Josué 6 - Quechua Ayacucho Bible 1987

Jerico llaqtata imaynam vencenanmanta

¹ Jerico llaqtaqa kachkarqa suma-sumaq wichqasqam Israelpa mirayninkuna mana yaykunanpaq. Manam pipas lloqsirqachu nitaqmi yaykurqachu.

² Aswanqa Tayta Diosmi Josueyta nirqa: —Kunanmi Jerico llaqtata entregasqayki, entregasqaykitaqmi reynintapas chaynataq soldadonkunatapas.

³ Llaqtatam muyurimunkichik. Soldadokunawanmi huk kutita sapa punchaw llaqtata muyumunkichik. Chaynatam rurankichik soqta punchaw.

⁴ Baulpa ñawpaqnintam rinqaku qanchis sacerdotekuna sapakama carneropa waqranmanta cornetata apastin. Qanchis kaq punchawpim llaqtata muyurimunkichik qanchis kutita hinaptinmi sacerdotekuna cornetankuta tocanqaku.

⁵ Cornetata unayneqta tocaptinkuñataqmi chayta uyarispaykichik llapallaykichik sinchimanta qaparinkichik. Hinaptinmi llaqtapa murallan kikillanmanta tuñirunqa. Chaymi runakuna sapakama yaykunqaku llaqtaman maymi kasqankumanta derecholla —nispa.

⁶ Nunpa churin Josueymi sacerdotekunata qayaykuspan nirqa: —Apaychik contrato baulta. Qanchis sacerdotekunañataqmi carnerokunapa waqranmanta qanchis cornetakunata apanqaku Tayta Diospa baulninpa ñawpaqninta —nispa.

⁷ Nirqataqmi runakunatapas: —Pasaychik hinaspa muyurimuychik llaqtata. Armasqa soldadokunañataqmi Tayta Diospa ñawpaqninta pasanqaku —nispa.

⁸ Runakunaman Josuey rimayta tukuruptinmi qanchisnintin sacerdotekuna carneropa waqranmanta qanchis cornetata apaspanku rirqaku Tayta Diospa baulninpa ñawpaqninta cornetankuta tocastin. Tayta Diospa contrato baulninpas paykunapa qepantam qatirqa.

⁹ Armasqa soldadokunañataqmi cornetakuna tocaq sacerdotekunapa ñawpaqninta rirqaku. Qepan riq runakunapas baulpa qepantam rirqaku sacerdotekuna cornetankuta tocastin riptinku.

¹⁰ Runakunatam Josuey kamachirqa: —Amam qamkunaqa qaparinkichikchu, amataqmi voznikichikpas uyarikunqachu nitaqmi chulla palabrallatapas rimarinkichikchu “Qapariychik” nispay kamachisqay horakama. Chay tiempopim ichaqa qaparinkichik —nispa.

Jerico llaqta vencesqankumanta

¹¹ Josuey kamachiptinmá huk kutita Tayta Diospa baulninta muyuchirqaku llaqtapa muyuriqninta. Hinaspam campamentoman kutispanku chaypi tuta samarqaku.

¹² Paqarinnintin punchawmi tutapayta Josuey hatarirqa hinaptinmi sacerdotekuna Tayta Diospa baulninta hombrorqaku.

¹³ Qanchis sacerdotekunam carneropa waqranmanta qanchis cornetakunata apastin riqku cornetankuta tocastin. Armasqa soldadokunañataqmi riqku paykunapa ñawpaqninta. Qepanku riq huñunasqa runakunapas Tayta Diospa baulninpa qepantam riqku sacerdotekuna cornetankuta tacaptinku.

¹⁴ Chay iskay kaq punchawpas llaqtatam huk kutitawan muyurqaku hinaspam kutirqaku campamentoman. Soqtantin punchawmi chaynallata rurarqaku.

¹⁵ Qanchis kaq punchawpiñataqmi hatarirqaku chayllaraq achikyamuchkaptin hinaspam muyurqaku llaqtata wakin punchawpi muyusqankuta hina. Ichaqa chay qanchis kaq punchawpiqa muyurqaku qanchis kutikamam.

¹⁶ Qanchis kaq kutita sacerdotekuna cornetankuta tocaruptinmi runakunata Josuey nirqa: “¡Qapariychik! Llaqtataqa Tayta Diosmi entregaykusunkichikña.

¹⁷ Llaqtam chinkachisqa kananpaq Tayta Diospaq rakisqa kanqa chay llaqtapi kaq tukuy imakunapiwan. Ichaqa chuchumika Rahab sutiyoq warmiqa kawsanqam chaynataq wasinpi lliw kaqkunapas, payqa manam wañunqachu kachamusqanchik runakunata pakaykusqanrayku.

¹⁸ Qamkunaqa amam munapayankichikchu nitaqmi hapinkichikchu chinkachisqa kananpaq Tayta Diospaq rakisqa kaqkunataqa, chayta ruraspaqa Tayta Diospaq rakisqa campamentonchiktapas hatun desgraciamanmi churawaqchik.

¹⁹ Aswanqa qorimanta, qollqemanta, tukuy broncemanta hinaspa fierromanta kaqkunaqa Tayta Diospaq sapaqchasqam kanqa hinaspapas Tayta Diospa tesoronman yapasqam kanqa —nispa.

²⁰ Chaymi runakuna qaparirqaku, sacerdotekunapas cornetankutam tocarqaku. Cornetapa waqasqanta uyarispankum runakuna qaparirqaku sinchi qapariywan chaymi llaqtapa murallan tuñiykamurqa. Runakunañataqmi llaqtaman sapakama yaykurqaku derechollata chaynapim llaqtata vencerurqaku.

²¹ Wañuchirqakum espadawan llaqtapi kaqkunata, qaritapas, warmitapas, warmatapas chaynataq machu-payatapas. Wañuchirqakutaqmi vacakunatapas, ovejakunatapas hinaspa asnokunatapas.

²² Llaqtata wateqamunankupaq kachasqanku iskay runakunatam Josuey kamachirqa: —Chuchumika warmipa wasinman yaykuspaykichikyá juramentasqaykichikman hina horqomuychik payta chaynataq llapallan paywan wasinpi kaqkunatapas —nispa.

²³ Llaqtata wateqamunankupaq kachasqanku mozokunam yaykuruspanku horqomurqaku chay Rahab sutiyoq warmita, tayta-mamanta, turi-ñañanta chaynataq llapa ayllunkunatapas. Hinaspam paykunata churarurqaku Israel campamentopa hawa lawninpi.

²⁴ Llaqtatam kañaykurqaku tukuy chaypi kaqkunatawan. Qorimanta, qollqemanta, broncemanta chaynataq fierromanta kaqkunatam ichaqa horqoramuspanku Tayta Diospa templonpi tesoroman yaparqaku.

²⁵ Josueyqa manamá wañuchirqachu Rahab sutiyoq chuchumika warmitaqa nitaq taytanpa castankunatapas nitaq llapallan ayllunkunatapas. Paykunam Israel castakunawan *f**yachachkanku kay libro qellqasqa kasqan punchawkama. Josueyqa chaynataqa rurarqa Jerico llaqtata wateqamunankupaq kachasqanku runakunata pakaykusqanraykum.

²⁶ Chay tiempotaqmi Josuey juraspan nirqa: —Tayta Diospa ñakasqanyá kachun kay Jerico llaqtata mosoqmanta hatarichiq runaqa: Llaqtapa cimientonta churaptinqa piwi churinmi wañunqa. Llaqtapa zaguan punkunta churaptinñataqmi sullka churin wañunqa.

²⁷ Josueytaqa Tayta Dios yanapasqanraykum tukuy hinastinpi ancha reqsisqa karqa.