Juan 16 - Quechua Ayacucho Bible 1987

¹ —Tukuy kaykunatam nikichik mana hukmanyanaykichikpaq.

² Qarqomusunkichikmi *f**huñunakuna wasimanta, pipas wañuchisuqnikichikmi ninqa: “Kaykunata ruraspayqa Diostam servichkani” nispan.

³ Kaykunataqa ruranqaku Taytatawan ñoqata mana reqsiwasqankuraykum.

⁴ Kaykunataqa nikichik chay tiempokuna chayamuptin kay nisqaykunata yuyarinaykichikpaqmi. —Ñawpaqmantaraq qamkunawan kasqayraykum kaykunataqa manaraq nirqaykichikchu.

Espiritupa rurasqanmanta

⁵ Kunanmi ichaqa richkaniña kachamuwaqniywan kuska kamunaypaq. Ichaqa manam mayqannikichikpas tapuwankichikchu: “¿Maytataq richkanki?” nispaqa.

⁶ Kaykuna nisqaywanmi sinchi llakisqa kachkankichik.

⁷ Cheqaptam nikichik, allinpunim ñoqapa rinayqa, mana riptiyqa manach hamunmanchu qamkuna Kallpanchasuqnikichik, rispaymi ichaqa kachamusqaykichik.

⁸ Pay hamuspanmi runakunata convencechinqa huchayoq kasqankumanta, Diospa munasqanman hina kawsanankumanta hinaspa juicio punchawmanta.

⁹ Ñoqapi mana creesqankuraykum huchayoq kanku.

¹⁰ Cuentatam qokunqaku Diospa munasqanman hina kawsanankumanta. Ñoqaqa richkani Taytapa kasqanmanmi, qamkunapas manañam rikuwankichikchu.

¹¹ Cuentatam qokunqaku juicio punchawmanta, kay pachapi kamachikuqqa ñam juzgasqaña.

¹² —Achkaraqmi ninay kachkan qamkunaman ichaqa manaraqmi entiendewaqchikchu.

¹³ Cheqap Espiritu hamuspanñam yachachisunkichik tukuy imapas cheqap kaqkunataqa, payqa manam kikillanmantachu rimanqa aswanqa llapa imapas uyarisqanmantam hinaspam willasunkichik qepa tiempokunapi sucedekunanmanta.

¹⁴ Payqa ñoqatam alabawanqa, ñoqamanta chaskispanmi willasunkichik qamkunaman.

¹⁵ Taytapa kaqninkunaqa ñoqapam chaymi nirqaykichik: Espirituqa ñoqamanta chaskispam willasunkichik qamkunaman, nispa.

Llakikuypas kusikuymanña tikrakunanmanta

¹⁶ —Asllamantam mana rikuwankichikñachu hinaspam asllatawanraq rikuwankichik.

¹⁷ Chaynata niptinmi wakin discipulonkuna tapunakurqaku: —¿Imanichkantaq: “Asllamantam mana rikuwankichikñachu hinaspam asllatawanraq rikuwankichik, ñoqaqa richkaniñam Taytapa kasqanman” nispaqa?

¹⁸ ¿Imaninanmá chay asllamantaqa? Manam nisqantaqa entiendenchikchu.

¹⁹ Jesusmi musyarurqa tapukuy munasqankuta hinaspam nirqa: —Nirqaykichikmi qamkunata: “Asllamantam mana rikuwankichikñachu hinaspam asllatawanraq rikuwankichik” nispa.

²⁰ Cheqaptapunim nikichik, qamkunam waqaspa llakikunkichik hinaptinmi runakunañataq kusikunqaku. Ichaqa llakisqallaña kachkaspapas kusikunkichikmi.

²¹ Warmipa wachakunan tiempo chayaramuptinmi payqa tarikun llakisqallaña, wawan naceramuptinñataqmi qonqarun llakinkunata, kay pachapi wawan nacerusqanraykum payqa kusikun.

²² Chaynamá qamkunapas kunan llakisqa kachkankichik, ñoqa kutimuptiymi ichaqa kusisqa kankichik, chay kusikuytaqa manam pipas qechusunkichikchu.

²³ —Chay punchawpiqa manañam imamantapas tapuwankichikchu. Cheqaptapunim nikichik, sutiypi mañakuptikichikqa taytaqa qosunkichikmi.

²⁴ Kunankamam sutiypiqa manaraq mañakurqankichikchu. Mañakuychikyá hinaspaqa chaskinkichikmi chaynapi cheqap kusikuyniyoq kanaykichikpaq.

Kay pachapi mana allinkunata Jesuspa vencesqanmanta

²⁵ —Kaykunatam nikichik rikchanachiykunawan, hamuq punchawpiqa manañam rikchanachiykunawanñachu rimapayasqaykichik, aswanqa sutillatañam rimapayasqaykichik Taytaymanta.

²⁶ Chay punchawmi Taytata mañakunkichik ñoqapa sutiypi, manam ñoqañachu Taytataqa ruegapusqaykichik.

²⁷ Taytayqa kuyasunkichikmi ñoqata kuyawasqaykichikrayku, qamkunaqariki creerqankichikmi Diosmanta hamusqayta.

²⁸ Taytapa kasqanmantam hamurqani kay pachaman, kunanñataqmi kay pachata saqespay kutisaq Taytayman.

²⁹ Discipulonkunañataqmi nirqa: —Kunanqa sutillatañam rimachkanki, manam rikchanachiykunawanñachu.

³⁰ Kunanqa yachanikuñam tukuy ima yachaq kasqaykita, manañam pipas tapusunkiñachu, chayraykum creeniku Diosmanta hamusqaykita —nispa.

³¹ Jesusñataqmi nirqa: —¿Ñachu kunanqa creerunkichikña?

³² Ñam hora chayaramunña, sapakamam cheqerunkichik hinaspam sapallaytaña saqeruwankichik. Ichaqa manam sapallaychu kachkani, Taytaymi ñoqawanqa kachkan.

³³ Kaykunatam nikichik yanapasqayrayku hawkalla kanaykichikpaq. Kay pachapiqa ñakarinkichikmi ichaqa kallpanchakuychikyá, kay pachapi mana allinkunataqa venceruniñam.