Juan 10 - Quechua Ayacucho Bible 1987

Allin michiqwan tupachisqanmanta

¹ —Cheqaptapunim nikichik, pipas ovejapa corralninman mana punkunta yaykuspa huklawnin yaykuqqa suwam hinaspa salteaqmi.

² Punkun yaykuqmi ichaqa ovejakunapa michiqnin.

³ Punku cuidaqpas kichanmi yaykunanpaq chaynataqmi ovejakunapas uyarintaq sutinmantakama qayaptin, chayñam qarqon corralninmanta.

⁴ Ovejakunata kanchanmanta qarqospanmi puntanta rin, ovejakunañataqmi qayasqanta uyarispan qatin.

⁵ Mana reqsisqantaqa ovejakunaqa manam qatinchu, ayqekunmi chayna runamantaqa, vozninta mana reqsisqanrayku.

⁶ Chay rikchanachiyta niptinpas paykunaqa manam entienderqakuchu.

Allin michiqqa Jesuslla kasqanmanta

⁷ Jesusmi huktawan nirqa: —Cheqaptapunim nikichik, ñoqam kani ovejakunapa yaykunan punku.

⁸ Ñoqamanta ñawpaq hamuqkunaqa karqa suwakunam hinaspa salteaqkunam chaymi ovejakunaqa mana kasurqachu.

⁹ Ñoqam punku kani, chayninta yaykuqqa salvakunqam. Payqa oveja hinam yaykunqapas hinaspa lloqsimunqapas hinaspa pastotapas tarinqa.

¹⁰ —Suwaqa yaykun suwakuruspa wañurachinallanpaqmi hinaspa purmachinanpaqmi. Ñoqam ichaqa hamurqani kawsanaykichikpaq hinaspa kawsaywan huntasqa kanaykichikpaq.

¹¹ Ñoqaqa kani allin michiqmi. Allin michiqqa vidantam qon ovejankunarayku.

¹² Pagollapaq michiqmi ichaqa atoq hamuptinpas ovejakunata saqeruspan ayqekun, manamá payqa dueñochu nitaqmi ovejakunapas paypachu. Chaymi ovejakunatapas atoq hapiruspan cheqechin.

¹³ Pagollapaq michipakusqanraykum ayqekun mana imapas qokuptin.

^14-15 —Ñoqaqa kani allin michiqmi. Taytayqa reqsiwanmi, ñoqapas Taytaytaqa reqsinim, reqsinitaqmi ovejaykunatapas hinaptinmi paykunapas reqsiwan. Chaymi vidayta qoni paykunarayku.

¹⁶ Kachkantaqmi sapaq ovejaykunapas kay corralpi mana kaqkuna. Paykunatapas pusamuptiymi vozniyta uyarinqaku, chaynapim kanqa chulla kanchallaña hinaspa chulla michiqllaña.

¹⁷ —Vidaytam qoni kaq kawsarimunaypaq, chaymi Taytay kuyawan.

¹⁸ Manam pipas vidaytaqa qechuwanmanchu, kikiymi qosaq vidaytaqa. Makillaypim kachkan qonaypaqpas chaynataq kawsarimunaypaqpas. Chaynatam kamachiwarqa Taytay.

¹⁹ Chay nisqanta uyariruspankum *f**judiokuna mana acuerdochu karqaku.

²⁰ Achkaqmi nirqaku: —¿Imapaqmi uyarinkichik? Payqa demonioyoq locom —nispa.

²¹ Wakinninñataqmi nirqaku: —Demoniopa huntasqanqa manam chayna sumaqllatañaqa rimanmanchu. Demonioqa manam ñawsataqa qawarichinmanchu —nispa.

Jesusta Judiokuna qepanchakusqankumanta

²² Jerusalen llaqtapim para tiempopi Templo Dedicacion Fiesta karqa.

²³ Jesusmi purichkarqa Salomonpa Portalninpi.

²⁴ Chaymi *f**judiokuna muyuykuspa nirqaku: —¿Haykapikamataq iskayrayachiwankiku? Qam Cristo kaspaykiqa clarotayá willawayku —nispa.

²⁵ Jesusñataqmi nirqa: —Ñam nirqaykichikña ichaqa manam creerqankichikchu, tukuy imatam rurani Taytaypa atiy qowasqanwan, chaykunam ñoqamanta willakun.

²⁶ Qamkunaqa manam ovejaykunachu kankichik chaymi mana creenkichikchu.

²⁷ Ovejaykunaqa vozniytam uyarin, ñoqapas paykunataqa reqsinim, chaymi paykunaqa qatiwanku.

²⁸ Ñoqam paykunaman qoni wiñay kawsayta chaymi paykunaqa haykapipas mana chinkanqachu, manataqmi pipas qechuwanqachu makiymantaqa.

²⁹ Tukuy ima qoqniy Taytayqa llapanmantapas atiyniyoqmi chaymi mana pipas atinmanchu Taytaypa makinmanta qechuytaqa.

³⁰ Taytaywanqa hukllam kaniku.

³¹ *f**Judiokunañataqmi huktawan hatarirqaku rumiwan chamqanankupaq.

³² Chaymi Jesus nirqa: —Achkatam rurarqani allin ruraykunata Taytaypa atiy qowasqanwan, chaynaqa ¿mayqanninmantataq rumiwan chamqawayta munankichik? —nispa.

³³ Judiokunañataqmi nirqa: —Chamqapaytaqa munaykiku manam allin rurasqaykimantachu aswanqa rimaspayki Diosta piñachisqaykimantam chaynataq runa kachkaspayki Dios tukusqaykimantam —nispa.

³⁴ Jesusñataqmi nirqa: —Qamkunapa leynikichikpim qellqasqa kachkan: “Ñoqam nirqaykichik qamkunaqa dioskuna kasqaykichikta” nispa niq.

³⁵ Manam negachwanchu Bibliapa nisqantaqa. Diosqa suticharqa dioskunawanqa willakusqankuna chaskiqkunatam.

³⁶ Taytam sapaqchawaspan ñoqata kachamuwarqa kay pachaman, chaynaqa ¿imaynataq ninkichik qamkunaqa: “Diostam insultan” nispaqa “Diospa churinmi kani” nisqayraykuqa?

³⁷ Taytapa ruranankunata mana ruraptiyqa amayá creewaychikchu.

³⁸ Ichaqa paypa rurananta ruraptiyqa manaña ñoqapi creespaykichikpas rurasqaykunapiyá creeychik, chaynapim yachankichik Taytawanqa huklla kasqayta.

³⁹ Huktawanmi Jesusta presochayta munarqaku ichaqa paykunamantam lluptirurqa.

⁴⁰ Jesusmi kasqallan kutikurqa Jordan Mayupa waklawninman, chaypim ñawpaqta Juan bautizarqa, chaypi Jesus kaptinmi

⁴¹ qawanankupaq achkallaña runakuna rirqaku. Chayman rispankum ninakurqaku: —Juanqa manam ima *f**milagrotapas rurarqachu, Jesusmanta nisqanmi ichaqa cheqap —nispa.

⁴² Chaymi Jesuspi achkaq iñirqaku chay lugarpi.