Juan 18 - Quechua Ayacucho Bible 1987

Jesusta presochasqankumanta

¹ Chaykunata niruspanmi Jesus lloqsirqa discipulonkunawan Cedron Wayqopa waklawninman rinankupaq. Chaypi kaq huertamanmi Jesus yaykurqa discipulonkunapiwan.

² Traicionaqnin Judaspas sumaqtam reqsirqa chay sitiotaqa, chaypiqa achka kutipim Jesus huñunakurqa discipulonkunawan.

³ Chaymanmi Judas chayaramurqa soldadokunawan hinaspa *f**sacerdotekunapa jefenkunapa hinaspa *f**fariseokunapa kachasqan guardiakunawan. Paykunam rirqaku farolniyoq, mecheroyoq hinaspa armayoq.

⁴ Jesusqa yacharqañam tukuy ima sucedenanta chaymi asuykuspa tapurqa: —¿Pitataq maskachkankichik? —nispa.

⁵ Paykunañataqmi nirqa: —Nazaretmanta kaq Jesustam —nispa. Jesusñataqmi nirqa: —Ñoqam kani —nispa. Traicionaqnin Judaspas paykunawanmi kachkarqa.

⁶ “Ñoqam kani” nispa Jesus niptinmi runakuna qepaman suchuriruspanku pampaman wichiykurqaku.

⁷ Jesusmi mosoqmanta tapurqa: —¿Pitataq maskachkankichik? —nispa. Paykunañataqmi nirqa: —Nazaretmanta kaq Jesustam —nispanku.

⁸ Jesusñataqmi nirqa: —Ñam nikichikña “Ñoqam kani” nispa. Ñoqata maskawaspaykichikqa paykunataqa dejaychikyá pasakunankupaq —nispa.

⁹ Chaynapim cumplikurqa Jesuspa ñawpaq rimarisqan, paymi nirqa: “Taytapa qowasqankunataqa waqaycharqanim, manam mayqanninpas chinkarqachu” nispa.

¹⁰ Simon Pedroñataqmi espadayoq kasqanrayku chayta horqoykuspa Malco sutiyoq runapa *f**alleq rinrinta qorururqa. Payqa karqa *f**sacerdotekunapa jefenpa runanmi.

¹¹ Jesusñataqmi Pedrota nirqa: —Espadaykita kutiykachiy vainanman. ¿Taytaypa ñakarinaypaq qowasqantaqa manachu chaskiyman? —nispa.

Anaspa wasinman Jesus pusasqa kasqanmanta

¹² Soldadokunam jefenkupiwan hinaspa judiokunamanta kaq guardiakunapiwan Jesusta hapiruspanku watarurqaku.

¹³ Hinaspam puntata pusarqaku Anaspa wasinman. Anasqa karqa Caifaspa suegronmi. Chay watapim Caifasqa karqa *f**sacerdotekunapa jefen.

¹⁴ Manachum Caifasqa puntataraq judiokunata nirqa: “Aswan allinqa kanman huk runalla nacionninchikpa rantinpi wañuyninmi” nispa.

Jesusta Pedro negasqanmanta

¹⁵ Simon Pedroñataqmi huknin discipulomasinwan qatirqaku Jesusta, chay discipulomasinqa karqa *f**sacerdotekunapa jefenpa reqsisqanmi, chaymi Jesuswan kuska yaykururqaku chay jefepa pationman.

¹⁶ Pedroñataqmi qeparurqa hawa law punkupa waqtallanpi chaymi sacerdotekunapa jefenpa reqsisqan discipulo lloqsiramuspan punku cuidaqta ruegakuspa Pedrota pusaykurqa.

¹⁷ Punku cuidaqñataqmi Pedrota nirqa: —Qamqariki kachkanki kay runapa huknin discipulonmi —nispa. Pedroñataqmi nirqa: —Manam ñoqachu kani —nispa.

¹⁸ Chirimuptinmi criadokunawan guardiakuna ninata sansarachispanku sayaspa qonikuchkarqaku, chaypim Pedropas paykunawan qonikuchkarqa.

Jesusta sacerdotekunapa jefen tapusqanmanta

¹⁹ *f**Sacerdotekunapa jefenmi tapurqa Jesusta pikunam discipulonkuna kasqanmanta chaynataq imakunam yachachisqanmanta.

²⁰ Jesusmi nirqa: —Ñoqaqa libretam rimarqani llapa runakunamanqa. Tukuy tiempom yachachirqani *f**huñunakuna wasikunapipas chaynataq llapa judiokunapa huñunakunan templopipas, manam pakasqapichu imatapas ñoqaqa rimarqani.

²¹ ¿Imanasqataq ñoqataqa tapuwanki? Tapuyqa uyariqniykunatayá, paykunayá nichun imamantam rimasqaytapas. Paykunaqa yachanmi imam rimasqaytapas.

²² Chaynata niptinmi chaypi sayaq huknin guardia Jesusta laqyarurqa uyanpi hinaspam nirqa: —¿Chaynatachu ninayki *f**sacerdotekunapa jefenta? —nispa.

²³ Chaymi Jesusñataq nirqa: —Mana allinta rimaruptiyqa willakuyá mana allin rimasqaymanta. Ichaqa nisqay allin kaptinqa ¿imanasqamá maqawankiqa? —nispa.

²⁴ Anasmi watasqata Jesusta pusachirqa *f**sacerdotekunapa jefen Caifasman.

Jesusta Pedro huktawan negasqanmanta

²⁵ Pedroqa hinallam sayaspa ninapi qonikuchkarqa hinaptinmi nirqaku: —Qamqariki kanki kay runapa huknin discipulonmi —nispa. Pedroñataqmi negakuspan nirqa: —Manam ñoqachu kani —nispa.

²⁶ Chaymantam *f**sacerdotekunapa jefenpa sirvienten tapurqa, chay sirvienteqa karqa Pedrowan rinrin kuchurachikuq runapa ayllunmi, paymá nirqa: —¿Manachu rikurqayki huertapi Jesuswan kuska kaqta? —nispa.

²⁷ Chaymi huktawan Pedro negakurqa hinaptinmi chaylla gallo waqaramurqa.

Pilatopa qayllanpi Jesus kasqanmanta

²⁸ Caifaspa wasinmantam Jesusta pusarqaku prefectopa palacionman. Ña achikyaramuptinmi judiokunaqa manaña yaykurqakuchu palacioman. Chayman yaykuspaqa manañam *f**Pascuapi carnerota mikuyta atinmankuchu karqa.

²⁹ Chaymi Pilato hawaman lloqsimuspa paykunata nirqa: —¿Imamantataq kay runata acusankichik? —nispa.

³⁰ Paykunañataqmi nirqaku: —Allin runa kaptinqa manachá entregaykikumanchu —nispa.

³¹ Hinaptinmi Pilatoñataq nirqa: —Pusaspaykichikyá juzgamuychik leynikichikman hina —nispa. Judiokunañataqmi nirqaku: —Qamkunapa leynikichikman hinaqa manam pitapas wañuchiymankuchu —nispa.

³² Chaynapim imaynam cruzpi wañunanmanta Jesuspa nisqan cumplikurqa.

³³ Pilatom palacioman kutirispan Jesusta tapurqa: —¿Qamchu kanki judiokunapa reynin? —nispa.

³⁴ Chaymi Jesusñataq nirqa: —¿Chaynataqa niwanki kikillaykimantachu icha hukchu nisurqanki ñoqamanta? —nispa.

³⁵ Pilatoñataqmi nirqa: —¿Judiochu ñoqaqa kani? Llaqtamasikikunawan *f**sacerdotekunapa jefenmi qamtaqa entregawarqa, chaynaqa ¿imatamá rurarunki? —nispa.

³⁶ Hinaptinmi Jesusñataq nirqa: —Munaychakuyniyqa manam kay pachamantachu, kay pachallamanta kaptinqa qatiwaqniykunachá peleanmanku judiokunapa jefenkunaman mana entregasqa kanaypaq. Munaychakuyniyqa manamá kay pachamantachu.

³⁷ Hinaptinmi Pilato nirqa: —Chaynaqa reychu kanki —nispa. Chaymi Jesusñataq nirqa: —Qanmi nichkanki rey kasqaytaqa. Chaypaqmi ñoqaqa nacerqani, chaypaqtaqmi hamurqani kay pachamanpas chaynapi cheqapmanta rimanaypaq. Cheqap kasukuqkunaqa uyarinmi nisqaykunata.

³⁸ Pilatom nirqa: —¿Imataq chay cheqapqa? —nispa. Chaynata tapuruspanmi Pilatoqa huktawan lloqsimurqa hinaspam judiokunaman nirqa: —Kay runapiqa manam imatapas tarinichu sentencianaypaq hinaqa.

Wañunanpaq Jesus sentenciasqa kasqanmanta

³⁹ Qamkunapa costumbrekichikman hinam *f**Pascua Fiestapi ñoqa kacharini huk presota. ¿Chaynaqa judiokunapa reynin kacharinaytachu munankichik? —nispa.

⁴⁰ Chaynata niptinmi llapallanku qaparirqaku: —¡Ama paytaqa kachariychu, Barrabasta kachariyqa! —nispa. Barrabasqa karqa suwa runam.