Juan 19 - Quechua Ayacucho Bible 1987

¹ Chaynata niptinkum Pilato azotechirqa Jesusta.

² Soldadokunañataqmi kichkamanta coronata simpaspanku Jesuspa umanman churarqaku, hinachirqakutaqmi reypa hawa pachanwanpas.

³ Asuykuspankum nirqaku: —¡Kawsachun Judiokunapa reynin! Chaynata nispankum uyanpi laqechurqaku.

⁴ Pilatom mosoqmanta lloqsimuspan nirqa: —Jesustam horqomuchkani, yachaychikyá, paypiqa manam imatapas tarinichu sentencianaypaq hinaqa —nispa.

⁵ Jesusmi lloqsimurqa hawaman kichkamanta coronayoq hinaspa reypa pachanwan churakusqa. Chaymi Pilato nirqa: —¡Kayqayá kay runaqa! —nispa.

⁶ *f**Sacerdotekunapa jefenkunañataqmi guardiakunapiwan Jesusta rikuykuspanku qaparirqaku: —¡Chakataruy, chakataruy! —nispa. Pilatoñataqmi nirqa: —¡Qamkunayá chakatamuychik! Paypiqa manam imatapas tarinichu sentencianaypaq hinaqa —nispa.

⁷ Judiokunañataqmi nirqa: —Kanmi ñoqaykupa leyniyku, chayman hinaqa wañunanmi yachakun “Diospa Churinmi kani” nisqanrayku.

⁸ Chay nisqankuta uyariruspanmi Pilatoqa astawanraq mancharikururqa.

⁹ Palacioman kutichispanmi Jesusta tapurqa: —¿Maymantamá qamqa kanki? —nispa. Jesusñataqmi mana imatapas nirqachu.

¹⁰ Chaymi Pilato nirqa: —¿Manachu contestawanki? ¿Manachum yachanki qamtaqa kacharinaypaq otaq chakatanaypaqpas atiyniyoq kasqayta? —nispa.

¹¹ Jesusñataqmi nirqa: —Dios atiyta mana qosuptikiqa manam imanawankimanchu. Chaynaqa qampa makikiman ñoqata churamuqmi qanmantapas aswan huchayoqqa —nispa.

¹² Chayta uyariruspanmi Pilatoqa astawan kachaykuyta munarqa chaymi judiokunañataq astawanraq qaparkacharqaku: —Payta kachaykuspaqa manam Rey Cesarpa amistadninchu kanki. Pipas reypaq hapikuqqa Cesarpa enemigonmi —nispa.

¹³ Chaynata niptinkum hawaman Jesusta pusachimuspan sentencianan cortepi Pilato tiyaykurqa. Chay sitiopa sutinmi karqa Loza Pampa, hebreopiñataq Gabata.

¹⁴ *f**Pascua Fiestapaq huk punchawllaña faltachkaptinmi yaqa chawpi punchawta judiokunata Pilato nirqa: —Kayqayá reynikichikqa —nispa.

¹⁵ Paykunañataqmi qaparkacharqaku: —¡Wañuchun, wañuchun! ¡Chakatay! —nispa. Pilatoñataqmi nirqa: —¿Reynikichiktachu chakatarusaq? —nispa. *f**Sacerdotekunapa jefenkunañataqmi nirqa: —Rey Cesarllam reyniykuqa, manam hukqa kanchu —nispa.

¹⁶ Hinaptinmi Jesusta paykunaman Pilato entregaykurqa chakatanankupaq chaymi Jesusta pasachirqaku.

Jesusta chakatasqankumanta

¹⁷ Jesusmi lloqsirqa cruzninta hombrokuykuspa Uma Tullu Pataman, hebreopi sutinñataqmi Golgota.

¹⁸ Chaypim chakatarqaku Jesusta, paypa kaylaw-waklaw waqtanpiñataqmi chakatarqaku iskay runata.

¹⁹ Pilatom cruzpa umanpi qellqachirqa JUDIOKUNAPA REYNIN NAZARETMANTA KAQ JESUS niqta.

²⁰ Chay letrerotam achkaq judiokuna leerqaku. Jesus chakatasqanku lugarqa karqa llaqtapa hichpallanpim. Chay letrerotaqa qellqachirqa kimsa idiomapim, hebreopi, latinpi hinaspa griegopi.

²¹ Chaymi *f**sacerdotekunapa jefenkuna Pilatota nirqaku: —Ama qellqaychu “judiokunapa Reyninmi” niqtaqa. Qellqaspaqa-qellqay: “Judiokunapa Reyninmi kani” niqtayá.

²² Pilatoñataqmi nirqa: —ñam qellqasqaña kachkan —nispa.

²³ Jesusta chakataruspankum soldadokuna paypa pachanta tawaman rakinakururqaku. Jesuspaqa karqataqmi ukunakunan pachanpas mana sirasqa kunkanmanta urayninman awasqa.

²⁴ Chaymi soldadokuna ninakurqaku: —Ama llikispalla suertearusunchik mayqanninchikpaqpas kananpaq —nispa. Chaynapim cumplikurqa Bibliapi kayna niq: Pachallaykunatam rakinakurqaku. Pachallaypaqmiki suertetaraq choqarqaku. Chaynatamá rurarqaku soldadokuna.

²⁵ Cruzpa hichpanpim kachkarqa Jesuspa maman, kachkarqataqmi mamanpa ñañanpas, Cleofaspa warmin Mariapas chaynataq Magdala llaqtayoq Mariapas.

²⁶ Jesusmi mamantawan kuyasqan discipulonta rikuruspan mamanta nirqa: —Mamáy, chayqaya wawayki —nispa.

²⁷ Discipulontañataqmi nirqa: —Chayqaya mamayki —nispa. Chay horamantam Jesuspa mamantaqa discipulonña wasinman pusarqa.

Jesuspa wañukusqanmanta

²⁸ Kaykuna pasakuptinqa Jesusqa yacharqañam tukuy imapa cumplikusqanta, chaymi Bibliapa nisqan cumplikunanpaq nirqa: —Yakunayaruwanmi —nispa.

²⁹ Chaypim kachkarqa puyñupi vinagre, chaymi kaspipa puntanpi esponjata chapuykuspa Jesusman haywarqaku.

³⁰ Chaymi Jesusñataq vinagreta malliykuspan nirqa: —¡Tukusqañam! —nispa. Hinaspam umanta kumuykachispa espiritunta Taytanman qoykuspa wañukurqa.

Jesuspa waqtanta soldado tuksirusqanmanta

³¹ *f**Pascua Fiestapaq huk punchawllaña faltaptinmi preparakusqankurayku judiokuna mana munarqakuchu *f**samana punchawpi cruzpi wañusqakuna hinalla kananta, chay samana punchawqa karqa hatun punchawmi. Chaymi Pilatota mañakurqaku chakatasqakunapa piernan pakichimunanpaq hinaspa cuerponkuta uraykachimunanpaq.

³² Soldadokuna rispanmi pakirqaku hukninpata chaynataq iskay kaqpatapas.

³³ Jesusman asuykuspa qawaykuptinkuñataqmi payqa wañurusqaña, chaymi paypa piernantaqa manaña pakirqakuchu.

³⁴ Huknin soldadom ichaqa Jesuspa waqtanta tuksirurqa lanzawan chaymi pawaramurqa yawarwan yaku.

³⁵ Tukuy chaykunata rikuqqa ñoqa Juanmi kani, chayraykum willakuni, ñoqaqa yachanim cheqap nisqayta chaynapi qamkunapas creenaykichikpaq.

³⁶ Kaykunaqa sucedekurqa Bibliapi: “Manam pakisqachu karqa tullunqa” niq cumplikunanpaqmi.

³⁷ Huk partepipas nichkantaqmi: “Paykunaqa tuksirusqankutam rikunqaku” nispa.

Jesusta pampasqankumanta

³⁸ Kaykunapa qepantam Arimatea llaqtapi kaq Josey ruegakurqa Pilatota Jesuspa cuerponta qonanpaq. Joseyqa pakasqallapi Jesuspa qatiqninmi karqa, chaynaqa karqa judiokunata manchakusqanraykum. Pilato mana harkakuptinmi Joseyqa aparqa Jesuspa cuerponta.

³⁹ Jesusman puntata tutallan watukuq Nicodemopas rirqam yaqa pachak libra mirrawan *f**aloes chaqrusqata aparikuspan.

⁴⁰ Joseywan Nicodemom chay miski asnaqwan fino sabanasta chapurqaku hinaspam Jesuspa cuerponta wankururqaku, chaynataqa rurarqaku judiokunapa pampakunankuman hinam.

⁴¹ Jesusta chakatasqanku sitiopim karqa huerta, chaypim karqa mosoq sepultura manaraq pipapas pampakusqan.

⁴² Chaypim Jesuspa cuerponta pamparurqaku hichpa kasqanrayku, ñam qallarichkarqaña *f**Pascua Fiestapaq judiokunapa preparakuynin.