Josué 5 - Quechua Ayacucho Bible 1987

Gilgal lawpi samarusqankumanta

¹ Jordan Mayupa waklaw chimpanpi otaq intipa seqaykunan lawpi kaq Amor casta runakunapa llapallan reyninkunam yacharurqa Israelpa mirayninkuna Jordan Mayu chimpayta tukunankukama imaynatam Tayta Dios chay mayu chakirachisqanta. Yacharurqakutaqmi lamar qochapa otaq Mediterraneo sutiyoq lamar qochapa patanpi kaq Canaan casta runakunapa llapallan reyninkunapas. Chay reykunam pasaypaqta hukmanyarurqaku Israelpa mirayninkunawan manaña peleanankupaq.

² Chay tiempopitaqmi Josueyta Tayta Dios nirqa: —Nina rumimanta afilasqa cuchillokunata ruraspayki yapamanta señalay Israelpa mirayninkunata —nispa.

³ Chaymi Josuey nina rumimanta afilasqa cuchillokunata ruraruspan Israelpa mirayninkunata señalarqa Aralot Moqopi.

⁴ Josueymá señalarqa Egipto nacionmanta lloqsimuq llapallan qarikunata otaq guerrapi peleaq llapallan qarikunata. Señalarqaqa Egipto naciomanta lloqsimuq qarikuna chunniq ñanpi wañurusqankuraykum.

⁵ Egipto nacionmanta lloqsimuq llapallan qarikunam señalasqa karqaku. Ichaqa Egipto nacionmanta lloqsimusqankupa qepanta chunniq ñanpi naceq llapallan qarikunaqa manam señalasqachu karqa.

⁶ Israelpa mirayninkunaqa tawa chunka watam purirqaku chunniqpi. Tayta Diospa nisqanta mana kasukusqankuraykum chayna purirqaku Egipto nacionmanta lloqsimuq guerrapaq llapallan qarikuna tukunankama. Chaymi Tayta Dios jurarqa chay allpataqa paykunaman mana qawachinanpaq. Chay allpaqa tukuy imakunapapas kasqan allpam.

⁷ Chayraykum mana kasukuq runakunapa rantinpi naceq miraykunata Josuey señalarqa ñan risqankupi, paykunataqa señalarqa manaraq señalasqa kasqankuraykum.

⁸ Chaymi llapallan qarikunata señalayta tukuruptinku sanoyanankukama quedarqaku hina samasqanku campamentollapi.

⁹ Chaymi Josueyta Tayta Dios nirqa: —Kunanmi qechuykichik Egipto nacionpi sirviente kaspa penqay qepikichikta —nispa. Chayraykum chay sitiota suticharqaku “Gilgal” nispa kay libro qellqasqa kasqan tiempokama.

¹⁰ Israelpa mirayninkunamá samarurqaku Gilgal sitiopi. Hinaspam Pascua Fiestata rurarqaku tardeykuqta, chay fiestataqa rurarqaku killapa chunka tawayoq puchawninpim Jerico llaqtapa chimpan pampapi.

¹¹ Pascuapa paqarinnintin punchawñataqmi chay Canaan allpapi kawsaykunataña mikurqaku otaq mana qonchuyoq tantatawan hamkakunataña.

¹² Hinaptinmi chay allpapi kawsay mikusqanku punchawpa paqarinnintillanta “maná” sutiyoq mikuy taniramurqa. Chayraykum Israelpa mirayninkunapaq manaña karqañachu “maná” sutiyoq mikuy. Ichaqa Canaan allpapi cosechasqankutañam mikurqaku chay wata.

Josueyman espadayoq runa rikurisqanmanta

¹³ Jerico llaqtapa hichapanpi Josuey kachkaspanmi qonqaymanta rikururqa ñawpaqninpi sayachkaq runata, chay runam hapichkarqa vaynanmanta horqosqan espadata. Josuey asuykuspanmi nirqa: —¿Ñoqayku partechu kanki icha enemigoykumanta kaqchu? —nispa.

¹⁴ Chay runam nirqa: —Manam, aswanqa Tayta Diospa tropankunapa kamachiqnin kaspaymi kunan hamuni —nispa. Hinaptinmi Josuey qonqoranpa pampakama kumukuykuspan nirqa: —Señorlláy ¿imatataq kamachiwanki kay serviqnikimanqa? —nispa.

¹⁵ Chaymi Tayta Diospa tropan kamachiqñataq nirqa: —*f**Usutaykita horqokuy. Kay sayasqayki sitioqa Tayta Diospaq sapaqchasqa sitiom —nispa. Chaymi Josuey paypa nisqanta hina rurarqa.