Juan 12 - Quechua Ayacucho Bible 1987

Jesuspa chakinman aceite talliq warmimanta

¹ *f**Pascua Fiestapaq soqta punchawllaña faltachkaptinmi Jesus rirqa Lazaropa *f**yachasqan Betania llaqtachaman. Paytam Jesus kawsarichirqa wañusqamantaña.

² Jesuspaq convidota ruraptinkum Marta servirqa, Lazaroñataqmi mesapi tiyachkarqa Jesuswan.

³ Mariañataqmi apamurqa sinchi precioyoq miski asnaq yaqa huk botella aceiteta. Chayqa rurasqa karqa nardo sutiyoq sachamantam, chaywanmi Jesuspa chakinman untaykurqa hinaspam chukchanwan chakichirqa. Chaymi wasi huntata miskillataña asnarirqa.

⁴ Discipulonkunamanta traicionaqnin kaq Judas Iscariotem nirqa:

⁵ —Huk wata jornalpa chanin kay miski asnaq aceitetaqa rantikuruchwanchiki karqa, hinaspachiki chay qollqetaqa wakchakunaman qoykuchwan karqa —nispa.

⁶ Judasqa nirqa chaynataqa manam wakchakunata kuyaspachu aswanqa suwa kaspanmi, paymi qollqeta waqaycharqa, chaymi payqa horqokuq qollqe waqaychasqanmanta.

⁷ Chaymi Jesus nirqa: —Ama harkakuychu, kaytaqa waqaycharqa pampakunay punchawpaqmi.

⁸ Wakchakunaqa qamkunawanmi haykapkamapas kanqa, ñoqam ichaqa mana tukuy tiempochu qamkunawan kasaq.

Lazarota wañurachiy munasqankumanta

⁹ Achkaq judiokunam yacharurqaku Betaniapi Jesus kasqanta hinaspam rirqaku Jesustawan wañusqanmanta kawsarimuq Lazarota qawamunankupaq.

^10-11 Lazarota rikuramuspankum achkaq judiokuna jefenkumanta karunchakurarqaku hinaspam iñirqaku Jesusman. Chaymi *f**sacerdotekunapa jefenkunañataq rimanakurqaku Lazarotawanña wañurachinankupaq.

Jerusalenman Jesuspa yaykusqanmanta

¹² Paqarinnintintam *f**Pascua Fiestaman achkaq riqkuna yacharurqaku Jerusalenman Jesuspa risqanta.

¹³ Paykunam kuchurqaku palmerapa kallmankunata hinaspam rirqaku Jesus chaskiq kaynata qaparispanku: —¡Yupaychasunchik! ¡Alabasqayá kachun Señorpa sutinpi hamuq Israel castakunapa Reyninqa! —nispa.

¹⁴ Jesusmi asnochata tariramuspa sillakaramurqa Bibliapa nisqan cumplikunanpaq:

¹⁵ Sion llaqtapi yachaqkuna, ama manchakuychikchu. Reynikichikmi hamuchkan. Asnopi silladam hamuchkan.

¹⁶ Discipulonkunaqa manaraqmi entienderqakuchu chaykunataqa. Jesus hanaq pachaman kutikuptinñam yuyarirqaku chaykunaqa ñawpaqmantaraq qellqasqaña kasqanta, yuyarirqakutaqmi Jesuspaq chaykuna rurasqankutapas.

¹⁷ Lazarota Jesuspa kawsarirachisqan rikuqkunam willakurqaku sepulturamanta qayaykuspa kawsarirachisqanta.

¹⁸ Chayraykum runakuna tariparqa Jesusman chay *f**milagro rurasqanta yachaspanku.

¹⁹ *f**Fariseokunañataqmi ninakurqaku: —Manam ima ruraytapas atichwanchu, qawaychik llapa runakunam payta qatichkanku —nispa.

Jesusta Grecia nacionniyoq runakuna maskasqankumanta

²⁰ Fiestapi adoranankupaq riqkunam karqa wakiqnin Grecia nacionmanta kaqkuna.

²¹ Paykunam asuykurqaku Felipeman, Felipeqa *f**yacharqa Galilea lawpi Betsaida llaqtapim. Paytam ruegakurqaku: —Señor, reqsiykuytam munaniku Jesusta —nispa.

²² Felipeñataqmi rirqa Andresman willaq, iskayninkum rirqaku Jesusman willaq.

²³ Jesusmi nirqa: —Ñam tiempoña Diosmanta Hamuq Runaqa hatunchasqa kananpaq.

²⁴ Cheqaptapunim nikichik, allpaman huk trigo wichispa mana wañuspanqa hina kaqllam kanqa, wañuspanmi ichaqa achkallataña rurunqa.

²⁵ Pipas vidallan kuyaqqa wiñaypaqmi pierdenqa, pipas kay pachapi vidan cheqniqñataqmi wiñay kawsananpaq waqaychasqa kanqa.

²⁶ Pipas serviwayta munaspaqa qatiwachunyá, payqa ñoqapa kasqaypim kanqa, serviwaqniytaqa Taytaymi ancha reqsisqata ruranqa.

Wañunanmanta Jesuspa willakusqanmanta

²⁷ —Kunanmi hukmanyasqa kachkani. Chaynaqa ¿imanisaqtaq? ¿Icha: “Taytáy, salvaykuway kunan rato imapas sucedewananmanta” nispachu nisaq? Ñoqaqariki kaynata kunan ñakarinaypaqmi hamurqani.

²⁸ Chaynaqa Taytáy, sutikitayá hatunchayña. Hinaptinmi hanaq pachamanta qayakamurqa: —Ñam hatuncharuniña, chaywanpas huktawanraqmi hatunchasaq —nispa.

²⁹ Chaypi kaq runakunañataqmi uyarispanku nirqaku: —Rayom toqyaramun —nispa. Wakiqninñataqmi nirqaku: —Angelmi rimapayaykamun —nispa.

³⁰ Jesusñataqmi nirqa: —Kay qayakuytaqa uyarinkichik manam ñoqaraykuchu aswanqa qamkunaraykum.

³¹ Kunanmi kay pachapi kaqkuna juzgasqa kanqa, qarqosqataqmi kanqa kay pachapi kamachiqkuq diablopas.

³² Chakatawaptinkum llapallanta pusamusaq kikiyman.

³³ Kaynata nispanmi entiendechirqa imaynam wañukunanmanta.

³⁴ Runakunañataqmi nirqa: —Leypiqa uyarirqaniku: “Cristoqa wiñaypaqmi kawsanqa” niqtam. ¿Imaynataq qamqa ninki: “Diosmanta Hamuq Runaqa cheqaptapunim chakatasqa wañunqa” nispaykiqa? ¿Pitaq chay Diosmanta Hamuq Runaqa?

³⁵ Chaymi Jesusñataq nirqa: —Pisi punchawllañam kasaq qamkunata achkinaypaq. Achkiypiyá puriychik qamkunawanraq kachkaptiyqa chaynapi tutayay mana vencerusunaykichikpaq. Pipas tutayaypi puriqqa manam yachakunchu mayman risqantapas.

³⁶ Qamkunawanraq achkiy kachkaptinqa achkiymanyá iñiychik, chaynapi achkiypi kanaykichikpaq. Kaykunata niruspanmi Jesus paykunamanta pakakururqa.

Jesusman mana iñiq judiokunamanta

³⁷ Jesus achkallaña *f**milagrokunata rurachkaptinpas manam paypi iñirqakuchu.

³⁸ Chaynapim cumplikurqa Diosmanta willakuq Isaiaspa nisqan. Paymi nirqa: Señorlláy, willakusqaykutaqa creerqa ¿pitaqsi? Señorqa revelarqa atiynintaqa ¿pimantaqsi?

³⁹ Manamá pipas creeyta atirqachu. Isaiasqa qellqarqataqmi:

⁴⁰ Runakunatam Dios ñawsayarachirqa. Paykunapa sonqontam rumiyachirqa chaynapi mana rikukunankupaq, chaynapi mana entiendenankupaq, chaynapi mana kutirikamuwanankupaq, chaynapi mana sanoyachinaypaq.

⁴¹ Isaiasqa nirqa chaynataqa Jesuspa kanchariyninta rikuspanmi chaymi rimarqa paymanta.

⁴² Chaywanpas achkaq kamachikuq judiokunam iñirqaku Jesusman. *f**Fariseokunaraykum mana libretachu willakuqku chaynapi *f**huñunakunanku wasimanta mana wischusqa kanankupaq.

⁴³ Chay kamachikuq judiokunaqa munarqa runakunapa alabanantam Diospa alabananmantapas.

Jesuspa rimasqanman hina runakuna juzgasqa kananmanta

⁴⁴ Jesusmi qayakuq hina nirqa: —Pipas ñoqaman iñiqqa manam ñoqallamanchu iñin aswanqa kachamuwaqniy Taytaymanwanmi.

⁴⁵ Ñoqa rikuwaqniyqa kachamuwaqniytapas rikunmi.

⁴⁶ Ñoqaqa achkiy hinam hamurqani kay pachamanqa, pipas ñoqapi iñiqqa manañam tutayaypiñachu kanqa.

⁴⁷ Pipas nisqaykunata uyarispan mana kasukuqtaqa manam ñoqachu condenasaq, ñoqaqa hamurqani manam runakunata condenaqchu aswanqa salvaqmi.

⁴⁸ Pipas despreciawaspan nisqaykunata mana kasukuqpaqa ñam kanña juzgaqnin, ñoqapa nisqaykunam paytaqa tukupay punchawpi juzganqa.

⁴⁹ Ñoqaqa manam kikillaymantachu rimani, kachamuwaqniy Taytaymi kamachiwarqa imam rimarinaytaqa chaynataq imam yachachinaytaqa.

⁵⁰ Ñoqaqa yachanim, Taytaypa kamachikuyninqa wiñaypaq kawsay qokuqmi, ñoqapa nisqaykunaqa Taytaypa kamachiwasqanman hinam.