Josué 7 - Quechua Ayacucho Bible 1987

Acan sutiyoq runapa huchallikusqanmanta

¹ Israelpa mirayninkunam chinkachisqa kananpaq Tayta Diospaq rakisqa kaqkunawan huchallikururqaku. Juda ayllumanta Carmipa churin Acan sutiyoq runam chinkachisqa kananpaq Tayta Diospaq rakisqa kaqkunata hapikururqa. Carmiqa karqa Zabdipa churinmi, Zabdiñataqmi karqa Zarapa churin. Chayraykum Tayta Dios piñakururqa Israelpa mirayninkunapa contranpi.

Huchanrayku castigomanta

² Josueymi Jerico llaqtamanta runakunata kacharqa Hai llaqtata wateqamunankupaq. Hai llaqtaqa karqa Betel llaqtapa chinpan intipa qespimunan lawpim otaq Bet-aven llaqtapa hichpanpim.

³ Wateqaq runakunam kutiramuspanku Josueymam nirqaku: —Amañayá llapallan tropakunachu richunkuqa aswanqa richunku iskay otaq kimsa waranqa hinalla, paykunallam Hai llaqtayoq soldadokunataqa venceramunqaku. Amaña ñakarichiychu llapallan soldadokunataqa. Wak llaqtapi runakunaqa asllam kanku —nispa.

⁴ Chaynapimá kimsa waranqa soldadokunalla rirqaku Hai llaqtata atacanankupaq. Aswanqa paykunam Hai llaqtayoq soldadokunamanta lluptiramurqaku.

⁵ Hai llaqtapi kaqkunamá paykunamanta wañurachimurqaku kimsa chunka soqtayoq soldadokunata. Qatiramurqakum llaqtapa zaguanninmanta rumi horqona sitiokama. Urayninman qatimuspankum paykunataqa wañurachirqaku. Chayraykum runakuna pasaypaqta hukmanyarurqaku. Manam valorninkupas karqañachu.

⁶ Josueymi pachanta llikipaspan Tayta Diospa baulninpa ñawpaqninpi qonqoranpa pampakama kumuykurqa. Chaytam rurarqa tardeykuqkama. Israel casta ancianokunapas Josuey hina ruraspankum umankumanpas allpata maqchikurqaku.

⁷ Chaymi Josuey nirqa: —¡Ay Señor Dioslláy! ¿Imapaqtaq kay runakunata Jordan Mayuta chimpachimurqanki chaynapi Amor casta runakunaman qoykuwaspaykiku chinkarachiwanaykikupaq? ¡Aswan allinchá kanman karqa Jordan Mayupa waklaw chimpanpi hawka quedakamuyniyku!

⁸ ¡Ay Señorlláy! ¿Ima nisaqtaq Israel castakuna enemigonkupa ñawpaqninmanta ayqekamuchkaptinkuqa?

⁹ Canaan casta runakunaqa kay allpapi llapallan *f**yachaqkunapiwan uyarispankuchiki muyuruwanqaku sutiykutapas kay pachamanta chinkarachinankama. Hinaptinqa ¿imatataq ruranki ancha reqsisqa sutiki mana penqaypi kananpaq? —nispa.

¹⁰ Chaymi Josueyta Tayta Dios nirqa: —¿Imanasqataq pampapi pakcharayachkanki? Hatariy,

¹¹ Israel casta runakunaqa huchallikurunmi. Kamachisqay contratoytapas manam kasukunkuchu. Hapikurunkutaqmi chinkachisqa kananpaq ñoqapaq rakisqa kaqkunatapas, suwakuruspam llullakurunku hinaspataqmi tukuy imankuwan kuskata pakarunku.

¹² Chayraykum Israelpa mirayninkunaqa enemigonkuwan churanakuspa venceyta manaña atinqakuchu. Enemigonkupa ñawpaqninmantam ayqenqaku chinkachisqa kananpaq ñakasqa karusqankurayku. Qamkunamanta chay chinkachisqa kananpaq ñoqapaq rakisqa kaqta mana chinkachiptikichikqa manañam ñoqapas qamkunata yanapasqaykichikchu.

¹³ Hatarispaykiyá runakunata ñoqapaq sapaqchay, niyá paqarinpaq ñoqallapaqña sapaqchakunankupaq. Israelpa yupaychasqan ñoqa Tayta Diosmi kaynata nini: Israel castakuna chinkachisqa kananpaq ñoqapaq rakisqa kaqmi qamkunapi kachkan. Qamkunamanta rakisqa kaqta horqonaykichikkamam enemigoykichikwan churanakuspa mana vencenkichikchu.

¹⁴ Paqarinmá asuykamuwankichik ayllun-ayllun. Ñoqapa akllasqay ayllum asuykamuwanqaku castan-castan. Ñoqapa akllasqay castam asuykamuwanqaku familian-familian. Ñoqapa akllasqay familiam asuykamuwanqaku sapakama.

¹⁵ Chinkachisqa kananpaq ñoqapaq rakisqa kaqta hatalliq runam kañasqa kanqa. Paywan kuskataqmi tukuy imankunapas kañasqa kanqa, kañasqaqa kanqa ñoqapa contratoyta mana kasukuspa Israel casta ukupi loco hina rurasqanmantam —nispa.

Chay suwakuq runa wañuchisqankumanta

¹⁶ Josueymá tutapayta hatarispan Israel runakunata asuykachirqa ayllun-ayllunta. Chaymi akllasqa karqa Juda ayllu.

¹⁷ Juda aylluta castan-castanta asuykachiptinmi Zara casta akllasqa karqa. Zara castata familian-familianta asuykachiptinmi Zabdi familia akllasqa karqa.

¹⁸ Chaymi Zabdipa familianmanta sapa runata asuykachiptinku Carmipa churin Acan sutiyoq runa akllasqa karurqa. Carmiqa karqa Zabdipa churinmi. Zabdiñataqmi karqa Zarapa churin, Zarañataqmi karqa Juda ayllumanta kaq.

¹⁹ Josueymi chay Acan sutiyoq runata nirqa: —Churilláy, Israelpa yupaychasqan Tayta Diosta reqsikuspayá alabay. Kunanyá paypa qayllanpi mana pakawaspayki imam rurasqaykita willaway —nispa.

²⁰ Chaymi Acanñataq nirqa: —Cheqaptapunim Israelpa yupaychasqan Tayta Diospa contranpi huchallikuruni. Kaykunatam rurarqani:

²¹ Jerico llaqtamanta qechusqa kaqkunamantam rikururqani kuyayllapaq Babilonia lawmanta kaq capata, iskay chunka kimsayoq kilo qollqeta chaynataq parte kilo pesaq trozo qoritapas. Chaykunata kuyaruspaymi apakurqani. Chaykunam karpaypa chawpin allpa ukupi pakasqa kachkan, qollqeñataqmi chaykunapa pampanpiraq pakasqa kachkan —nispa.

²² Josueymi kacharqa runakunata. Hinaptinmi paykuna kallpaylla rispanku chay karpapi tukuy ima pakasqanta tarirurqaku, qollqetapas tariramurqakutaqmi chaykunapa pampanpi.

²³ Karpapa chawpinmanta horqoramuspankum Josueyman chaynataq llapallan Israelpa mirayninkunaman apamurqaku hinaspam Tayta Diospa qayllanman churarqaku.

²⁴ Josueymi Israelpa mirayninkunapiwan pusachirqaku Zarapa miraynin Acan runata, churinkunata, vacankunata, asnonkunata, ovejankunata. Aparqakutaqmi qollqeta, capata, trozo qorita, carpanta hinaspa tukuy kapuqninkunatapas Acor sutiyoq qechwaman.

²⁵ Josueymi chay Acan sutiyoq runata nirqa: —¿Imanasqataq kay desgraciata apamuwarqankiku? Tayta Diosyá qanmanpas kunan punchaw desgraciata apamusunki —nispa. Chaymi Israelpa llapallan mirayninkuna rumiwan choqaparurqaku.

²⁶ Paykunapa hawanmantaqmi rumikunata montorurqaku hatun monton kanankama. Chay monton rumikunam kachkan kay libro qellqasqa kasqan tiempokama. Chayraqmi Tayta Diospa piñakuynin tanirurqa. Chayraykum chay sitio Acor Qechwawan sutichasqa kachkan kay libro qellqasqa kasqan tiempokama.