Josué 8 - Quechua Ayacucho Bible 1987

Hai llaqtata vencesqankumanta

¹ Tayta Diosmi nirqa Josueyta: —Ama manchakuychu nitaq hukmanyaychu. Guerrapaq llapallan soldadokunata pusaspayki riy Hai llaqtaman. Ñoqam Hai llaqtapi reyta, runankunata, llaqtanta chaynataq allpantapas qanman qosqayki.

² Jerico llaqtata chaynataq reynintapas imam rurasqaykita hinam Hai llaqtatapas chaynataq reynintapas ruranki ichaqa qechusqaykichikkunatam animalkunatawan qamkunapaq hapikunkichik. Llaqtaman yaykunankupaqmi llaqtapa qepa lawninpi runakunata churarunki pakasqallapi —nispa.

³ Josueymi guerrapaq soldadonkunapiwan alistakurqaku Hai llaqtapa contranpi rinankupaq. Akllarqam Josuey kimsa chunka waranqa kallpasapa soldadokunata hinaspam paykunata tutallan pasachirqa.

⁴ Paykunatam kamachirqa kaynata: —Llaqtapa qepa lawninpim pakakaramunkichik ichaqa amam llaqtamantaqa llumpayta karuncharunkichikchu. Llapallaykichikmi listolla kachkankichik.

⁵ Ñoqañataqmi riqmasiy soldadokunapiwan asuykusaqku llaqtaman. Punta rurasqankuta hina paykuna contraykupi lloqsiramuptiñataqmi lluptisaqku paykunapa qayllankumanta.

⁶ Hinaptinmi paykuna qatimuwanqaku llaqtamanta karunchakurunaykukama. Paykunamá ninqaku: “Paykunaqa ñoqanchikmantam lluptichkanku ñawpaqta hina” nispa. Lluptisaqkumá paykunapa ñawpaqninta.

⁷ Qamkunañataqmi pakakusqaykichikmanta hatarimuspaykichik llaqtata dueñochakurunkichik. Yupaychasqanchik Tayta Diosmi qamkunaman qoykusunkichik.

⁸ Dueñochakuruspaykichikmi kañaykunkichik Tayta Diospa nisqanman hina. Chaynataqa ñoqam kamachikichik —nispa.

⁹ Josueymi paykunata kacharqa hinaptinmi pakakuq rirqaku. Hinaspam pakakururqaku Betel llaqtamanta Hai llaqtaman riq ñanpi otaq Hai llaqtapa inti seqaykunan lawninpi, Josueyñataqmi chay tuta quedarurqa tropankunawan.

¹⁰ Tutapayta Josuey hatariruspanmi tropankunata alistarqa hinaspam Israel casta ancianokunapiwan rirqa tropankunapa ñawpaqninta Hai llaqtapa contranpi.

¹¹ Guerrapaq llapallan soldadokunapiwan pasaspanmi chayarurqaku llaqtapa ñawpaqninman hinaspam Hai llaqtapa norte lawninpi campamentonta sayachirqaku. Qechwallam rakirqa paykunataqa Hai llaqtamanta.

¹² Pichqa waranqa soldadokunata akllaruspanmá pakaramurqaña Betel llaqtamanta Hai llaqtaman riq ñanpi otaq Hai llaqtapa intipa seqaykunan lawninpi.

¹³ Campamentopi kaq soldadokunatam churarurqaku llaqtapa norte lawninpi, pakakuq soldadokunatañataqmi churarurqaku llaqtapa inti seqaykunan lawninpi. Hinaptinmi Josuey chay tuta asuykurqa chawpi qechwakama.

¹⁴ Chayna churakurusqankuta Hai llaqtapi rey cuentata qokuruspanñataqmi tutapayllata hatarispan lloqsirqa llapallan tropankunawan Israel castapa contranpi Araba Qechwa lawpi peleanankupaq. Llaqtapa qepanpi pakarayaq tropakunamantaqa manam reyqa yacharqachu.

¹⁵ Josueyñataqmi compañaqnin Israel tropakunapiwan vencerachikuq tukuspanku paykunamanta lluptirqaku chunniq lawman.

¹⁶ Hai llaqtapi llapallan runakunam huñunakururqaku paykunata qatinankupaq, Josueyta qatispankum llaqtamanta karunchakururqaku.

¹⁷ Chaynapimá Hai llaqtapi nitaq Betel llaqtapipas runakunaqa mana quedarqakuchu Israel castakuna qatisqankurayku, kichasqatam llaqtapa zaguannintapas saqerurqaku.

¹⁸ Tayta Diosmi nirqa Josueyta: —Lanzaykita hoqariy Hai llaqta lawman, ñoqam qosqayki —nispa. Chaymi Josuey makinpi lanzata horqarirqa chay llaqta lawman.

¹⁹ Makinta hoqariruptinmi pakakuqkunapas utqayman hatariramuspanku kallparqaku hinaspam yaykururqaku llaqtaman. Dueñochakuruspankuñataqmi kañaytaña qallarirqaku.

²⁰ Hai llaqtayoq runakuna qepankuta qawarispankuñataqmi rikururqaku cielokamaraq llaqtanku qosnichkaqta. Chaymi manaña maylawman lluptiytapas atirqakuñachu. Chunniqman lluptiq Israel soldadokunapas kutiriykamurqataqmi qatiqninkupa contranpi.

²¹ Josueymi Israelpa llapallan castankunapiwan rikururqaku pakakuqkunapa llaqta dueñochakurusqanta, rikururqakutaqmi llaqtamanta wichariq qosniytapas chaymi kutiriykamuspanku wañurachirqaku Hai llaqtayoq runakunata.

²² Llaqta dueñochakuqkunam lloqsiramurqaku taripaqninku. Chaynapim tukuy lawninmanta corralasqa rikurirurqaku Israel casta soldadokunapa chawpinpi. Hai llaqtayoqkunata wañurachiptinkum chulla runapas mana puchurqachu nitaqmi pipas lluptirqachu.

²³ Hai llaqtapi reytam kawsachkaqta hapiruspanku Josueyman pusarqaku.

²⁴ Hai llaqtamanta lloqsimuspa qatimuqkunatam espadawan chunniqpi pasaypaqta wañurachirqaku chaymantam Israel casta runakunaqa llapallanku kutirirqaku Hai llaqtaman. Chaypipas lliw puchuqkunatam wañurachirqaku espadawan.

²⁵ Chay punchawmi Hai llaqtayoqkuna qaripas-warmipas wañurqaku chunka iskayniyoq waranqa runakuna.

²⁶ Josueymi lanzan haywarayasqanta mana suchuchirqachu Hai llaqtapi llapallan yachaqkunata wañuchinankukama.

²⁷ Israel castakunam kikinkupaq hapikurqaku llaqtapi animalkunata chaynataq tukuy imakunatapas, chaynataqa rurarqaku Josueyman Tayta Diospa kamachisqanpi hinam.

²⁸ Josueymá kañarurqa Hai llaqtata. Pasaypaqta tuñirachispanmi wiñay purmananpaq monto-montonta dejarurqa kay libro qellqasqa kasqan tiempokama.

²⁹ Hai llaqtapi reytam Josuey sachapi warkururqa tardeykuqkama. Inti seqaykuytañam Josuey kamachirqa cuerponta sachamanta horqomuspanku llaqtapa zaguanninman wischumunankupaq hinaspam paypa hawanpi hatarichirqaku hatun monton rumikunata. Chay rumikunam hinallaraq kachkan kay libro qellqasqa kasqan tiempokama.

Ebal Moqopi Diospa yachachikuynin leesqankumanta

³⁰ Josueymi Israel castapa yupaychasqan Tayta Diospaq altarta rurachirqa Ebal Moqopi

³¹ chaynataqa rurarqa Israelpa mirayninkunaman Tayta Diospa serviqnin Moisespa kamachisqanpi hinam. Chay altartaqa rurarqa mana pipapas labrasqan enteron rumikunamantam yachachikuynin libropi Moisespa qellqasqanman hina. Chay altarpa hawanpim Tayta Diosman lliw kañananku animalkunata ofrecerqaku, ofrecerqakutaqmi Tayta Dioswan allinlla kasqankumanta animalkunatapas.

³² Chay altarpa ruminkunapim Israelpa mirayninkunapa qayllanpi Josuey qellqarqa Moisespa qellqasqan yachachikuyta.

³³ Israel casta llapallan runakunam sayarurqaku baulpa kaylaw-waklawninpi otaq Tayta Diospa contrato baulnin apaq Leviy casta sacerdotekunapa ñawpaqninpi. Chaypitaqmi sayachkarqaku ancianokunapas, kamachikuqkunapas, juezkunapas chaynataq forasterokunapas. Wakinmi sayarqaku Gerezim Moqo lawpi, wakinñataqmi sayarqa Ebal Moqo lawpi, chaynataqa rurarqaku Tayta Diospa serviqnin Moises ñawpaqmantaraq kamachisqanpi hinam chaynapi Israel runakunapaq Diospa bendicioninta mañakunankupaq.

³⁴ Chaymantam Josuey leerqa tukuy yachachikuykunapa iman nisqanta. Leerqamá runakunapaq bendicionkunatapas chaynataq ñakaykunatapas, chaykunaqa kachkan yachachikuykuna qellqasqa libropim.

³⁵ Moisespa tukuy kamachisqantam Josuey leerqa Israel casta llapallan runakunapa qayllanpi chaynataq warmikunapa hinaspa paykunawan kuska kaq forasterokunapa qayllanpipas.