Juan 11 - Quechua Ayacucho Bible 1987

Lazaropa wañukusqanmanta

¹ Betania llaqtayoq Lazaro sutiyoq runam onqochkarqa, payqa *f**yacharqa panin Mariawanmi hinaspa panin Martawanmi.

² Onqoq Lazaropa panin Mariam huk kutipi miski asnaq aceitewan untaykurqa Señor Jesuspa chakinman hinaspam chukchanwan chakichirqa.

³ Lazaropa paninkunam kacharqa Señor Jesusman willachiq: —Señorlláy, amistadniki Lazarom onqochkan —nispa.

⁴ Jesusñataqmi chayta uyariruspan nirqa: —Chay onqoyqa manam wañuchinqachu aswanqa Dios hatunchanapaqmi, kay onqoywanqa Diospa Churinmi hatunchasqa kanqa.

⁵ Jesusqa sinchitam kuyarqa Lazarota, kuyarqataqmi Martatapas chaynataq ñañantapas.

⁶ Chaymi “Lazaropa onqosqanmanta” uyariykuspan qeparurqa iskay punchawtawanraq.

⁷ Chaymantañam nirqa discipulonkunata: —Hakuchik kutisun Judea lawman —nispa.

⁸ Discipulonkunañataqmi nirqaku: —Yachachikuq, qayninpallataq chay judiokunaqa rumiwan wañuchiyta munasurqanki ¿chaychu kutiytaraq munachkanki? —nispa.

⁹ Jesusñataqmi nirqa: —¿Punchawqa manachu chunka iskaynin horayoq? Pipas punchawpi purispaqa manam mitkanchu kay pachapi achkiywan qawakusqanrayku.

¹⁰ Tuta puriqmi ichaqa mitkan tutayaypi kasqanrayku.

¹¹ Chaymantam Jesus nirqa: —Amistadninchik Lazaroqa puñuchkanmi, hakuchikyá rikchachimunaypaq —nispa.

¹² Discipulonkunañataqmi nirqa: —Señorllayku, puñuruspaqa sanoyanqachá —nispanku.

¹³ Jesusqa nirqa chaynataqa “Lazaroqa wañukunñam” ninantam, discipulonkunañataqmi piensarqaku “Puñusqanmantachiki nichkan” nispanku.

¹⁴ Chaymi Jesus clarotaña nirqa: —Lazaroqa wañukunñam.

¹⁵ Qamkunaraykum kusikuni mana chaypi kasqaymanta, chaynapi aswan mastaraq creenaykichikpaq. Hakuchikyá payman —nispa.

¹⁶ Chaymi mellizowan sutichasqanku Tomas discipulomasinkunata nirqa: —Rispayá ñoqanchikpas yachachikuqwan wañumusunchik —nispan.

Kawsay qokuqqa Jesuslla kasqanmanta

¹⁷ Jesusmi chayaruspan Lazarota tarirurqa sepulturapi tawa punchaw pampasqataña.

¹⁸ Betania llaqtaqa karqa kimsa *f**kilometro hinallam Jerusalenmanta.

¹⁹ Chaymi achkaq judiokuna rirqa Martapatawan Mariapata consuelaq turinkumanta llakisqa kaptinku.

²⁰ Martam Jesuspa hamusqanta yacharuspan tariparqa, Mariañataqmi kachkarqa wasipi.

²¹ Martam nirqa Jesusta: —Señorlláy, qam kaypi kaptikiqa turillayqa manachá wañunmanchu karqa.

²² Aswanqa yachanim, Diosqa qosunkim tukuy ima mañakusqaykitaqa —nispa.

²³ Chaymi Jesus nirqa: —Turikiqa kawsarimunqam —nispa.

²⁴ Martañataqmi nirqa: —Arí, wañuqkunapa kawsarimunan tukupay punchawpi kawsarimunantaqa yachanim —nispa.

²⁵ Jesusñataqmi nirqa: —Ñoqam kani kawsarichiqpas chaynataq kawsay qokuqpas. Pipas ñoqaman iñiqqa wañuspapas kawsarimunqam.

²⁶ Pipas kawsachkaspallanraq ñoqaman iñiqqa manam wiñaypaqchu wañunqa. ¿Creenkichu kayta Marta? —nispa.

²⁷ Chaymi Martañataq nirqa: —Arí Señorlláy, ñoqaqa creenim, qamqa kanki kay pachaman hamuq Diospa Churin Cristom —nispa.

Lazaropa sepulturanpi Jesuspa waqasqanmanta

²⁸ Chaynata nispanmi Marta rirqa ñañan Maria qayaq, paytam upallallamanta nirqa: —Yachachikuqqa kaypiñam kachkan, qayasuchkankim —nispa.

²⁹ Chaynata Marta niykuptinmi Maria chaylla hatarispa rirqa Jesuspa kasqanman.

³⁰ Jesusqa manaraqmi llaqtamanqa chayarqaraqchu, payqa kachkarqa Martawan tupaykusqan sitiollapiraqmi.

³¹ Consuelaqnin judiokunañataqmi Maria chaylla hatariruspan lloqsiramuptin qatimurqaku: “Sepulturatachiki richkan waqaq” nispanku.

³² Mariañataqmi Jesuspa kasqanman chayaruspan qonqorakuykurqa hinaspam nirqa: —Señorlláy, kaypi kaptikiqa turillayqa manachá wañunmanchu karqa —nispa.

³³ Jesusñataqmi Mariapa waqasqantawan kuska hamuq judiokunapa waqasqanta qawaykuspan sonqonpi sinchita llakirikurqa.

³⁴ Chaymi tapurqa: —¿Maypitaq pamparamunkichik? —nispa. Paykunañataqmi nirqaku: —Señor, hakuchikyá qawaykamunki —nispa.

³⁵ Chaymi Jesus waqarqa.

³⁶ Judiokunañataqmi ninakurqaku: —Qawaychik maynatam kuyasqa —nispanku.

³⁷ Wakiqninñataqmi nirqaku: —Payqa ñawsatapas qawarichirqam ¿manachum sanoyarachinman karqa chaynapi Lazaroqa mana wañukunanpaq? —nispa.

Lazaropa kawsarimusqanmanta

³⁸ Jesusñataqmi sinchi llakisqa asuykurqa sepulturaman, chayqa karqa machaymi, punkunñataqmi karqa hatun rumiwan tapasqa.

³⁹ Jesusmi nirqa: —Horqoychik chay rumita —nispa. Hinaptinmi wañukuqpa panin Martañataq nirqa: —Señorlláy, ñachá asnarichkanña, tawa punchawñam wañukusqanqa —nispa.

⁴⁰ Jesusñataqmi nirqa: —¿Manachu nirqayki: “Creespaykiqa rikunkim Diospa atiyninta” nispay?

⁴¹ Rumita horqoruptinkum Jesus hanaq pachata qawarispan nirqa: —Taytáy, graciastam qoyki uyariykuwasqaykimanta.

⁴² Qamqa siemprem uyariwanki, chaymi kaykunata nichkayki muyuriqniypi kaq runakuna kachamuwasqaykita creenankupaq.

⁴³ Chaynata nispanmi nisyunneqta qayarqa: —¡Lazaro, lloqsimuy! —nispa.

⁴⁴ Wañuqñataqmi lloqsiramurqa makin-chakin watasqa hinaspa uyanpas telawan wankusqa. Hinaptinmi Jesus nirqa: —Purinanpaq paskaychik —nispa.

Jesuspa contranpi rimanakusqankumanta

⁴⁵ Mariawan riq achkaq judiokunañataqmi Lazarota kawsarirachisqanta qawaykuspanku Jesusman iñikuykurqaku.

⁴⁶ Wakiqninñataqmi *f**fariseokunaman willamurqaku Jesuspa rurasqanta.

⁴⁷ Hinaptinmi *f**sacerdotekunapa jefenkuna *f**cortepi huñunakurqa fariseokunawan hinaspam nirqaku: —¿Imatataq rurasun? Kay runaqa achkatañam *f**milagrokunata rurarun.

⁴⁸ Mana harkaptinchikqa lliw runach payman iñirunqaku, hinaptinchá romanokuna hamuruspa purmarachinqaku templonchiktawan nacionninchikta.

⁴⁹ Caifas sutiyoqmi karqa *f**sacerdotekunapa jefen chay watapi, chaymi pay nirqa:

⁵⁰ —Qamkunaqa manam imatapas yachankichikchu nitaqmi cuentata qokunkichikchu. Aswan allinqa kanman huk runalla nacionninchikpa rantinpi wañuyninmi, enteron nacion puchukarunanmantaqa —nispa.

⁵¹ Caifasqa chaykunataqa nirqa manam kikillanmantachu, chay watapi sacerdotekunapa jefen kasqanraykum Dios revelarqa, chaymi nirqa: “Jesusqa wañunanmi judiokunapa nacionninpa rantinpi” nispan.

⁵² Jesusqa wañunan karqa manam paykunapa rantillanpichu aswanqa Diospa cheqesqa churinkunata hukllaman huñunanpaqwanmi.

⁵³ Chay punchawmantam judio autoridadkuna tanteanakurqaku Jesus wañurachinankupaq.

⁵⁴ Chaymi Jesusqa purirqa pakakuspallaña judiokunapa qayllanpiqa. Judeamanta lloqsispanmi rirqa chunniqpa hichpan Efrain sutiyoq llaqtaman, chaypim *f**yacharqa discipulonkunawan.

⁵⁵ Judiokunapa *f**Pascua Fiestanmi ña hichpamuchkarqaña, chaymi llapa runakuna enteron llaqtamanta rirqaku Jerusalenman Diosta adoranankupaq *f**chuyanchakuq.

⁵⁶ Jesustam maskaspanku temploman chayaruspa ninakurqaku: —¿Imaninkichiktaq? ¿Hamunqachu fiestaman icha manachu? —nispa.

⁵⁷ *f**Fariseokunapiwan *f**sacerdotekunapa jefenkunañataqmi kamachirqaku: —Pipas yachanqa Jesuspa maypim kasqantapas hinaspaqa willakamuchunyá presochamunaykupaq —nispa.