Jesus nirqa: —Chaynaqa ovejaykunatayá michiy.

¹⁸ Cheqaptapunim niki, mozoraq kaspaykiqa weqawnikita watakuykuspam riq kanki munasqaykiman, yuyaqña kaptikim ichaqa hukña watasunki rikraykita hoqariptiki hinaspam pusasunki mana riy munasqaykikunaman.

¹⁹ Chaynata nispanmi Jesus entiendechirqa cruzpi wañuspa Pedroqa Diosta alabananmanta, paytam nirqa: —Qatiway —nispa.

Jesuspa kuyasqan discipulonmanta

²⁰ Pedrom qepanta qawarispan rikururqa Jesuspa kuyasqan discipulon qatimuchkaqta. Paymi *f**Pascuapi cenaptinku waqtanpi kaspa tapurqa: “Señorlláy ¿mayqantaq traicionasunki?” nispa.

²¹ Payta rikuruspanmi Jesusta Pedro tapurqa: —Señor, paytaqa ¿imataq sucedenqa? —nispa.

²² Chaymi Jesusñataq nirqa: —Munaptiyqa payqa kawsanmanmi kutimunaykamapas ¿imataq qamtaqa qokusunki? Qatiway —nispa.

²³ Chaymi iñiqkuna ukupi noticia karqa: “Chay discipuloqa manas wañunqachu” nispanku. Jesusqa nichkarqa manam mana wañunanmantachu, payqa nirqa: “Munaptiyqa payqa kawsanmanmi kutimunaykamapas ¿imataq qamtaqa qokusunki?” nispam.

²⁴ Chay discipulopunim kaykunata willakuchkan hinaspam qellqachkan. Chaymi yachanchik tukuy nisqanqa cheqap kasqanta.

²⁵ Achkallañam kachkan Jesuspa tukuy ima rurasqankunaqa, sichu sapakamamanta qellqaptinkuqa piensasqayman hinaqa manachá kay pachapas haypanmanchu llapa libro churanapaq.