Juan 20 - Quechua Ayacucho Bible 1987

Jesuspa kawsarimusqanmanta

¹ Domingo punchawtam Magdala llaqtayoq Maria rirqa sepulturata mana runa rikuy tutapaytaraq, paymi rikururqa sepultura tapasqanku rumiqa suchurachisqa kasqanta.

² Chaymi kallparqa Simon Pedropa kasqanmanwan Jesuspa kuyasqan discipulonpa kasqanman, paykunatam nirqa: —Señortam aparusqaku sepulturanmanta, manam yachanikuchu mayman churasqankutapas —nispa.

³ Pedrom huknin discipulopiwan rirqaku sepultura qawaq.

⁴ Iskayninkum rirqaku kallpaylla, Pedromantapas apurawtaraq huknin kaq kallpaspanmi puntata chayarurqa sepulturaman.

⁵ Kurkuykuspa qawaykuptinmi sabanaskunaqa churasqa kachkasqa, ichaqa manam yaykurqachu.

⁶ Simon Pedroñataqmi qepataña chayaramuspan yaykururqa sepulturaman, paypas rikuykurqam sabanaskuna churarayaqta.

⁷ Rikurqataqmi Jesuspa umanman watasqanku telatapas, chayqa sapaq lawpiñam patarasqa kachkasqa, chayna sapaq lawpitaqmi kachkasqa sabanaspas.

⁸ Sepulturaman punta chayaq discipulopas yaykururqam, chaymi tukuy chaykunata qawaykuspan creerqa.

⁹ Manaraqmi entienderqakuchu Jesuspa kawsarimunanmanta Bibliapa nisqantaqa.

¹⁰ Hinaptinmi chay discipulokunaqa kutikurqaku maymi kasqankuman.

Magdala llaqtayoq Mariaman Jesuspa rikuriykusqanmanta

¹¹ Mariañataqmi waqastin qeparurqa sepulturapa waqtanpi. Waqaspanmi kurkuykuspa qawaykurqa sepulturapa ukunta.

¹² Chaypim rikururqa yuraq pachayoq iskay angelkunata. Paykunam tiyachkasqa Jesuspa cuerponpa kasqanpi, hukninmi kachkasqa sawnan lawpi hukninñataq chakin lawpi.

¹³ Mariatam tapurqaku: —Señora ¿Imanasqataq waqachkanki? —nispa. Payñataqmi nirqa: —Señorniytam aparusqaku chaymi mana yachanichu mayman churasqankutapas —nispa.

¹⁴ Chaynata nispanmi muyuriykuspan rikururqa Jesusta chaypi sayachkaqta. Mariaqa manam yacharqachu Jesus kasqanta.

¹⁵ Jesusmi tapurqa: —Señora ¿imanasqataq waqachkanki? ¿Pitataq maskachkanki? —nispan. Mariañataqmi piensarqa huerta cuidaq kasqanta chaymi nirqa: —Señor, qam aparuspaykiqa willaykuwayá maypim churaramusqaykita chaynapi apakaramunaypaq —nispa.

¹⁶ Jesusñataqmi nirqa: —¡Maria! —nispa. Payñataqmi muyuriykuspan *f**hebreo idiomapi nirqa: —¡Raboni! —nispa. Chayqa “yachachikuq” ninanmi.

¹⁷ Jesusmi nirqa: —Amaraq hapiwaychu, manaraqmi Taytaymanqa riniraqchu. willamuyá wawqeykunaman, richkanim Taytaypata, qamkunapapas Taytaykichikpata, ñoqapa Diosniyman, qamkunapapas Diosnikichikman.

¹⁸ Chaymi Magdala llaqtayoq Maria Señor rikusqanmanta willamurqa discipulonkunaman, willamurqataqmi kikin Señorpa imakunam kunasqantapas.

Discipulonkunaman Jesuspa rikurisqanmanta

¹⁹ Hina chay punchawllam domingo tutaykuqta discipulonkuna huñunakururqaku punkuta wichqakuykuspa, chaynataqa rurarqaku judiokunata manchakusqankuraykum. Jesusmi yaykuruspa discipulonkunapa chawpinpi sayaykuspa nirqa: —Hawkallayá kaychik —nispa.

²⁰ Chaynata niykuspanmi qawachikurqa makinkunatawan waqtanta, paykunañataqmi Señorta qawaykuspanku kusikurqaku.

²¹ Huktawanmi Jesus nirqa: —Hawkallayá kaychik, imaynam Taytay kachamuwarqa, chaynam qamkunatapas kachaykichik —nispa.

²² Chaynata niykuspanmi paykunaman pukuykurqa: —Chaskiychik Chuya Espirituta —nispan.

²³ Huchakuna pampachasqaykichikqa ñam pampachasqaña, mana pampachasqaykichikñataqmi hina kaqlla kachkan —nispa.

Tomasman Jesuspa rikuriykusqanmanta

²⁴ Tomasmi chunka iskayniyoqmanta huknin karqa mellizowan sutichasqa. Jesus hamuptinqa payqa manam chaypichu karqa.

²⁵ Wakinnin discipulonkunam willarqa: —Rikuykunikum Señorta —nispa. Tomasñataqmi nirqa: —Mana rikusaqchu makinpi clavospa yaykusqanta hinaspataq dedoyta mana hinasaqchu clavospa yaykusqanman chaynataq makiywan mana llapchasaqchu waqtanpi tuksisqanta hinaspaqa manam creesaqchu —nispa.

²⁶ Pusaq punchawmantam discipulonkuna mosoqmanta huñunakurqaku wasipi, Tomaspas paykunawan kuskam kachkarqa. Punku wichqarayachkaptinmi Jesus yaykuykamurqa, paykunapa chawpinpi sayaykuspam nirqa: —Hawkallayá kaychik —nispa.

²⁷ Hinaspam Tomasta nirqa: —Dedoykita hinay kayman hinaspa qaway makiyta, makikita haywarimuspayá hinay waqtayman. Amaña iskayrayaspayá creey —nispa.

²⁸ Tomasñataqmi nirqa: —¡Señorlláy, Dioslláy! —nispa.

²⁹ Jesusmi nirqa: —Tomas, rikuykuwaspaykiñam creerunki ¡mayna kusisqam kanqa mana rikuwachkaspan creeqkunaqa!

Kay libroqa imapaqmi qellqasqa kasqanmanta

³⁰ Jesusqa achkaq *f**milagrokunataraqmi rurarqa discipulonkunapa qawasqanta. Chaykunaqa manam qellqasqachu kachkan kay libropiqa.

³¹ Kaykunataqa qellqarqani Jesusqa Diospa Churin Cristo kasqan creenaykichikpaqmi, creespaykichikñataq payrayku wiñay kawsayniyoq kanaykichikpaq.